އީރާނުގެ އިސް ވެރިން ޝަހީދުކޮށް ގައުމުގެ ވެރިކަމުގެ ނިޒާމު ފޮރޮޅާލަން އެމެރިކާއާއި އިސްރާއީލުން ކުރާ މަސައްކަތްކުރިޔަށް ގެންދާނަމަ އިސްރާއީލުގެ ނިއުކްލިޔާ މައި މަރުކަޒު (ދައިމޫނާ) ގޮއްވާލާނެ ކަމަށާއި މިކަމަށް އީރާން ދަނީ ވަރަށް ބޮޑަށް ތައްޔާރުވަމުންކަމަށް އެ ގައުމުން ބުނެފިއެވެ. ނަންހާމަކުރަން ނޭދޭ އީރާނުގެ އަސްކަރީ މަސްއޫލުވެރިއަކާ ހަވާލާދީ އަލްޖަޒީރާ ބުނިގޮތުގައި އެމެރިކާއާއި އިސްރާއީލު ގެންދަނީ އީރާނަށް ވައިގެ މަގުން ގަދަފަދަ ހަމަލާތައްދީ ވެރިން ޝަހީދުކޮށްގެން އިރާންގެ އެތެރޭގައި އަސްކަރީ ބޮޑު ގަޑުބަޑެއް (އާމެޑް ކެއޮސް) އެއް އުފައްދައިގެން އީރާން ބައިބައިކޮށް ފޮތިކޮށް ގައުމުގައި ދާޚިލީ ހަނގުރާމައެއް އުފައްދަން ރާވައިގެން މަސައްކަތް ކުރަމުންނެވެ. މިކަމާ ކުރިމަތިލުމަށްޓަކައި އީރާން ގެންދަނީ އިސްރާއީލުގެ މައި ނިއުކްލިޔާ މައިމަރުކަޒު (ދައިމޫނާ) ގޮއްވާލުމަށް ވާންޖެހޭ ހުރިހާ ތައްޔާރީތަކެއް ވަރަށް ސީރިޔަސްކޮށް ވަމުންކަމަށް ނަންހާމަ ކުރަންނޭދޭ އީރާނުގެ މަސްއޫލުވެރިޔާ ވިދާޅުވިއެވެ. އިސްރާއީލުގެ މައި ނިއުކްލިޔާ މައިމަރުކަޒު ގޮއްވާލައިފިނަމަ އެތަނުން ނުރައްކާތެރި ރޭޑިއޭޝަން ބޭރުވާނެ ކަމަށް ތަޖުރިބާކާރުން ވިދާޅުވެއެވެ. ސަބަބަކީ އެއީ ނިއުކްލިޔާ ހަތިޔާރު އުފައްދާ ތަނަކަށްވާތީއެވެ. ނިއުކްލިޔާ ރޭޑީއޭޝަން ބޭރުވެއްޖެނަމަ އެކަމުގެ ގެއްލުން އެންމެ ބޮޑަށްވާނީ އިސްރާއީލު މީހުންނަށާއި ފަލަސްތީނު މީހުންނަށެވެ. ދެން އިސްރާއީލާ އަވަށްޓެރި ގައުމުތަކަށެވެ. ޔޫރަޕަށްވެސް މީގެ އަސަރު ކުރާނެއެވެ. އިސްރާއީލާއި އެމެރިކާ ތަކުރާރުކޮށް އީރާނުގެ ނިއުކްލިޔާ މަރުކަޒުތަކަށް ހަމަލާތައް ދިންނަމަވެސް އިސްރާއީލުގެ މައި ނިއުކްލިޔާ މަރުކަޒަށް ހަމަލާދިނުމަށް މިހާތަނަށް އީރާން ގެންދިޔައީ ފަސްޖެހެމުންނެވެ. އޭގެ މައިގަނޑު އެއްސަބަބަކީ އެންޓި ބަލަސްޓިކް މިސައިލް ގެ 5 ލޭޔަރު ބޭނުންކޮށްގެން އެތަން ވަރަށް ވަރުގަދައަށް ހިމާޔަތްކޮށްފައިވުމެވެ. އަނެއް ސަބަބަކީ އީރާނުގެ މަރުކަޒުތަކާ ޚިލާފަށް އިސްރާއީލުގެ ނިއުކްލިޔާ މަރުކަޒަކީ ސީދާ ނިއުކްލިޔާ ހަތިޔާރު އުފައްދާ ތަނަކަށްވާތީ އެތަނުން ރޭޑީއޭޝަން ބޭރުވެ އިސްރާއީލު މީހުންގެ އިތުރުން ސަރަހައްދުގެ އެހެން ގައުމުތަކުގެ މީހުންނަށްވެސް ކެންސަރުފަދަ ބަލިތައްޖެހުން ފަދަ ބޮޑު ނިއުކްލިޔާ ކާރިސާ އެއް ދިމާވެދާނެކަމުގެ ބިރު އޮތުމުން މިކަން ކުރަން އީރާން ބޭނުން ނުވުމެވެ. އިސްރާއީލުގެ މައި ނިއުކްލިޔާ ރިއެކްޓަރު ކަމަށްވާ ދައިމޫނާ ރިއެކްޓަރު ނިއުކްލިޔާ މަރުކަޒުތަކުން ބޭރުވާ ރޭޑިއޯ އެކްޓިވް ރޭޑިއޭޝަންތައް ކަމަށްވާ "އަލްފާ" "ބީޓާ" އަދި "ގެމާ" އަކީ ދިރުންވާ ހުރިހާ އެއްޗެއް އަދި ޓިޝޫތަކެއް ފަނާކޮށްލާ ރޭޑިއޭޝަން ތަކެކެވެ. އެ ރޭޑިއޭޝަންތަކަކީ އެއްތަނެއްގައި ނުހުރެ ފެތުރިގެން ދާ އެއްޗެކެވެ. ރޭޑިއޭޝަންގެ ކުޑަމިންވަރެއްގެ އަސަރު ކުރިނަމަވެސް ކެންސަރު ޖެހުމުގެ ފުރުސަތު ގާތްގަނޑަކަށް 80 އިންސައްތައަށް އިތުރުވާނެއެވެ. އަސްކަރީ ތަޖުރިބާކާރުން ވިދާޅުވާ ގޮތުގައި އިސްރާއީލުގެ މައި ނިއުކްލިޔާ މައިމަރުކަޒު ކަމަށްވާ ދައިމޫނާ މަރުކަޒު ގޮއްވާލުމަކީ އީރާނަށް އަމަލީ ގޮތުން ކުރެވިދާނެ ކަމެކެވެ. ނަމަވެސް އެކަން ކުރުމުގެ ކުރިން އީރާން ޖެހޭނީ މިސައިލާއި ޑްރޯން ފޮނުވައިގެން އިސްރާއީލުގެ އަތުގައިވާ އެންޓި ޑިފެންސް މިސައިލްތައް ހުސްކުރުވާށެވެ. އީރާން މިހާރު ގެންދަނީ މިކަން މިގޮތަށް ކުރަމުން ކަމަށްވެއެވެ. އެމެރިކާގައިވެސް އަދި އިސްރާއީލުގައިވެސް އެންޓި ޑިފެންސް މިސައިލްތަކުގެ ސްޓޮކް ވަރަށް މަދުކަމަށް އެމެރިކާގެ މަޝްހޫރު ނޫސްތައްކަމަށްވާ ވޮޝިންޓަން ޕޯސްޓް އާއި ބްލޫމްބާގް ފަދަ މީޑިއާ ތަކުން ވަނީ ކަށަވަރުކޮށްދީފައެވެ. އަސްކަރީ މަސްދަރުތަކާ ހަވާލާދީ މި ދެ ނޫސް ބުނާގޮތުން ގަލްފުގައިވާ އެމެރިކާގެ އަސްކަރީ ބޭސްތައް ހަލާކުކޮށްލުމަށް އީރާނަށް އެހާ ބޮޑަށް ފަސޭހަ ވެގެންދިޔައީ ގަލްފުގެ ގައުމުތަކުގައިވާ އެންޓި ޑިފެންސް މިސައިލްތައް އާދަޔާ ޚިލާފަށް މަދުވުމުގެ ސަބަބުންނެވެ. އެކަމުގެ ސަބަބުން އީރާނުގެ ހަމަލާތައް މަތަ ނުކުރެވުމުގެ ސަބަބުންނެވެ. އެމެރިކާގައި މީގެ ސްޓޮލް މަދުކަމުން އެމެރިކާ ބޮޑަށް އިސްކަން ދީފައިވަނީ ސަރަހައްދުގައިވާ އެމެރިކާގެ ކަނޑުގެ މަނަވަރުތައް ހިމާޔަތް ކުރުމަށާއި ދެން އިސްރާއީލު ހިމާޔަތް ކުރުމަށެވެ. ގަލްފުގެ ގައުމުތަކުގައިވާ އެމެރިކާގެ ބޭސްތައް ހިމާޔަތް ކުރުމަށް ދީފައިވަނީ ވަރަށް މަދު މިސައިލް ކޮޅެކެވެ. އީރާނުގައި އުފައްދާ 20,000 ޑޮލަރުގެ ޑްރޯނެއް ވައްޓާލަން ހަތަރު މިލިޔަން ޑޮލަރުގެ އެންޓި ޑިފެންސް މިސައިލެއް ބޭނުންކުރަން ޖެހެއެވެ. އަދި އީރާނުން އެއްލައްކަ ޑޮލަރަށް ވުރެ އަގު ހެޔޮކޮށް އުފައްދާ ބަލިސްޓިކް މިސައިލެއް ވައްޓާލުމަށް ހަ މިލިޔަން ޑޮލަރުގެ އެންޓި ޑިފެންސް މިސައިލެއް ބޭނުންކުރަން ޖެހެއެވެ. މިއީ ދިގުމުއްދަތަކަށް ބަލާއިރު ޚަރަދުގެ ގޮތުން ދެކޮޅު ޖެހޭ ކަމެއް ނޫނެވެ. އަނެއްކޮޅުން އީރާނުން ޑްރޯން އާއި މިސައިލް ވަރަށް އަވަހަށް އުފައްދާއިރު އެތަކެތި ވައްޓާލުމަށް ބޭނުންކުރާ އެންޓި ޑިފެންސް މިސައިލް އުފެއްދުމަކީ ވަރަށް ދިގު މުއްދަތެއް ބޭނުންވާ ވަރަށް ކޮންޕްލިކޭޓެޑް ކަމެކެވެ. ޓްރަމްޕް ވަނީ އެމެރިކާގައި އެންޓި ޑިފެންސް މިސައިލް މަދުކަމަށް ދެކެވޭ ވާހަކަތައް ދޮގު ކުރައްވާފައެވެ. ނަމަވެސް އެކަން ދޮގުކުރެއްވިތާ 24 ގަޑިއިރު ނުވަނީސް ޓްރަމްޕް ވަނީ މިބާވަތުގެ މިސައިލް އުފައްދާ އެމެރިކާގެ ކުންފުނިތަކުގެ ވެރިންނާ ވައިޓް ހައުސްގައި ބައްދަލުކުރައްވައި އެންޓި ޑިފެންސް މިސައިލް އުފެއްދުމުގެ މަސައްކަތް މެކުހަށް ޖެހުމަށް އެދިވަޑައިގެންފައެވެ. އަދި އެތަކެތީގެ ސްޓޮކް މަދުވެފައިވާކަމަށް އެއްބަސްވެ ވަޑައިގެންފައެވެ. މިތަކެތި އަވަހަށް ނުއުފެއްދޭ ކުންފުނިތަކުގެ ބޭނުމެއް ނެތްކަމަށް ވިދާޅުވެ ޓްރަމްޕް ވަނީ އެ ކުންފުނިތަކުގެ ވެރިންނަށް އިންޒާރުވެސް ދެއްވާފައެވެ. މި ކުންފުނިތަކާއެކު މާދަމާ ވައިޓް ހައުސްގައި އިތުރު ބައްދަލުވުމެއް ބޭއްވުމަށް ވެސް ވަނީ ހަމަޖެހިފައެވެ. ޑްރޯން އާއި އާދައިގެ ބަލިސްޓިކް މިސައިލް ބޭނުންކޮށްގެން ގަލްފުގައިވާ އެމެރިކާގެ ބޭސްތަކަށާއި އިސްރާއީލަށް ދޭ ހަމަލާތައް އީރާން ވަނީ އިތުރުކޮށްފައެވެ. ބޭނުމަކީ އެންޓި ޑިފެންސް މިސައިލްތައް އެމެރިކާއާއި އިސްރާއީލުން ހުސްކުރުވުމެވެ. މި ތަކެތި ހުސްކުރުވުމަށްފަހު ނޫނީ އޭގެ ސްޓޮކް މަދުކުރުވުމަށްފަހު ގިނަ އަދަދެއްގެ ޑްރޯން އާއި އާދައިގެ މިސައިލް އާ އަދި ހައިޕާ ސޮނިކް މިސައިލުން އިސްރާއީލުގެ ނިއުކްލިއާ މައިމަރުކަޒަށް ހަމަލާދީފިނަމަ އެތަން ދިފާއު ނުކުރެވި އެތަން ގޮއްވާލުމަކީ އީރާނަށް ކުރެވިދާނެ ކަމެއް ކަމަށާއި ނަމަވެސް އެކަމަށް އަދި ވަގުތު ބޭނުންވާނެކަމަށް އަސްކަރީ ތަޖުރިބާކާރުން ވިދާޅުވެއެވެ. އަނެއްކޮޅުން އީރާނުގައި އުފައްދާ ހައިޕާސޮނިކް މިސައިލެއް ކަމަށްވާ "ފައްތާހު" ބޭނުންކޮށްގެންވެސް އިސްރާއީލުގެ ނިއުކްލިޔާ މަރުކަޒަށް ހަމަލާ ދެވިދާނެއެވެ. ސަބަބަކީ ހައިޕާސޮނިކް މިސައިލް އަކީ އެންޓި މިސައިލުން ވައްޓާލެވޭ އެއްޗަކަށް ނުވާތީއެވެ. ހައިޕާ ސޮނިކް މިސައިލް އީރާނުގައިވެސް އެހާ ގިނައިން ނެތްކަމަށް ވިޔަސް އީރާނުގެ ސައެންސް ވެރިންނާއި އިންޖިނޭރުން ގެންދަނީ އެތަކެތި އުފެއްދުމަށް ބިމުއަޑީގައިވާ މަރުކަޒުތަކުގައި ޑިއުޓީ ބަހައިގެން 24 ގަޑިއިރު މަސައްކަތް ކުރަމުންނެވެ.