އަންނަ މާޗް މަހުގެ 22 ވަނަ ދުވަހު ބާއްވާ ރައްޔިތުންގެ މަޖިލިސް އިންތިހާބުގައި ޕީޕީއެމްގެ ފަރާތުން ވާދަކުރާ ފަރާތްތަށް ކަނޑައެޅުމަށް ބާއްވަން ހަމަޖެހިފައިވާ ދާއިރާތަކުގެ ޕްރައިމަރީގެ ތެރެއިން މާވަށު ދާއިރާގެ ޕްރައިމަރީ ބާއްވަން އެޕާޓީން ނިންމައިފި އެވެ.
މާވަށު ދާއިރާއަށް މިހާރުގެ މެންބަރު ޢަބްދުލްޢަޒީޒް ޖަމާލް އަބޫބަކުރުގެ އިތުރުން 4 ބޭފުޅަކު ވާދަކުރައްވަ އެވެ.
އެހެންކަމުން ޕީޕީއެމުން ހޮނިހިރު ދުވަހު ބާއްވާ ޕްރައިމަރީގެ ވޯޓުލުން 30 ދާއިރާއެއްގައި ކުރިއަށްދާނެ އެވެ.
މީގެއިތުރުން 13 ދާއިރާއަކަށް އެއް ކެންޑިޑޭޓަށް ވުރެ ގިނައިން ކުރިމަތިލާފައިނުވާތީ އެދާއިރާތަކަށް ކުރިމަތިލެއްވި ކެންޑިޑޭޓުންނަށް ޓިކެޓު މިހާރު ވަނީ ކަށަވަރުވެފައެވެ.
އަދި ތުޅާދޫ ދާއިރާއަށް ދެބޭފުޅުން ކުރިމަތިލުމަށްފަހު ޕްރައިމަރީ އިއުލާންކުރުމާއިއެކު އެދާއިރާއަށް ކުރިމަތިލެއްވި ބޭފުޅަކު ނަން އަނބުރާ ގެންދިއުމާއި ގުޅިގެން އަނެއް ކެންޑިޑޭޓަށް ވަނީ ޓިކެޓު ކަށަވަރުވެފައެވެ. އެދާއިރާގެ ޓިކެޓު ކަށަވަރުކުރެއްވީ މުހައްމަދު ޝަފީގެވެ.
ރައްޔިތުންގެ މަޖިލިސް އިންތިހާބުގައި ޕީޕީއެމްގެ ފަރާތުން ވާދަކުރާ ފަރާތްތަށް ކަނޑައެޅުމަށް ބާއްވަން ހަމަޖެހިފައިވާ ޕްރައިމަރީގައި ވާދަކުރުމެއް ނެތި 4 ބޭފުޅަކަށް ޓިކެޓް ދިނުމަށް ޕީޕީއެމްގެ ކައުންސިލުން މިއަދު ވަނީ ނިންމާފައެވެ. މި ހަތަރު ބޭފުޅުން ހިމެނޭ ދާއިރާއަށް އެއް ކެންޑިޑޭޓުންނަށް ވުރެ ގިނަ ކެންޑިޑޭޓުން ކުރިމަތިލައްވާފައިވެ އެވެ.
އެ ހަތަރު މެންބަރުންނަކީ ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު އާއި ގުރައިދޫ ދާއިރާ ތަމްސީލް ކުރައްވަމުން ގެންދަވާ މުހައްމަދު ރިޒާ އާއި ފުނަދޫ ދާއިރާ ތަމްސީލް ކުރައްވަމުން ގެންދަވާ އަލީ ސަލީމްގެ އިތުރުން ކިނބިދޫ ދާއިރާ ތަމްސީލްކުރައްވަމުން ގެންދަވާ މޫސާ ޒަމީރް އަށެވެ. މޫސާ ޒަމީރު މިފަހަރު ވާދަކުރައްވަނީ މުލަކު ދާއިރާއަށެވެ.