ކުރީގެ ރައީސް ޑޜ. މުހައްމަދު ވަހީދު ހަސަން މަނިކު، އެމެރިކާގެ ކުރީގެ ބޮޑު ކުށްވެރިޔާ ޖެފްރީ އެޕްސްޓީންއާ ގުޅުމް ބޭއްވި މައްސަލަ އެއްވެސް ފަރާތަކުން ފުލުހުންނަށް ހުށަހަޅާފައި ނެތް ކަމަށާއި އަދި އެ މައްސަލަ އިސްވެ ފުލުހުން ވެސް ބަލަމުން ނުދާ ކަމަށް ހޯމްލޭންޑް މިނިސްޓަރު އަލީ އިހްސާން ވިދާޅުވެއްޖެ އެވެ.ކުޑަކުދިންނަށް ޖިންސީ ގޯނާކުރާ ކަމުގެ ތުހުމަތުގައި އެޕްސްޓީންއާ ދެކޮޅަށް ތަހުގީގު ފެށީ 2005 ވަނަ އަހަރު އެވެ. މުޅި ދުނިޔޭގެ މީޑިއާގެ ސަމާލުކަން އޭނާގެ މައްސަލައަށް ލިބެން ފެށީ އެ ހިސާބުންނެވެ. ގައުމުތަކުގެ ވެރިންނާއި ބާރުގަދަ ވިޔަފާރިވެރިން އެޕްސްޓީން އައިލެންޑާއި މެންޝަންގައި ކުޑަކުދިންނަށް ޖިންސީ ގޯނާކުރާކަމުގެ ވާހަކަތައް މަޑުމަޑުން ނޫސްތަކަށް ލީކުވާން ފެށީ އެ ދުވަސްވަރު އެވެ.ޖޫން، 2008، ގައި އޭނާގެ މައްޗަށް 18 މަސްދުވަހު ޖަލު ހުކުމެއް އިއްވިއިރު 13 މަސްދުވަހަށް ފަހު އޭނާ މިނިވަންވި އެވެ. އެއަށްފަހު ވެސް އެޕްސްޓީން ގެންދިޔައީ އެ އޮޕަރޭޝަން ހިންގަމުންނެވެ. އެހެން އުޅެނިކޮށް ޖުލައި، 2019، ގައި ސެކްސް ޓްރެފިކިން ތުހުމަތުގައި އޭނާ އަލުން ހައްޔަރުކުރި އެވެ. އަދި، ޖެހިގެން އައި އޮގަސްޓު 10، ގައި ޖަލު ގޮޅީގައި ހުއްޓައި އޭނާ ކުއްލި ގޮތަކަށް މަރުވި އެވެ.ސިފައިންނާއި ފުލުހުން ހިންގި މިއުޓިނީއެއްގެ ތެރެއިން ވެރިކަމަށް އާދެވުނު ޑރ. މުހައްމަދު ވަހީދު ހަސަން މަނިކު އެޕްސްޓީން އާއެކު ގާތް ގުޅުމެއް ބޭއްވިކަން އެމެރިކާގެ ޖަސްޓިސް ޑިޕާޓްމަންޓުން އާންމުކުރި ލިޔެކިޔުންތަކުން ވަނީ ހާމަވެފަ އެވެ. އެމެރިކާގެ ސްޓެންފޯޑް ޔުނިވާސިޓީއިން ތައުލީމު ހާސިލުކުރި އަދި އެ ގައުމުގެ ކަންކަމަށް ފަރިތަ ބޭފުޅަކަށް އެޕްސްޓީންގެ ވާހަކަތައް ނޭނގި އޮވެދާނެ ކަމަށް ގަބޫލުކުރަން ދައްޗެވެ.އެ ލިޔެކިޔުންތަކުން ހާމަވާ ގޮތުގައި ވަހީދު އާއި އެޕްސްޓީންއާ ދެމެދު އޮތީ ވަރަށް ގާތް ގުޅުމެކެވެ. ފޭސްބުކް ޕާސްވޯޑް ހަނދާން ނެތުނު ވާހަކައާ ހަމައިން ފެށިގެން 500 މިލިއަން ޑޮލަރުގެ ލޯނު ހޯދުމުގެ ވާހަކަ ދެ މީހުން ދެއްކި އެވެ. ބައްދަލުވުންތައް ތާވަލުކުރި އެވެ. އާއިލީ މެންބަރުންގެ ވާހަކަ ދެއްކި އެވެ.އެޕްސްޓީންގެ މައްސަލަ ހޫނުވެފައިވަނިކޮށް ވަހީދު ވަނީ ރައީސް ޑރ. މުހައްމަދު މުއިއްޒުގެ ސްޕެޝަލް އެންވޯއިގެ މަގާމުން އިސްތިއުފާ ވެސް ދައްވައިފަ އެވެ. އެންވޯއިގެ މަގާމުން ވަހީދު މި އިސްތިއުފާ ދެއްވީ ނައިބު ރައީސްކަމުގައި ހުންނެވި ދުވަސްވަރާއި ރައީސްކަމުގައި ހުންނެވި ދުވަސްވަރު ވެސް އަދި ވެރިކަން ނިިމުނު ފަހުން ވެސް ރާއްޖޭގެ ވަރަށް ތަފްސީލު އަދި ހައްސާސް މައުލޫމާތުތައް ވެސް އެޕްސްޓީންއާ ހިއްސާކުރައްވައި ވަރަށް ގާތް ގުޅުމެއް ބޭއްވި މައްސަލަ ފަޅާއެރުމުން އޭނާގެ އިސްތިއުފާއަށް ގިނަ ބަޔަކު ގޮވަމުން ދަނިކޮށެވެ.އެޕްސްޓީން އާއެކު ބޭއްވި ގުޅުން ފެންމަތިވެ ކުރިމަތިވި ފާޑުކިޔުންތަކާ ގުޅިގެން ރައީސް މުހައްމަދު މުއިއްޒުގެ ހާއްސަ މުޝީރުގެ މަގާމުން އިސްތިއުފާ ދެއްވުމަށްފަހު، ވަހީދު ވަނީ އޭނާގެ އޮފީސް މެދުވެރިކޮށް ބަޔާނެއް ނެރުއްވާފަ އެވެ.އެ ބަޔާނުގައި ބުނެފައިވާ ގޮތުން ވަހީދު އެޕްސްޓީން އާ ބައްދަލުކުރީ ދެ ފަހަރެއްގެ މަތިންނެވެ. އެއީ ސެޕްޓެމްބަރު 23، 2012، އަދި މެއި 18، 2014، ގައި އެމެރިކާގެ ނިއުޔޯކުގައި ހުންނަ އެޕްސްޓީންގެ ގޭގަ އެވެ.މި ހަފްތާގައި ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި ވަހީދު އިސްތިއުފާ ދެއްވީ ރައީސް އެކަމަށް އެންގެވުމުންނެވެ.ވަހީދުގެ މައްސަލައާ ގުޅޭ ގޮތުން ނޫސްވެރިޔަކު ހޯމް މިނިސްޓަރު އަލީ އިހުސާންއާ ސުވާލުކުރުމުން ވިދާޅުވީ އެޕްސްޓީން ފައިލްސްއާ ގުޅޭ އެއްވެސް މައްސަލައެއް ފުލުހުންނަށް ހުށަހަޅާފައިނުވާ ކަމަށެވެ. އަދި އަމިއްލައަށް ފެނިގެން ވެސް އެފަދަ މައްސަލައެއް ބަލަމުން ނުދާ ކަމަށް ވިދާޅުވި އެވެ. "ނަމަވެސް އެއްވެސް މީހަކު އިސްތިސްނާނުކޮށް ޖިނާއީ ތުހުމަތެއް އޮތް ކަމަށް ގަބޫލު ކުރެވޭ ހާލަތުގައި އަދި ހުށަހެޅޭ ހާލަތުގައި އެ މައްސަލަަތައް ބަލަމުން ގެންދާނަން،" މިނިސްޓަރު ވިދާޅުވި އެވެ. އެމްޑީޕީގެ ފުރަތަމަ ވެރިކަން ބަދަލުކުރި ގޮތް ތަހުގީގު ކުރުމަށް އެކުލަވާލި ކޮމިޝަން އޮފް ނެޝަނަލް އިންކުއަރީ (ކޯނީ) ރިޕޯޓު ވެސް ސެޕްޓެމްްބަރު 26، 2012، ގައި ވަހީދު އެޕްސްޓީންއާ ހިއްސާކުރިކަން އީމެއިލްތަކުން ހާމަވެ އެވެ. އެ ރިޕޯޓު އެޕްސްޓީންއާ ހިއްސާކުރީ ވަހީދުގެ ސަރުކާރަށް ބޭރުގައި އޮތް ތާއިދު އިތުރުކުރުމުގެ ބޭނުމުގަ އެވެ."ތިޔަ ފޯރުކޮށްދެއްވި އެހީތެރިކަމަށްޓަކައި އެންމެ ފުރަތަމަ އިހުލާސްތެރި ޝުކުރެއް ދަންނަވަން. ތިޔަ ދެއްވި އިރުޝާދުތަކަކީ ނުހަނު އަގުހުރި އިރުޝާދުތަކެއް،" ސެޕްޓެމްބަރު 26، 2012، ގައި ވަހީދު އެޕްސްޓީންއަށް ލިޔުނެވެ.ވަހީދު ވަނީ އޭނާ އެޕްސްޓީންއާ ބައްދަލުކުރެއްވީ އެޕްސްޓީން އަށް އެ ތުހުމަތުތަައްކޮށް ހައްޔަރުކުރިކަން އެނގިވަޑައިނުގަންނަވާ ކަމަށާއި ޕްސްޓީންއާ ބައްދަލުކުރެއްވީ ނިއު ޔޯކްގެ އެންމެ ނުފޫޒު ގަދަ އެއް ފަންޑް މެނޭޖަރު އަދި ފައިނޭންޝަލް އެޑްވައިޒަރުގެ ހައިސިއްޔަތުން ކަމަށެވެ.