ސީރިއާގެ ދާހިލީ ހަނގުރާމައަށް ދިޔަ ދިވެހި އާއިލާއެއް ތުރުކީގައި ތާށިވެފައި ތިއްބާ ރާއްޖެ ގެނެސްފި އެވެ.
ވީ ކިހިނެއް؟ - މިކަން ހާމަކުރީ، ހޯމްލޭންޑް މިނިސްޓްރީން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ.
މިނިސްޓަރު އަލީ އިހުސާން ވިދާޅުވީ، އެކިއެކި ސަރަހައްދުތަކަށް ހަނގުރާމައަށް ގޮސް، އަނބުރާ ރާއްޖެ ނާދެވި ތިބި ދިވެހިންނާއި އެ މީހުންގެ އާއިލާތަކުން ރާއްޖެ ގެނެސް، މުޖުތަމައުތެރެއަށް އަލުން ނެރުމަށް ކުރަންޖެހޭ ކަންކަންކުރުމަށް ރައީސް މުހައްމަދު މުއިއްޒު އަންގަވާފައިވާ ކަމަށެވެ.
ބުނީ ކީކޭ؟ - އެ މަސައްކަތުގެ ތަފްސީލު ހިއްސާކުރައްވަމުން އިހުސާން ވިދާޅުވީ، އެފަދަ 23 މީހަކު މުޖުތަމައުއަށް ނެރުމަށް ދޭންޖެހޭ ތަމްރީންތައް ދިނުމުގެ ކަންކަން މީގެ ކުރިން ކޮށްފައިވާނެ ކަމަށެވެ.
އިތުރު 60 މީހަކު ރާއްޖެ ގެނެސް މުޖުތަމައުއަށް ނެރުމަށް ކުރަންޖެހޭ ކަންކަން ކުރަމުންދާ ކަމަށް އޭނާ ވިދާޅުވި އެވެ. އެ މީހުންގެ ތެރޭގައި ސީރިއާގެ ދެ ސަރަހައްދެއްގައި ނާދެވި ތާށިވެފައި ތިބި މީހުންނާއި އެހެން ގައުމުތަކުގައި ތިބި މީހުންވެސް ހިމެނޭ ކަމަށް އިހުސާން ވިދާޅުވި އެވެ.
އެ މަސައްކަތް ކުރަމުންދަނިކޮށް، ތުރުކީގައި ތިން މީހަކު ތާށިވެފައި ތިބި ކަމުގެ މައުލޫމާތު ލިބިނު ކަމަށް އިހުސާން ވިދާޅުވި އެވެ. އޭގެ ތެެރެއިން ރާއްޖެ ގެނައީ، 14 އަހަރުގެ ކުޑަކުއްޖަކާއި އެ ކުއްޖާގެ މަންމަ ކަމަށް އިހުސާން ވިދާޅުވި އެވެ. އަނެއް މީހާގެ މައުލޫމާތެއް ނުދެއްވަ އެވެ.
އިހުސާން ވިދާޅުވީ، އެ މީހުންނަކީ ހަނގުރާމާގައި ބައިވެރިވާން ގޮސް، ފަހުން ތުރުކީއަށް އެތެރެވެ، އެ ގައުމުގައި ތާށިވެފައި ތިބި މީހުން ކަމަށެވެ. އެ މީހުން ތުރުކީގައި ތިބިކަން އެންގީ، އެ ގައުމުގެ ސަރުކާރުން ކަމަށް ވެސް އޭނާ ވިދާޅުވި އެވެ.
އެނގުން މުހިންމު - ސީރިއާގެ ދާހިލީ ހަނގުރާމާގައި ބައިވެރިވާން ދިޔަ މީހުންގެ ތެރެއިން 21 މީހަކު ޖެނުއަރީ 2024ގައި ވެސް ރާއްޖެ ގެނެސްފައިވެ އެވެ.
މިގޮތަށް ގެންނަ މީހުން ފުރަތަމަ ގެންދަނީ ކ. ހިންމަފުށީގައި ހުންނަ ނެޝަނަލް އިންޓަގްރޭޝަން ސެންޓަރަށެވެ. އެއަށް ފަހު:
މެޑިކަލް އެސެސްމަންޓެއް ހަދާ، އެއްވެސް ބޮޑު ބަލިމަޑުކަމެއް ހުރިތޯ ކަށަވަރުކުރޭ
ދެން ކުރިއަށްގެންދަނީ އެމީހުން ތިބި ހާލަތު ދެނެގަތުމަށް ހަދާ އެސެސްމަންޓުތަކެއް
ހާލަތު ދެނެގަތުމަށް ފަހު ވަކިވަކި މީހުންނަށް ކުރިއަށް ގެންދަންޖެހެނީ ކޮންކަހަލަ ރިހިބިލިޓޭޝަން ޕްރޮގްރާމުތަކެއްތޯ ދެނެގަނޭ؛ އެ ޕްރޮގްރާމުތަކަށް ހުއްދަ ދޭނީ ރިހިބިލިޓޭޝަން އަދި ރީއިންޓަގްރޭޝަން ކޮމިޓީން
މުޖުތަމައުއަށް ދޫކޮށްލަނީ، ރިހިބިލިޓޭޝަން ތަޖުރިބާކާރުންނަށް އެ މީހުންނަކީ މިހާރު މުޖުތަމައު ތެރޭގައި އާންމު ހާލަތުގައި އުޅެވޭނެ މީހުން ކަމަށް ހުރިހާ ގޮތަކުން ވެސް ގަބޫލުކުރެވުމުން