އައު އަހަރު ފެށުމުގެ މުނާސަބަތުގައި "ދިވެހީންގެ ރާއްޖެ ފެސްޓިވަލް 2024" ގެ ތެރެއިން ބޭއްވުމަށް ހަމަޖެހިފައިވާ ކުޑަކުދިންގެ ހަވީރު މިއަދު ނޯންނާނެކަމަށް ޒުވާނުން ބާރުވެރިކުރުވުމާ، މައުލޫމާތާއި ފަންނާ ބެހޭ ވުޒާރާއިން ބުނެފިއެވެ.
މިކަމާ ގުޅިގެން އެ ވުޒާރާއިން ކުރި އެކްސް އެއްގައި ބުނީ މޫސުން ގޯސް ވުމުގެ ސަބަބުން މިއަދު ހަވީރު ހުޅުމާލެ ސެންޓްރަލް ޕާކުގައި ބޭއްވުމަށް ނިންމާފައިވާ "ދިވެހީންގެ ރާއްޖެ ފެސްޓިވަލް 2024" ކުޑަކުދިންގެ ހަވީރު ނޯންނާނެކަމަށެވެ.
"ދިވެހީންގެ ރާއްޖެ ފެސްޓިވަލް 2024" ގެ ތެރެއިން ބޭއްވުމަށް ހަމަޖެހިފައިވާ ކުޑަކުދިންގެ ހަވީރު ނުބާއްވަން ނިންމިއިރު މި ފެސްޓިވަލްގެ ތެރެއިން ރޭގަނޑު ބޭއްވުމަށް ނިންމާފައިވާ ޙަރަކާތްވެސް ސަރުކާރުންވަނީ ފަސްކޮށްފައެވެ.
މޫސުން ރަނގަޅުވުމުން މި ފެސްޓިވަލް ބާއްވާނެ ތާރީޚެއް ކަނޑައެޅުމަށްފަހު އަންގާނެ ކަމަށްވެސް އެ ވުޒާރާއިން ވަނީ ބުނެފައެވެ.
"ދިވެހީންގެ ރާއްޖެ ފެސްޓިވަލް 2024" ގައި ރޭގަނޑު ބޭއްވުމަށް ނިންމި ހަރަކާތްތަކުގެ ތެރޭގައި މިއުޒިކް ޝޯއަކާއި ލޭޒާ ޝޯއެއްގެ އިތުރުން ހަވާއެރުވުން ހިމެނެއެވެ.
މޫސުން ގޯސްވެގެން މި ހަރަކާތްތައް ފަސްކޮށްފައިވާއިރު ފަލަސްތީނުގައި މުސްލިމް އުއްމަތެއްގެ ކުށެއް ނެތް އެތަކެއް ބަޔަކު ކޮންމެ ދުވަހަކު ޝަހީދު ކުރަމުންދާއިރު ކުލަ ގަދަގޮތެއްގައި އައު އަހަރު ފާހަގަކުރަން ނިންމުމުން ގިނަބައެއްގެ ފާޑުކިޔުންވަނީ ސަރުކާރަށް އަމާޒުވެފައެވެ.
އިލްމުވެރިން ހިމެނޭހެން ގިނަ ފަރާތްތަކަކުން ބުނަމުން އަންނަނީ އިސްރާއީލުން ފަލަސްތީނުގެ މުސްލިމުން ޝަހީދުކުރަމުން އަންނައިރު އަދި ރާއްޖެއަކީވެސް މުސްލިމް ދައުލަތެއް ހިއްސާކުރާ ގައުމަކަށް ވީހިނދު އައު އަހަރު ފާހަގަކުރުމުގެ ނަމުގައި މިއުޒިކާއި ނާޗަރަނގީ ޝޯތައް ބާއްވާ އުފާ ފާޅުކުރުމަކީ ދެރަ އަދި ލަދުވެތިކަމެއްކަމަށެވެ.
އަދި ފެށުނީންސުރެ ފަލަސްތީނުގެ ހައްގުގައި ރާއްޖެއިން އަޑު އުފުލައި އިސްލާމީ ބޮޑެތި ގައުމުތަކަށް ނަމޫނާ ދައްކަމުން އަންނައިރު މިހާރު އެ މުސްލިމުންނާމެދު ރާއްޖެއިން އެއްވެސް ކުލުނެއް، ރަހުމެއް، ހަމްދަރުދީއެއް އަދި އިންސާނިއްޔަތުކަމެއް ނެތީތޯ އާއްމުންވަނީ ސުވާލު އުފައްދާފައެވެ.
ސަރުކާރުގެ މި ނިންމުން އަނބުރައި ގެންގޮސް މި ދަނޑިވަޅުގައި އައު އަހަރު ފާހަގަކުރަން މިފަދަ އަމަލުތައް ނުހިންގުމަށް ގިނަ ބަޔަކު އަންނަނީ ގޮވާލަމުންނެވެ.