ވިލިމާލޭގެ ރައްޔިތުން މާލެ ސިޓީ ކައުންސިލްގެ ފަރާތުން އެދިފައިވަނީ ބޭނުންވަނީ ބަގީ ޚިދުމަތް ކަމަށާއި، އެހެން ނަމަވެސް ސަރުކާރުން ކަންކުރަނީ ވިލިމާލޭގެ ރައްޔިތުން އެދުނުގޮތާއި ޚިލާފަށް ކަމަށް ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މިފަދައިން ވިދާޅުވީ ވިލިމާލޭ ރައްޔިތުން ބޭނުންވާފަދައިން މާލެ ސިޓީ ކައުންސިލުން ވިލިމާލޭގައި ބަގީގެ ޚިދުމަތްދޭން ތައްޔާރުވެފައިވަނިކޮށް ކުއްލިއަކަށް ސަރުކާރުން ވިލިމާލޭގައި ބަހުގެ ޚިދުމަތްދޭން ނިންމި ނިންމުމާއި ދެކޮޅަށް ކައުންސިލްގެ 85 ވަނަ ޖަލްސާގައި ވާހަކަ ދައްކަވަމުންނެވެ.
ޝުޖާއު ގެ ވާހަކައިގައި ވިދާޅުވީ ސަރުކާރުން މިކަންކުރަނީ ޓްރާންސްޕޯޓް މިނިސްޓަރުގެ އެދިލެއްވުމާއިވެސް ދެކޮޅަށްކަމަށާއި، މިނިސްޓަރ ނަހުލާވެސް ބޭނުންފުޅުވަނީ ކައުންސިލުން ނިންމާފައޮތް ގޮތަށް ކުރިއަށް ދާންކަމަށެވެ. އަދި މިކަމަށްޓަކައި ޝުޖާއު ވަނީ މިނިސްޓަރު ނަހުލާއަށް ޝުކުރުދަންނަވާފައެވެ.
ޝުޖާއު އިތުރަށް ވިދާޅުވީ ރައީސުލް ޖުމްހޫރިއްޔާ އިބްރާހިމް މުޙައްމަދު ސޯލިހަށް ލާމަރުކަޒީ ޤާނޫނުވެސް އަދި އެ ޤާނޫނުގައި ލިޔެފައިވާ އެއްޗެއްވެސް އެނގިވަޑައި ނުގަންނަވާކަމަށެވެ.
ޝުޖާއު ވިދާޅުވީ ކައުންސިލުން ބަގީ ވަރަށް އަވަހަށް ގެންނާނެ ކަމަށާއި، މި ކައުންސިލުން އަންނަނީ އަންނަނީގައި ނޯންނާނެކަމަށެވެ.
ލާމަރުކަޒީ ޤާނޫނާއި ފުށުއަރާގޮތަށް ސަރުކާރުން ކަންކުރަމުންދާއިރު، ޤާނޫނުގަ އޮންނަނީ ރައްޔިތުންނާ މަޝްވަރާކޮށްގެން ރައްޔިތުން ބޭނުންވާގޮތަށް ކަންތައްކުރުމަށް ކަމަށާއި، އެ ޤާނޫނުގައި ރައީސްގެ ކެމްޕޭނަށްވީމައި ކަންކަންކުރަން ނޯންނަ ކަމަށް ޝުޖާއު ވިދާޅުވިއެވެ.
ރައްޔިތުންގެ ބަސް އުވާލުމަށްފަހު ލާމަރުކަޒީޤާނޫނު އެއްފަރާތްކޮށް ވިލިމާލޭގައި ބަހުގެ ޚިދުމަތް ދިނުމާއި މާލެ ސިޓީ ކައުންސިލުން ދެކޮޅުކަން މޭޔަރާއި ކައުންސިލަރުންވެސް ވަނީ ހާމަކުރައްވާފައެވެ. އެހެންނަމަވެސް ކައުންސިލްގެ މަޝްވަރާއެއްނެތި ވިލިމާލޭގައި ސަރުކާރުން ވަނީ ބަހުގެ ޚިދުމަތްފަށާފައެވެ.