އެމެރިކާއާއި އިސްރާއީލާ ގުޅިގެން އީރާނާ ދެކޮޅަށް ކުރާ ހަނގުރާމައިގައި ޔޫރަޕްގެ ގައުމުތަކުން ބައިވެރިވެއްޖެނަަމަ، އެ ގައުމުތަކަށް ހަމަލާ އަމާޒުވެދާނެ ކަމުގެ އިންޒާރު އީރާނުން ދީފިއެވެ. ފްރާންސް 24 އަށް ދެއްވި އިންޓަވިއުއެއްގައި އީރާނުގެ ޚާރިޖީ ވުޒާރާގެ ނާއިބު މާޖިދު ތަޚްތު-ރަވަންޗީ ވިދާޅުވީ ހަނގުރާމައިގައި ބައިވެރިވުމާ ގުޅޭ ގޮތުން ޔޫރަޕްގެ ގައުމުތަކަށް މީގެ ކުރިން ވެސް އީރާނުން އިންޒާރު ދީފައިވާ ކަމަށެވެ. "އީރާނާ ދެކޮޅަށް ކުރާ މި އުދުވާނީ ހަނގުރާމައިގައި ބައިވެރި ނުވުމަށް ޔޫރަޕުގެ ރައްޔިތުންނާއި އެހެން އެންމެންނަށް ވެސް އަޅުގަނޑުމެން މިހާރު ވެސް އަންގާފައި ވާނީ." މާޖިދު ވިދާޅުވިއެެވެ. މާޖިދު އިތުރަށް ވިދާޅުވީ އަސްކަރީ ކެމްޕެއިންގައި ބައިވެރިވާ ކޮންމެ ގައުމަކަށް ވެސް ބަދަލު ހިފުން ކުރިމަތިވާނެ ކަމަށެވެ. "އީރާނާ ދެކޮޅަށް އެމެރިކާ އާއި އިސްރާއީލާ ގުޅިގެން އެއްވެސް ގައުމަކުން މަސައްކަތްކުރާނަމަ، އެއީ ވެސް އީރާނުގެ ބަދަލު ހިފުމުގެ ޝަރުއީ އަމާޒުތަކަކަށް ވާނެ," އޭނާ ވިދާޅުވިއެވެ. މާޖިދު އެގޮތަށް ވިދާޅުވެފައި ވަނީ ޔޫރަޕްގެ ގައުމުތަކުން އެ ސަރަހައްދުގައި އަސްކަރީ ބާރުތައް އިތުރުކުރަން ފަށާފައިވާ ދަނޑިވަޅެއްގައެވެ. އެގޮތުން ފްރާންސުން ވަނީ އެމްފިބިއަސް ހެލިކޮޕްޓަރު އުފުލާ ބޯޓެއް ކަމަށްވާ ޓޮނޭރޭ މެޑިޓެރޭނިއަން ކަނޑަށް ފޮނުވާނެކަން އިއުލާންކޮށްފައެވެ. މި އުޅަނދު ގުޅޭނީ ކުރިން ޔޫރަޕްގެ އުތުރުގައި އޮންނަ ބޯލްޓިކް ކަނޑުގައި އޮޕަރޭޓް ކުރުމަށްފަހު ސަރަހައްދަށް އައިސްފައިވާ މަތިންދާބޯޓު އުފުލާ ބޯޓު ޗާލްސް ޑިގޯލްއާއެވެ. އަނެއްކޮޅުން އިނގިރޭސިވިލާތުން ވަނީ ގަލްފް ސަރަހައްދުގައި އެ ގައުމުގެ އަސްކަރީ ބާރު އިތުރުކޮށްފައެވެ. ބަހްރެއިންގެ ރަސްގެފާނު ހަމަދު ބިން އީސާ އަލް ޚަލީފާއާ އެކު ބޮޑުވަޒީރު ކައިރް ސްޓާމާ ބުރާސްފަތި ދުވަހު ކުރެއްވި މަޝްވަރާގައި ގަލްފް ސްޓޭޓަށް ދިފާއީ ވައިގެ ކަވަރު ފޯރުކޮށްދިނުމަށް ފަޔާ ޖެޓްތައް ބެހެއްޓުމަށް ވަނީ ހުށަހައްޅުއްވާފައެވެ. އަދި އެކުވެރި ގައުމުތަކުން އެދިއްޖެނަމަ، އިތުރު ހަތަރު ޓައިފޫން ފަޔާ ޖެޓް ގަތަރަށް ފޮނުވާނެ ކަމަށް ވެސް ސްޓާމާ ވަނީ އިއުލާނުކުރައްވާފައެވެ. އިސްރާއީލާއި އެމެރިކާ ގުޅިގެން އީރާނަށް ހަމަލާދެމުންދާތާ ހަފްތާއެއް ވެފައިވާއިރު، އެ ހަމަލާތަކުގައި އީރާނުގެ 1300 އަށް ވުރެ ގިނަ މީހުން ވަނީ މަރުވެފައެވެ. އޭގެތެރޭގައި އީރާނުގެ އެންމެ މަތީ ލީޑަރު އާޔަތުﷲ އަލީ ހާމަނާއީ ވެސް ހިމެނިވަޑައިގަންނަވައެވެ. ހަމަލާތަކުގެ ރައްދުގައި އީރާނުން އަންނަނީ މުޅި ސަރަހައްދުގެ އެމެރިކާގެ މަރުކަޒުތަކާއި ޑިޕްލޮމެޓިކް ފެސިލިޓީތަކާއި އަސްކަރީ މުވައްޒަފުންގެ އިތުރުން އިސްރާއީލުގެ ބައެއް ސިޓީތަކަށް އަމާޒުކޮށްގެން މިސައިލް އަދި ޑްރޯން ހަމަލާތަކެއް ދެމުންނެވެ. ހަނގުރާމައިގެ ސަބަބުން އެންމެ ބޮޑު އަސަރެއް ކޮށްފައި ވަނީ ދުނިޔޭގެ ބާޒާރުގެ ތެލުގެ އަގަށެވެ. ތެލާއި ގޭހުގެ އަގުވެސް އުފުލެމުން އަންނައިރު، މެދުއިރުމަތީގެ ތެޔޮ އުފައްދާ ތަންތަނަށް ހަމަލާ ދިނުމުގެ ސަބަބުން ގިނަ ތަންތަނުން ތެޔޮ އުފެއްދުން މަދުކުރަން ވަނީ ނިންމާފައެވެ.