ރައްޔިތުންގެ މަޖިލީހުގެ ރައީސް އަބުދުﷲ މަސީހު މުހައްމަދު މަގާމުން ދުރުކުރުމަށް މަސައްކަތް ކުރަމުން ނުގެންދާކަމަށާ އެ މަސައްކަތް ކުރައްވާކަމަށް ބުނެ ދެކެވޭ ވާހަކަތަކަކީ ހަގީގަތާއި ހިލާފު ވާހަކަތަކެއްކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެއެވެ.
ގާސިމް އިބްރާހިމް މިހެން ވިދާޅުވީ މަސީހުގެ އިތުބާރު ނެތްކަމުގެ ވޯޓެއް މަޖިލީހަށް ހުށައެެޅުމަށް ބައެއް މެންބަރުން މަސައްކަތް ކުރަމުންދާ ވަގުތެއްގައި އެކަމުގެ ތުހުމަތު ގާސިމް އިބްރާހިމަށް ބައެއް ފަރާތްތަކުން ކުރެއްވުމާއި ގުޅިގެންނެވެ.
ގާސިމް މިއަދު ކުރައްވާފައިވާ ޓްވީޓެއްގައި ވިދާޅުވީ މަސީހު މަގާމުން ވަކި ކުރާކަށް ޖުމްހޫރީ ޕާޓީންވެސް އަދި އެމަނިކުފާނުވެސް މަސައްކަތް ކުރައްވަމުން ނުގެންދަވާކަމަށެވެ. އަދި މީގެ ކުރިން ޕީޕީއެމްގެ ޕީޖީ ލީޑަރު އަހުމަދު ނިހާން ހުސައިން މަނިކް ދައްކަވާފައިވާ ވާހަކަތައް ދޮގުކުރައްވާކަމަށްވެސް ގާސިމް އިބްރާހިމް ވިދާޅުވިއެވެ.
ގާސިމް ކުރައްވާފައިވާ އިތުރު ޓްވީޓެއްގައި ވިދާޅުވެފައިވަނީ ގައުމު ހަމަނުޖެހުމުގެ ތެރެއަށް ދާނެފަދަ އެއްވެސް ކަމެއް އެމަނިކްފާނު ނުކުރައްވާކަަމަށާ އަދި ނުވެސް ނުކުރައްވާނެކަމަށެވެ.
އަދި ގައުމު ހަމަނުޖެހުމުގެ ތެރެއަށް ގެންދަން ގާސިމް މަަސައްކަތް ކުރައްވާކަމަށް ވިދާޅުވެ ޕީޕީއެމްގެ މަޖިލީސް ދެ މެންބަރުންނަށްކަމަށްވާ ނިލަންދޫ ދާއިރާގެ މެންބަރު އަބުދުﷲ ހަލީލާއި، ކެލާ ދާއިރާގެ މެންބަރު އަލީ އާރިފު ދެއްކި ވާހަކަތައްވެސްް ދޮގުކުރައްވާފައެވެ.
މީގެ އިތުރަށް މިހާތަނަށް ގައުމު ހަމަނުޖެހުމުގެ ތެރެއަށްދާނެފަދަ އެއްވެސްކަމެއް ޖުމްހޫރީ ޕާޓީންވެސް ކޮށްފައިނުވާނެކަމަށާ ކުރިއަށް އޮތްތާވެސް އެފަދަކަމެއް އެޕާޓީން ނުކުރާނެކަމަށްވެސް ގާސިމް ވިދާޅުވިއެވެ.