މަސްތުވާތެކތި ބެނުންކުރާ އަދި އެ ތަކެތީގެ ވިޔަފާރި ކުރުމަށް ހަދާފައިވާ ތަފާތު އެކި ގޭންގްތަކާއި ދެކޮޅަށް "ވަރުގަދަ" ހަމަލައެއް ދޭނެ ކަމުގެ އިންޒާރު ހޯމް މިނިސްޓަރު އުމަރު ނަސީރު ދެއްވައިފިއެވެ.
ފުލުހުންނާއި ސިފައިން ވަކިވިތާ 10 އަހަރު ފުރުން ފާހަގަ ކުރުމަށް މިއަދު އިސްކަންދަރު ކޮށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު އުމަރު ވިދާޅުވީ ރާއްޖޭގައި މަސްތުވާތަކެތި ބޭނުން ކުރާ 10،000 އަށްވުރެ ގިނަ މީހުން ތިބި އިރު އޭގެ ތެރެއިން 5000 އަށްވުރެ ގިނަ މީހުންނަކީ ގޭންގު މެންބަރުން ކަމަށެވެ. އަދި އެ 5000 މީހުންގެ ތެރެއިން 50 އަކަށް މީހުންނަކީ ގޭންގު ލީޑަރުން ކަމަށް ވެސް މިނިސްޓަރު ވިދާޅުވި އެވެ. އަދި ވިދާޅުވީ މާލޭގައި އެކަނިވެސް 30 އަކަށް ގޭންގު ހަރަކާތްތެރި ވަމުން އަންނަ އިރު އޭގެ ތެރެއިން 13 ގޭންގަކީ އޭގެ ނުރައްކާތެރިކަން ވަރަށް ބޮޑު ގޭންގުތައް ކަމަށެވެ.
"އިރާދަކުރެއްވިއްޔާ މުޅި މި [ގޭންގް] ސްޓްރަކްޗާ އަށް އެއްކޮށް ދެވޭ ވަރުގެ ހަމަލާއެއް އަޅުގަނޑުމެން މި ދަނީ ތައްޔާރު ކުރަމުން. މި ހަމަލާ ލަސްތަކެއް ނުވެ އަޅުގަނޑުމެން ދޭނަން،" ޢުމަރު ވިދާޅުވި އެވެ.
މިނިސްޓަރު ވިދާޅުވީ ރާއްޖޭގައި މާރާމާރީ ހިންގުން އިންތިހާ ދަރަޖައަށް ގޮސްފައިވާއިރު އޭގެ އަސްލަކީ މަސްތުވާ ތަކެއްޗާއި ގޭންގުތައް ކަމަށާއި އެހެން ކަމުންން މާރާމާރީ މަދު ކުރުމަށް ސަރުކާރުން މާސްޓާ ޕްލޭނެއް ތައްޔާރު ކުރަމުން އަންނަ ކަމަށާއި އެ ޕްލޭންގެ ދަށުން ގޭންގްތަކުގެ މުޅި ސްޓަރަކްޗާ އަށް ވަރުގަދަ ހަމަލާއެއް ދޭނެ ކަމަށެވެ.
"މިހާރު ހިނގަމުންދާ ކްރައިމްލައިން ހުއްޓުވުމަށްޓަކައި ސަރުކާރުން ވަނީ އަޒުމް ކަނޑައަޅާފައި. އިރާދަ ކުރެއްވިއްޔާ ކުރިޔަށް މި އޮތް ދުވަސްތަކުގެ ތެރޭގައި ވަރަށް ހަރުދަނާ ފިޔަވަޅުތަކެއް އަޅުގަނޑުމެން އިޢުލާން ކުރާނަން. މި މަސައްކަތަށް ބޭނުންވާ ޕްލޭން އެކުލަވާލުމުގެ މަސައްކަތް ރައީސުލްޖުމްހޫރިއްޔާ ވަނީ މިހާރު އަޅުގަނޑާ ހަވާލު ކުރައްވާފައި،" އުމަރުގެ ބާރުތައް ކުޑަކޮށްފައިވާ ކަމަށް ވާހަކަތައް ފެތުރިފައިވާ މި ދަނޑިވަޅުގައި އުމަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ބައެއް މަސްތުވާތަކެއްޗަކީ ހުއްދަ ތަކެތި ކަމަށް ބައެއް ފަރާތްތަކުން ބުނަމުންދާ ކަމަށާއި އޭގެ ސަބަބުން ޒުވާނުންނަށް އޮޅުން އަރައި އޭގެ ސަބަބުން މަސްތުވާ ތަކެތީގެ ޝިކާރައަކަށް ގިނަ ޒުވާނުންތަކެއް ވެފައިވާ ކަމަށެވެ.
"މަސްތުވާތަކެތި ބޭނުން ކުރުމަކީ ބައްޔެއް ނޫން، އެއީ ކުށެއް! އަދި ކޮންމެ ކުށަކަށް ދެވޭނީ ފަރުވާއެއް ނޫން ދެވޭނީ އަދަބު، ކަމަށް އަދި އިސްލާހު ވުމުގެ ޒިންމާ އަކީ އޭނާގެ ޒިންމާއެއް ނަމަވެސް އެކަމުގައި ސަރުކާރުން އެހީ ވާނެ،" މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު އުމަރު ވިދާޅުވީ ވޭތުވެ ދިޔަ ފަސް ވަރަކަށް އަހަރު މަސްތުވާތަކެތި ބޭނުން ކުރާ މީހުންނަށް ފިރުމަދީގެން އަދަބު ދެވިއްޖެ ކަމަށާއި އެހެން ނަަމަވެސް އޭގެ ނަތީޖާއަކަށްވީ މަސްތުވާތަކެތި ބޭނުން ކުރާ މީހުން އިތުރު ވުން ކަމަށެވެ. އެހެން ކަމުން ކުރިއަށް އޮތްތާ އިހުތިޔާރު ކުރާނީ ފިރުމަދީގެން އަދަބު ދިނުމަށް ވުރެން ބޮޑަށް ހަރުކަށި ވެގެން އަދަބު ދޭނެ ކަމަށެވެ. އަދި ވިދާޅުވީ ފުލުހުންގެ ބަދަލުތައް ހިފަހައްޓާނެ މުއައްސަސާއެއް ކަމަށާއި މިއީ ފުލުހުން "އެކްޓް" ކުރަން ވީ ވަގުތު ކަމަށެވެ. އަދި ފޮރޮންޓް ލައިންގައި ފުލުހުން މަސައްކަތް ކުރަމުންދާއިރު ކޯޓުތަކުގެ "ދިގު މަރުހަލާތަކުގައި މައްސަލަ ގެއްލުވާލަން" ބޭނުން ނުވާ ކަމަށް ވެސް ވިދާޅުވި އެވެ.