ގައުމީ ބޭންކު، ބީއެމްއެލްގެ ޑިޖިޓަލް ވޮލެޓު "ސްވައިޕް" ވާނީ ބައިނަލްއަގުވާމީ އެހެނިހެން ޑިޖިޓަލް ވޮލެޓުތަކާ އެއްހަމައެއްގައި ފައިތިލަ ސާބިތުކުރާ ވޮލެޓަކަށް ކަމަށް، ބީއެމްއެލްގެ މެނޭޖިން ޑިރެކްޓަރު މުޙައްމަދު ޝަރީފް ވިދާޅުވެއްޖެއެވެ. ޖަރުމަނުވިލާތުގެ ވެރިރަށް ބާލިންގައި މިހާރު ކުރިއަށްދާ ފަތުރުވެރިކަމުގެ ދާއިރާގެ އެންމެ ބޮޑު ޓްރޭޑް މައުރަޒުކަމަށްވާ އައިޓީބީ ބާލިންގައި ވަނީ ރަސްމީކޮށް ސްވައިޕް އިފުތިތާހުކޮށްފައެވެ. ސްވައިޕް އިފުތިތާހުކޮށްދެއްވީ މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީ (މަޓީ)ގެ ޗެއާމަން، އަދި ފަތުރުވެރިކަމަށް ގިނަ ޚިދުމަތްތަކެއް ކޮށްދެއްވާފައިވާ ޙަސަން އަފީފް (ޗަމްޕާ)އެވެ. ސްވައިޕް އިފްތިތާހުކޮށްދެއްވުމަށްފަހު ދައުލަތުގެ މީޑިއާ ޕީއެސްއެމަށް ދެއްވި ބަސްދީގަތުމެއްގައި ޝަރީފް ވިދާޅުވީ، ފަތުރުވެރިންގެ މެދުގައި ރާއްޖެ މަގުބޫލުއިރު، ހަމަ އެ ފެންވަރުގެ އުފެއްދުންތައް ރާއްޖޭގައި އޮތުން މުހިންމު ކަމަށެވެ. އައިޓީބީ ފެއާގެ ތެރެއިން މި ވޮލެޓު ތައާރަފުކުރި ސަބަބެއް ކަމަށް އޭނާ ވިދާޅުވީ، ސްވައިޕްއަކީ ފަތުރުވެރިކަމުގެ ސިނާއަތަށް ބޮޑު ފައިދާތަކެއް ލިބޭނެ ވޮލެޓަކަށް ވާނެ ކަމަށް ގަބޫލުކުރެވޭތީ ކަމަށެވެ. "އަޅުގަނޑު ގަބޫލުކުރަނީ އެހެނިހެން ވޮލެޓްތަކާ އެއްހަމައެއްގައި ފައިތިލަ ސާބިތުކޮށްދޭ ވޮލެޓަކަށް މި ވޮލެޓު ވާނެކަން، އެހެންނުވާންވީ ސަބަބެއް ނެތް، ރާއްޖޭގައި މިއޮންނަނީ މުޅި ދުނިޔޭގައިވެސް މިއޮންނަ އެންމެ ބޮޑު ޓޫރިޒަމް. އަދި އެންމެ ބޮޑެތި ރިސޯޓުތައް. އެހެންވެއްޖެއްޔާމު މިފަދަ ފައިނޭންޝަލް ޕްރޮޑަކްޓްތައްވެސް އަޅުގަނޑުމެން ދެކެނީ މިފަދަ ވަރުގަދަ ބައިނަލްއަގުވާމީ ޕްރޮޑަކްޓުތަކަަކަށް ވެގެން އެހެން ބައިނަލްއަގުވާމީ ވޮލެޓްތަކާ ކޮމްޕީޓުކުރުން މުހިންމުކަމަށް." ޝަރީފް ވިދާޅުވިއެވެ. https://x.com/bankofmaldives/status/2029253224419737876 މި ވޮލެޓުގެ ސަބަބުން ރިސޯޓުތަކުގެ ޚަރަދު ކުޑަވެ، ވަގުތުން ފައިސާ ލިބޭނެ ކަމަށް ޝަރީފް ވިދާޅުވިއެވެ. އެހެން ޑިޖިޓަލް ވޮލެޓުތަކާއި ކްރެޑިޓް ކާޑުތަކުން މިހާރު ފައިސާ ދައްކާއިރު 2.5 އިންސައްތައަށްވުރެ މަތިން ކޮމިޝަނެއް ނަގާ ކަމަށާއި، އެކަމަކު ސްވައިޕް މެދުވެރިކޮށް ހަދާ މުއާމަލާތްތަކުން ނަގާނީ އެއް އިންސައްތައިގެ ކޮމިޝަން ކަމަށްވެސް ޝަރީފް ވިދާޅުވިއެވެ. ސްވައިޕްއަކީ ދިވެހީން އުފައްދައި ތަރައްގީކޮށްފައިވާ 100 ޕަސެންޓު ދިވެހި އުފެއްދުމެކެވެ. މި ޑިޖިޓަލް ވޮލެޓް ފަރުމާކޮށްފައިވަނީ ރާއްޖޭގެ އިތުރުން، ފައިސާގެ މުއާމާލާތް ހިންގުމުގައި ކަނޑައަޅާފައިވާ ބައިނަލްއަގުވާމީ ޝަރުތުތަކާއި މިންގަނޑުތަކަށް ފުރިހަމައަށް ފެތޭ ގޮތަށް ކަމަށް ބީއެމްއެލްއިން ބުނެއެވެ. ސްވައިޕް ވޮލެޓް މެދުވެރިކޮށް ރާއްޖެއާއި ރާއްޖެއިން ބޭރުގެ މުއާމަލާތްތައް ކުރެވޭނެއެވެ. އަދި ބީއެމްއެލް އެކައުންޓްތަކުގެ އިތުރުން ކޮންމެ ކްރެޑިޓް، ޑެބިޓް އަދި ޕްރިޕެއިޑް ކާޑަކުންވެސް ސްވައިޕް ވޮލެޓަށް ފައިސާ ޖަމާކުރެވޭނެ ކަމަށް ބީއެމްއެލްއިން ވަނީ ބުނެފައެވެ. ނިމިދިޔަ ޖަނަވަރީ މަހު ލިމިޓެޑް ރިލީޒަށް ހުޅުވާލުމަށް ފަހު ސްވައިޕް ބޭނުންކުރާ ފަރާތްތަކަށް މި ވޮލެޓުގެ މައިގަނޑު ފީޗާތައް ތަޖުރިބާ ކުރުމުގެ ފުރުސަތު ވަނީ ދީފައެވެ. އެގޮތުން ޕާސަން ޓު ޕާސަން ޓްރާންސްފާތަކާއި ކިއުއާރް ޕޭމަންޓް އަދި އެކައުންޓުން ކުރާ ޚަރަދުތަކުގެ ތަފާސްހިސާބުތައް އަމިއްލައަށް ބަލައިލެވޭނެ ގޮތާއި، ޕޭމަންޓް ލިންކް ޝެއާކޮށް، ފަސޭހައިން ޓޮޕްއަޕްކޮށް ފައިސާ ނެގުން ފަދަ ޚިދުމަތްތައް ބޭނުން ކުރުމުގެ ފުރުސަތުވަނީ ކަސްޓަމަރުންނަށް ހުޅުވައިލާފައެވެ. މީގެ ކުރިން ރައީސް ޑރ. މުޙައްމަދު މުއިއްޒު ވަނީ، 'ސްވައިޕް"އަކީ ޕޭޕާލްގެ ދިވެހި ވާޝަން ކަމަށް ވިދާޅުވެފައެވެ. ރައީސް އެހެން ވިދާޅުވެފައިވާއިރު، ބައިނަލްއަގުވާމީ ފައިސާގެ މުއާމަލާތްތައް ކުރުން ފަސޭހަކޮށްދޭނެ ޕޭޕަލް ޚިދުމަތް ރާއްޖެއަށް ތައާރަފު ކުރުމަށް އަންނަނީ މަސައްކަތް ކުރަމުންނެވެ. އެގޮތުން އުރީދޫ މޯލްޑިވްސްއާއި ޕޭޕަލްގެ ޕާޓްނާޝިޕްގެ ދަށުން ވަރަށް އަވަހަށް ޕޭޕަލްގެ ޚިދުމަތް ތައާރަފުކުރެވޭނެ ކަމަށް އިކޮނިމިކް މިނިސްޓަރު މުޙައްމަދު ސައީދު ވަނީ ވިދާޅުވެފައެވެ.