ރައްޔިތުން ސަރުކާރަށް ކުރާ އިތުބާރު އިތުރުވެފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ޝިޔާމް މިހެން ވިދާޅުވީ އިއްޔެ ބޭއްވި ހަ ދާއިރާއެއްގެ ބައި އިލެކްޝަންގެ ތެރެއިން ވެރިކަން ކުރާ ޕީއެންސީން ފަސް ގޮނޑި ކާމިޔާބުކުރުމާ ގުޅިގެންނެވެ.
އެ ކާމިޔާބީއާ ގުޅިގެން ޕީޕީއެމްގެ ނައިބު ރައީސްކަން ވެސް ކުރައްވާ ޝިޔާމް ވިދާޅުވީ މި ނަތީޖާ އިން ދޭހަކޮށްދެނީ ރައީސް ޑރ. މުހައްމަދު ޒަޢާމަތުގެ ފުރަތަމަ 8 މަސް ދުވަސް ރައްޔިތުން ފުރިހަމައަށް ބަލައިގަނެ އިތުބާރާ އުއްމީދު އިތުރުވެފައިވާކަން ކަމަށެވެ.
ރައީސް ޑޜ. @MMuizzu އަދި މިއަދު ކާމިޔާބީ ހޯއްދެވި ހުރިހާ ކެންޑިޑޭޓުންނަށާ ޓީމުތަކަށް ވަރަށް ބޮޑަށް މަރުޙަބާދަންނަވަން!9 ގޮނޑިން 8 ގޮަނޑި ކާމިޔާބުވުމުން ދޭހަކޮށްދެނީ ރައީސްގެ ޒަޢާމަތުގެ ފުރަތަމަ 8މަސްދުވަސް ރައްޔިތުން ފުރިހަމައަށް ބަލައިގަނެ އިތުބާރާ އުއްމީދު އިތުރުކުރުވައިފިކަން pic.twitter.com/uPANFx3LqG
— Ahmed Shiyam (@Shiyamaldives) July 20, 2024
އިއްޔެ ކުރިއަށް ދިޔައީ މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށް ކައުންސިލަރުން އިންތިޚާބުކުރުމަށް ބޭއްވި ބައި އިލެކްޝަނާއި ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި-އިލެކްޝަނެވެ.
މީގެތެރެއިން ޕީއެންސީން ވަނީ މާލޭ ސިޓީ ކައުންސިލްގެ ތިން ގޮނޑި އާއި ކުޅުދުއްފުށި އުތުރު ދާއިރާގެ ކައުންސިލް ގޮނޑީގެ އިތުރުން ބިލެތްދޫ ކައުންސިލްގެ ރައީސްގެ ގޮނޑި ކާމިޔާބުކޮށްފަ އެވެ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި އިލެކްޝަން ކާމިޔާބު ކުރީ މިނިވަން ކެންޑިޑޭޓެކެވެ.
މި ހަތަރު ބައި އިލެކްޝަންގައި ވޯޓުލުމުގެ ހައްގު 13،112 މީހުންނަށް ލިބެ އެވެ. ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާން ނިކުމެފައިވަނީ 3،528 މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 26.91 ޕަސެންޓެވެ. ވޯޓުނުލާ 9،584 މީހުން ތިބި ކަމަށް އީސީން ބުނެ އެވެ.