އެޑިއުކޭޝަން ފަންޑުގެ ދަށުން ވިލިމާލޭގައި އިމާރާތްކުރި ޕްރީ ސްކޫލު ހިންގުން 12 އަހަރު ދުވަހަށް އަމިއްލަ ކުންފުންޏަކާއި ހަވާލުކޮށްފި އެވެ.
ޕްރީ ސްކޫލް ހިންގުން ހަވާލުކުރަން އެ ޑިއުކޭޝަން މިނިސްޓްރީގައި މިއަދު ބޭއްވި ސޮއި ކުރުމުގެ ރަސްމިއްޔާތުގައި އެޑިއުކޭޝަން މިނިސްޓްރީގެ ފަރާތުން ސޮއި ކުރެއްވީ އެޑިއުކޭޝަން ފަންޑުގެ ޗެއާމަން އިބްރާހިމް އިސްމާއިލެވެ. ޕްރީ ސްކޫލް ހިންގުން ހަވާލު ކުރި އެޑިއު އޮޕްޝަން ޕްރައިވެޓް ލިމިޑެޓްގެ ފަރާތުން ސޮއި ކުރެއްވީ އެ ކުންފުނީގެ ޑިރެކްޓަރު ހަސަން އިބްރާހީމެވެ.
ރަސްމިއްޔާތުގައި ޗެއާމަން އިބްރާހިމް އިސްމާއިލް ވިދާޅުވީ، ޕްރީ ސްކޫލް ހިންގުން ބަޔަކާއި ހަވާލު ކުރުމުން ބޭނުންވާނެ ޓީޗަރުންނާއި އިކްއިޕްމެންޓް ފަދަ ތަކެތި އެޑިއުކޭޝަނުން ހޯދަންޖެހޭނީ އެތަން ހިންގާ ކުންފުންޏަކުން ކަމަށެވެ.
ޕްރީ ސްކޫލް ހިންގުމަށް ދެ ފަހަރު ބިޑް ހުޅުވާލުމުން ވެސް ކުރިމަތިލީ ދެ ކުންފުންޏަކުން ކަމަށާއި ސްކޫލް ހިންގުން އެޑިއު އޮޕްޝަން ކުންފުންޏާއި ހަވާލު ކުރީ އެޑިއުކޭޝަނުން އެކަމަށް އެކުލަވައިލި ކޮމެޓީއަކުން ބެލުމަށްފަހު ކަމަށް ވެސް އިބްރާހިމް އިސްމާއިލް ވިދާޅުވި އެވެ.
ފަސް މިލިއަން ރުފިޔާ ހަރަދުކޮށްގެން އިމާރާތް ކުރި ޕްރީ ސްކޫލަކީ 500 ކުދިންގެ ޖާގައިގެ އިމާރާތެކެވެ.
ޕްރީ ސްކޫލް ހިންގުމާއި ހަވާލުވި އެޑިއު އޮޕްޝަން ކުންފުނިން ބުނީ އަންނަ މަހު 10 ވަނަ ދުވަހު އެ ޕްރީ ސްކޫލު ހުޅުވާނެ ކަމަށެވެ. ވިލިމާލޭގައި ހުޅުވަން ތައްޔާރުކޮށްފައިވާ ޕްރީ ސްކޫލަކީ މީގެ ދެ އަހަރު ކުރިން، 2011 ވަނަ އަހަރު ފެބްރުއަރީ މަހު އިމާރާތް ކުރަން ފެށި ސްކޫލެކެވެ.