ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓު ކެނޑިއްޖެއެވެ. ސްޓެލްކޯއިން ބުނީ ހުޅުމާލެއިން ކަރަންޓު ކެނޑުނީ ދިމާވި ޓެކްނިކަލް މައްސަލައަކާ ގުޅިގެން ކަމަށެވެ. މައްސަލަ ދެނެގަނެ، ވީހާ ވެސް އަވަހަކަށް އެ މައްސަލަ ހައްލުކޮށް، ކަރަންޓު ކެނޑުނު ސަރަހައްދުތަކަށް އަލުން ކަރަންޓު ދިނުމުގެ މަސައްކަތްތައް ކުރެވެމުންދާ ކަމަށް އެ ކުންފުނިން ވަނީ ބުނެފައެވެ. މި ކަމުގައި ރައްޔިތުންނަށް ދިމާވެދާނެ ދަތިތަކަށް އެ ކުންފުނިން ވަނީ މައާފަށް އެދިފައެވެ. ސްޓެލްކޯގެ ބައެއް މަސައްކަތްތައް ކުރުމަށާއި، ދިމާވާ ބައެއް ޓެކްނިކަލް މައްސަލަތަކުގައި މާލެއާ ހުޅުމާލެއިން ވެސް ކަރަންޓު ކެނޑެއެވެ. މި ފަހުން ހުޅުމާލެ ފޭސް ދެއަކުން ވަނީ ޓްރާންސްފޯމަރަކުން ވައްކަން ކުރަން އުޅުމުގެ ތެރޭ ވެސް ކަރަންޓު ކެނޑިފައެވެ.