ކުރީގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު އަލުން އެ ޕާޓީއާ ގުޅިވަޑައިގަތުން ފާހަގަކުރުމަށް މިރޭ ބޭއްވި ޖަލްސާއަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވަޑައިނުގަންނަވަ އެވެ.އެނގިފައިވާ ގޮތުގައި ޞާލިޙް މިވަގުތު ހުންނެވީ ރާއްޖެއިން ބޭރުގައެވެ. ޞާލިޙް މި ޖަލްސާގައި ބައިވެރިވެ ވަޑައިނުގެން ނަމަވެސް، އެމްޑީޕީގެ ލީޑަރުންނާއި މަޖިލިސް މެމްބަރުން އަދި ގިނަ އަދަދެއްގެ ސަޕޯޓަރުން ވަނީ ބައިވެރިވެ ވަޑައިގަންނަވާފައެވެ.ނަޝީދު ގުޅިވަޑައިގަންނަވަން ޖަލްސާ ބާއްވަން އުޅެނިކޮށް ރޭ ޞާލިޙް ވަނީ ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން ވެސް އިއުލާނުކުރައްވައިފައެވެ. ދެ ބޭފުޅުންގެ މެދުގައި މިދިޔަ ރިޔާސީ އިންތިހާބުގައި ވެސް ވާދަވެރިކަން ބޮޑުވި އެވެ.އިބޫގެ ވެރިކަމުގައި ނަޝީދު އެމްޑީޕީ ދޫކުރައްވައި، "ދަ ޑިމޮކްރެޓްސް" އުފެއްދެވުމުގައި އިސްކޮށް އުޅުއްވި ބައެއް ބޭފުޅުން ވަނީ އަލުން އެމްޑީޕީއާ މިރޭ ގުޅިވަޑައިގެންފަ އެވެ.އެމްޑީޕީގެ މިރޭގެ ޖަލްސާގައި ރައީސް ނަޝީދު ވާހަކަދެއްކެވިއިރު އެމްޑީޕީގެ އިސް ބޭފުޅުން ކަމުގައިވާ ޗެއާޕާސަން ފައްޔާޒު އިސްމާއީލާއި ޕާޓީގެ ރައީސް އަބްދުﷲ ޝާހިދުގެ ނަން ވިދާޅުވިއިރު ރައީސް ސޯލިހް ނަން ވިދާޅުވެފައެއް ނުވެ އެވެ.ރައީސް ސޯލިހާއި ރައީސް ނަޝީދަކީ ކުރިން އެންމެ ގާތް ދެ ރަހްމަތްތެރިންނެވެ. ނަމަވެސް މިދިޔަ ރިޔާސީ އިންތިހާބުގައި އެމްޑީޕީން ބޭއްވި ރިޔާސީ ޕްރައިމަރީ ރައީސް ސޯލިހް ކާމިޔާބު ކުރެއްވުމާ އެކު ދެ ބޭފުޅުންގެ ގުޅުން ވަނީ ކެނޑިފަ އެވެ. އިބޫއަށް މިދިޔަ ރިޔާސީ އިންތިހާބު ނާކާމިޔާބުވީ ނަޝީދުއާ އެކު، އުފެދުނު ހިޔާލުތަފާތުވުންތަކުގައި އެމްޑީޕީ ބައިބައިވުމުގެ ސަބަބުން ކަމަށް ގިނަ ބަޔަކު ގަބޫލުކުރެ އެވެ.