މަރުކަޒީ ބޭންކު، އެމްއެމްއޭގެ ފައިނޭންޝަލް އިންވެސްޓިގޭޝަން ޔުނިޓު (އެފްއައިޔޫ)ގެ ވެރިޔާގެ މަގާމަށް މުހައްމަދު އިޝާން އައްޔަންކޮށްފި އެވެ.
ވީކިހިނެއް؟ - އެފްއައިޔޫގެ ވެރިޔާގެ މަގާމު ހުސްވީ ކުރިން އެ މަގާމުގައި ހުންނެވި އިސްމާއިލް ސާޖިދުގެ މައްޗަށް ޖިންސީ ފުރައްސާރައެއްގެ މައްސަލައެއް ސާބިތުވާ ކަމަށް ނިންމަ އެވެ.
ތަފްސީލް - އޭގެ ކުރިން އެމްއެމްއޭގެ ހެޑް އޮފް ފައިނޭންސްގެ މަގާމުގައި ހުންނެވި އިޝާން އެފްއައިޔޫގެ ވެރިއަކަށް އައްޔަންކޮށްފައިވާ ކަމަށް އެމްއެމްއޭން މިއަދު ބުންޏެވެ.
އެމްއެމްއޭން ބުނީ އޭނާ އެ މަގާމަށް އައްޔަންކުރީ އެފްއައިޔޫގެ އިސްވެރިޔާގެ މަގާމަށް ކުރިމަތިލުމުގެ ފުރުސަތު އެމްއެމްއޭގެ މުވައްޒަފުންނަށް ހުޅުވާލުމުން، ކުރިމަތިލި މީހުންނާ އިންޓަވިއު ކުރުމަށް ފަހުގައި ކަމަށެވެ.
އެފްއައިޔޫގެ ވެރިއަކަށް އައްޔަންކުރި އިޝާނަކީ 2014އިން ފެށިގެން އެމްއެމްއޭގައި މަަސައްކަތްކުރައްވާ ޗާޓަޑް އެކައުންޓެންޓެކެވެ. އޭނާ ވަނީ އެ ތަނުގެ ހެޑް އޮފް ކޯޕަރޭޓް އެކައުންޓްސްގެ މަގާމާއި ހެޑް އޮފް ފައިނޭންސްގެ މަގާމު ފުރުވައިފަ އެވެ.
އޭނާ އަކީ އިނގިރޭސިވިލާތުގެ ޗާޓާޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ) ގެ އެސޯސިއޭޓް މެންބަރެކެވެ. އަދި އިންސްޓިޓިއުޓް އޮފް ޗާޓާޑް އެކައުންޓަންޓްސް އޮފް ދަ މޯލްޑިވްސްގެ އެފިލިއޭޓް މެންބަރެކެވެ.
ފާހަގަކޮށްލެވޭ ކަމެއް - އެފްއައިޔޫގެ ވެރިޔަކަށް ސާޖިދު ހަމަޖެއްސީ ކުރިން އެ މަގާމުގައި ހުންނެވި އަބްދުﷲ އަޝްރަފު ވަކިކުރުމާ ގުޅިގެންނެވެ.
އަޝްރަފު މަގާމުން ވަކިކުރަނީ ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަދި ވެރިކަންކުރާ ޕީއެންސީގެ ޕާލިމެންޓްރީ ގްރޫޕުގެ ސީނިއާ ޑެޕިއުޓީ ލީޑަރު އިބްރާހީމް ޝުޖާއުގެ ކުންފުންޏަކަށް ފައިދާވާ ގޮތަށް ދައުލަތުގެ މުއާމަލާތްތަކެއް ހިންގިކަން ދައްކައިދޭ އިންޓެލިޖެންސް ރިޕޯޓެއް އެ ތަނުގެ ތެރެއިން ލީކުވެފައި ވަނިކޮށެވެ.