އައްޑޫ ސިޓީ އިމާމުން ތަމްރީންކުރުމަށް ކުރިޔަށްގެންދިޔަ ޕްރޮގްރާމްގެ
ބައިވެރިންނަށް ސެޓްފިކެޓް ދީފިއެވެ.
މިއީ އިމާމުން ތާޒާކުރުމަށް އިސްލާމީ
ކަންތައްތަކާ ބެހޭ ވުޒާރާއިން ކުރިއަށް ގެންދާ ބޮޑު މަޝްރޫޢެއްގެ ދަށުން
ކުރިޔަށްގެންދިޔަ ޕްރޮގްރާމެކެވެ.
މި ޕްރޮގްރާމުގައި 68 އިމާމެއް ބައިވެރިވެފައިވާއިރު،
އަންގާރަ ދުވަހުގެ ރޭ އައްޑޫ ސިޓީގައި ކުރިއަށްދިޔަ ރަސްމިއްޔާތުގައި އިސްލާމީ
މަރުކަޒުގެ އިސް އިމާމު ފަޟީލައްތުއްޝައިޚް މުޙައްމަދު ލަޠީފް ބައިވެރިވެވަޑައިގެންނެވިއެވެ.
ގައުމީ މަޝްރޫޢުގެ ދަށުން މިއަހަރު
މިހާތަނަށް 19 އަތޮޅެއްގައި އިމާމުން ތަމްރީން ކުރުމުގެ ޕްރޮގުރާމް ކުރިއަށް
ގެންގޮސްފައިވާއިރު 804 އިމާމުން ތަމްރީނު ކޮށްފައިވެއެވެ.
އިމާމުން ތަމްރީންކުރުމާއި، އިމާމުންނަށް އިތުރު ތަޢުލީމާއި ތަޖުރިބާގެ
ފުރުސަތުތައް ހޯދައިދިނުމަކީ
އިސްލާމީ ކަންތައްތަކާ ބެހޭ ވުޒާރާއިން ވަރަށް ބޮޑު އިސްކަމެއް ދެއްވައިގެން
ކުރަމުން ގެންދާ ކަމެއްކަމަށެވެ.
އަމާޒަކީ މި 5 އަހަރުގެ ތެރޭގައި 500
އިމާމުން ރާއްޖޭން ބޭރުން ތަމްރީން ކުރުންކަމަށް މިނިސްޓަރ ޑރ. މުހައްމަދު ޝަހީމް އަލީ ސަޢީދު ވިދާޅުވެފައި ވެއެވެ.
މި ދައުރުގެ ކޮންމެ އަހަރަކު، ރާއްޖޭން ބޭރުން 100
އިމާމުން ތަމްރީން ކުރުމާއި، ދައުރު ނިމިގެންދާއިރު 500 އިމާމުންނަށް ރާއްޖޭން
ބޭރުން ތަމްރީން ދިނުމާއި، 1000 ޒުވާން ޚަތީބުން މި ދައުރުގެ ތެރޭގައި މައިދާނަށް
ނެރުއްވުމަކީވެސް އަމާޒެއްކަމަށް މިނިސްޓަރ ވިދާޅުވިއެވެ.