ބޭހުގެ ފެންވަރު ރަނގަޅުވަނީ ވިލާތުގެ ގައުމުތަކުގައި އެކަނި އުފެއްދުމުން ނޫން ކަމަށާއި، މުހިންމީ ފެންވަރު ކަށަވަރުކުރެވޭ ރަނގަޅު ބޭސް ހޯދުން ކަމަށް ހެލްތު މިނިސްޓަރު ޢަބްދުالله ނާޒިމް އިބްރާހީމް މިއަދު ވިދާޅުވެއްޖެއެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ނާޒިމް ވިދާޅުވީ، ބޭހުގެ ކޮލިޓީއަކީ ކޮންމެހެން ޔޫރަޕުގެ ކޮލިޓީއަށް ވާން ނުޖެހޭ ކަމަށެވެ. ނާޒިމް ވިދާޅުވީ، ސަރުކާރުގެ ސިޔާސަތަކީ ރާއްޖެއަށް ރަނގަޅު ފެންވަރުގެ ބޭސް ލިބޭނެކަން ކަށަވަރުކުރުން ކަމަށެވެ. އޭނާ ވިދާޅުވީ ފެންވަރު ރަނގަޅު ބޭސް އިންޑިއާއާއި ބަންގްލަދޭޝްގައި ވެސް އުފައްދާ ކަމަށާއި، ބޭސް އުފައްދާ ގައުމަކަށް ވުރެ ބޮޑަށް، ސަރުކާރުން ބަލަނީ އޭގެ ފެންވަރު ކަމަށެވެ. ޔޫރަޕަށް ގެންދާ ވަރަށް ގިނަ ބޭހަކީ ވެސް އިންޑިއާގައި އުފައްދާ ބޭސް، ނޫނީ ޕާކިސްތާނުން ނޫނީ އެހެން ތަންތަނުން ވެސް އުފައްދާ ބޭސް، މީގައި މުހިންމީކީ އެ އުފައްދާ ތަނެއް، އުފައްދާ ގައުމެއްނޫން ކަންނޭނގެ، މުހިންމީ އޭގެ ކޮލިޓީ ކަށަވަރުކުރެވޭ ރަނގަޅު ބޭސް ލިބޭނެކަން އަޅުގަނޑުމެން ކަށަވަރުކުރުންޢަބްދުالله ނާޒިމް އިބްރާހީމް - ހެލްތު މިނިސްޓަރު ނާޒިމް ވިދާޅުވީ، ސަރުކާރުން މަސައްކަތްކުރަނީ ރައްޔިތުންނަށް ފެންވަރު ރަނގަޅު ނިޒާމަކުން ބޭސް ލިބޭކަން ކަށަވަރުކޮށް، ރަނގަޅު ފެންވަރުގެ ބޭސް ހޯދައިދިނުމަށް ކަމަށެވެ. ފާހަގަކުރެވޭ ގޮތުގައި، ރާއްޖެއިން ފެންވަރު ރަނގަޅު ބޭސް ލިބޭނެ ގޮތް ކަށަވަރު ކުރުމަށް ޓަކައި، ޔޫރަޕްގެ ގައުމުތަކުގައި ބޭނުންކުރުމަށް އެގައުމުތަކުގެ ސިއްހީ އިދާރާތަކުން ހުއްދަދީފައިވާ ބޭސް ފުރަތަމަ ފަހަރަށް ވިއްކަން ފެށިކަން ސަރުކާރުން ހާމަކުރީ ޖުލައި 22، 2024ގައެވެ. https://sun.mv/194617 ހެލްތު މިނިސްޓްރީއާއި ފިނޭންސް މިނިސްޓްރީއާއި އެންސްޕާއާއި އާސަންދައިގެ އިތުރުން ފުޑް އެންޑް ޑްރަގް އޮތޯރިޓީ އާއި އެސްޓީއޯއިން ނެރުނު ނޫސްބަޔާނެއްގައި ވަނީ، ފެންވަރު ރަނގަޅު ބޭސް ގެނައުމަށް ރައީސް ޑރ. މުޙައްމަދު މުޢިއްޒު ވެވަޑައިގެންނެވި ވައުދުފުޅުގެ ދަށުން، ސަރުކާރުން ޔޫއެންޑީޕީއާ ގުޅިގެން ފެންވަރު ރަނގަޅު ބޭސް ޕޫލް ޕްރޮކިއުމެންޓެއްގެ ތެރެއިން، ބަލްކް ޕްރޮކިޔޮކޮށް ގެންނަން ފަށައިފައިވާ ކަމަށެވެ. އެ ފިޔަވަޅުގެ ދަށުން އަސާސީ ހުރިހާ ބޭހެއް ރާއްޖެއިން ލިބެން ހުންނާނެ ކަމަށާއި، ގެނެވޭ ބޭސްތަކަކީ ސީދާ ބޭސް އުފައްދާ ކުންފުނިން ގަނެ، ބޭސް އުފެއްދުމާ ހަމައިން ފެށިގެން ބަލި މީހާއާ ހަމައަށް ރައްކާތެރިކަން ކަށަވަރު ކުރެވިފައިވާ ބޭސްކަން ކަށަވަރު ކުރެވޭނެ ކަމަށް އެ ބަޔާނުގައިވެއެވެ. "މި ސިޔާސަތުގެ ދަށުން ރާއްޖެ އެތެރެކުރުމަށް ހުއްދަ ދީފައިވަނީ އަދި ކުރިއަށް އޮތް ތަނުގައި ހުއްދަ ދޭނީ ވެސް ޑަބްލިޔުއެޗްއޯ ލިސްޓެޑް ނުވަތަ ސްޓްރިންޖެންޓް ރެގިއުލޭޓްރީ އޮތޯރިޓީއެއްގައި ރަޖިސްޓްރީ ކޮށްފައިވުމާއެކު، ޔޫއެންޑީޕީއާއި މޯލްޑިވްސް ފުޑް އެންޑް ޑްރަގް އޮތޯރިޓީގެ ކޮލިޓީ މިންގަނޑުތަކުން ފާސްވެފައިވާ ޕްރޮޑަކްޓްތަކަށެވެ،" ބަޔާނުގައިވެއެވެ. އޭގެ ނަތީޖާއެއްގެ ގޮތުން ރާއްޖެއަށް ގެނެސް، ބޭނުންކުރެވޭނީ ޔޫރަޕްގެ ގައުމުތަކުގައި ބޭނުންކުރުމަށް އެ ގައުމުތަކުގެ ސިއްހީ އިދާރާތަކުން ހުއްދަދީފައިވާ ބޭސް އެކަނިކަން ބަޔާނުގައި ފާހަގަކޮށްފައިވެއެވެ. ރާއްޖެއިން ފެންވަރު ރަނގަޅު ބޭސް ނުލިބި، ނުރައްކާތެރި މާއްދާތައް އެކުލެވޭ ބޭސްތައް ބައެއް ފަހަރު އެތެރެ ކުރާ މައްސަލައަކީ އާންމު ޝަކުވާއެކެވެ. އެގޮތުން ދިވެހިން އާންމުކޮށް ބޭނުންކުރާ ބައެއް ބޭސްތައް ވެސް ބޭނުންނުކުރަން އެމްއެފްޑީއޭއިން މީގެ ކުރިން އަންގައިފައިވެއެވެ.