ޕާޓީން ކަނޑާލުމުން ރައްޔިތުންގެ މަޖިލީހުގެ ގޮނޑި ގެއްލުން ހިމެނޭ ގޮތަށް ގާނޫނުއަސާސީއަށް މި ފަހުން ގެނައި ބަދަލުތައް ބާތިލުކުރަން ސުޕްރީމް ކޯޓަށް ހުށަހަޅާފައިވާ މައްސަލާގައި ގޮތެއް ނުނިންމެނީސް އެ ކޯޓުގެ އެއްވެސް ފަނޑިޔާރެއްގެ މައްސަލައެއް ބަލައި ފިޔަވަޅު އެޅުން ހުއްޓުވުމުގެ ވަގުތީ އަމުރަކަށް މިއަދު އެ ކޯޓުގައި އެދިއްޖެ އެވެ.
ވީ ކިިހިނެއް؟ - އިންތިހާބުވާ ޕާޓީން ވަކިވުމުން ނުވަތަ ވަކިކުރުމުން ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލުތައް ބާތިލްކުރަން ހުށަހެޅި މައްސަލަ ފަށަން ތާވަލުކޮށްފައި ވަނިކޮށް ފަނޑިޔާރުންތަކެއް ވަކިކުރަން އުޅޭ ކަމުގެ އަޑު ވަނީ ފެތުރިފަ އެވެ. އެ މައްސަލަ ބަލަނީ ސުޕްރީމް ކޯޓުގެ ފުލް ބެންޗުންނެވެ.
މިއީ މަޖިލީހުގެ ކުރީގެ މެންބަރު، ގާނޫނީ ވަކީލު އަލީ ހުސައިން ސުޕްރީމް ކޯޓަށް ހުށަހެޅުއްވި މައްސަލައެކެވެ.
ތަފްސީލް - އެ މައްސަލާގައި ގޮތެއް ކަނޑަނޭޅެނިސް ފަނޑިޔާރަކާ މެދު ފިޔަވަޅު އެޅުން ހުއްޓުވުމުގެ އަމުރަކަށް ވެސް އެދި ހުށަހެޅުއްވީ އޭނާ އެވެ. ދައުލަތުގެ ކަމާ ބެހޭ ހުރިހާ އިދާރާތަކުގެ މައްޗަށް އަމުރުކޮށްދިނުމަށް އެދިވަޑައިގެންފައިވަނީ:
ސުޕްރީމް ކޯޓުގެ ފަނޑިޔާރެއްގެ ސުލޫކީ މައްސަލަ ބެލުން ކުރިއަށް ނުގެންދިއުމަށް
ޖިނާއީ ތަހުގީގުތައް ހިންގުމާއި ފަނޑިޔާރުން މަގާމުން ވަކިކުރުމަށް މަސައްކަތް ނުކުރުމަށް 
އެފަދަ ފިޔަވަޅުތައް އަޅާނެ ކަމަށް ދޭހަވާ އެއްވެސް އަމަލެއް ނުހިންގުމަށް
މި އަމުރު ނެރެދިނުމަށް އެދޭ ސަބަބެއް ކަމަށް އަލީ ހުސެއިންގެ ހުށަހެޅުމުގައި ވިދާޅުވެފައިވަނީ ސުޕްރީމް ކޯޓަށް ހުށަހެޅިފައިވާ މައްސަލައަކީ އާންމު މަސްލަހަތާ ގުޅިފައިވާ މައްސަލައަކަށް ވާއިރު، އެ މައްސަލަ ބަލަން ތިބި ފަނޑިޔާރުންގެ މައްސަލަތައް ބަލައި މަގާމުން ވަކިކުރުމުގެ ނުސީދާ އިންޒާރުތަކެއް ލިބެމުންދާ ނަމަ، މައްސަލައިގެ ނިންމުމަށް އަސަރުކުރާނެ ކަމަށް ބެލެވޭތީ ކަމަށެވެ. އޭނާ ބުނެފައިވަނީ އެހެންވާ ނަމަ، ޖެހިލުމެއްނެތި މިނިވަންކަމާ އެކު މަސައްކަތްކުރުމުގެ ފުރުސަތު ފަނޑިޔާރުންނަށް ގެއްލިގެންދާނެ ކަމަށް ގަބޫލުކުރެވޭ ކަމަށެވެ.
ފާހަގަކޮށްލެވޭ ކަމެއް - މި މައްސަލައިގެ އަޑުއެހުން ސުޕްރީމް ކޯޓުގައި ފަށަން ތާވަލުކޮށްފައިވަނީ އަންނަ ހޯމަ ދުވަހަށެވެ. މި މައްސަލައަށް ތަދައްހުލް ވެފައިވާ އިދިކޮޅު އެމްޑީޕީން ތުހުމަތުކުރަނީ ސުޕްރީމް ކޯޓުގެ ތިން ފަނޑިޔާރަކު ވަކިކޮށް، ސަރުކާރުގެ ސިޔާސީ މަގާމުތަކުގައި މި ވަގުތު ތިއްބެވި ބޭފުޅުން ސުޕްރީމް ކޯޓު ފަނޑިޔާރު ކަމަށް އައްޔަންކުރަން ވެގެން އުޅޭ ކަމަށެވެ.