އެމެރިކާ މެދުވެރިވެގެން އިޒްރޭލާއި ލުބުނާނާ ދެމެދު ސޮއިކުރި ސަލާމަތީ އެއްބަސްވުން ހިޒްބުއްލޯގެ ލީޑަރު ނައީމް ގާސިމް ގަބޫލުނުކުރައްވާ ބޭރުކޮށްލައްވައިފި އެވެ.
އޭނާ އިއްޔެ އެއްބަސްވުން ސިފަކުރެއްވީ އިޒްރޭލުގެ ކުރިމަތީގައި އަމާންދިނުމެއްގެ ގޮތުގަ އެވެ. އަދި އެ ޖަމާއަތުން ހަތިޔާރުއެޅި ދިފާއީ ހަރަކާތްތައް ކުރިއަށްގެންދާނެ ކަމަށް އިއުލާންކުރެއްވި އެވެ.
އިއްޔެ ނެރުއްވި ބަޔާނެއްގައި ގާސިމް ވަނީ އެ އެއްބަސްވުމަކީ ބާތިލު އެއްޗެއް ކަމަށް ވިދާޅުވެފަ އެވެ. އަދި ލުބުނާނުގެ ސަރުކާރުން ގައުމުގެ ސިޔާދަތަށް އުނިކަން އަންނާނެ ފަދަ އެއްފަރާތުގެ ދޫދިނުންތަކެއް ދީފައިވާ ކަމަށް ތުހުމަތުކުރެއްވި އެވެ. މީގެ އިތުރުން، ލުބުނާނުގެ ދެކުނުން އިޒްރޭލު ސިފައިން ފޭބުން، ހިޒްބުއްލޯއިން ހަތިޔާރު އެޅުމާ ގުޅުވާފައިވާ މާއްދާތަކަށް ފާޑުވިދާޅުވަމުން، އެއީ ހުރިހާ ރަތް ރޭނގުތަކެއް ހުރަސްކުރުން ކަމަށް އޭނާ ވިދާޅުވި އެވެ.
"އެންމެ ދަތި ހާލަތްތަކުގައި ވެސް އަޅުގަނޑުމެން ހަނގުރާމައިގެ މައިދާން ދޫކޮށްލާފައެއް ނުވާނެ. އަދި ކުރިއަށް އޮތް ތަނުގައި ވެސް ދޫކޮށެއް ނުލާނަން،" ގާސިމް ވިދާޅުވި އެވެ.
ހުކުރު ދުވަހު ވޮޝިންޓަންގައި ސޮއިކުރި މި އެއްބަސްވުމުގައިވާ ގޮތުން، ލުބުނާނުގެ ދެކުނުގެ ބައެއް ސަރަހައްދުތަކުން އިޒްރޭލު ސިފައިން އެކި މަރުހަލާތަކަށް ބަހާލައިގެން ފައިބާނެ އެވެ. ނަމަވެސް، ލުބުނާނުގެ އަސްކަރިއްޔާއިން އެ ސަރަހައްދުގެ ކޮންޓްރޯލް ހަވާލުވަންދެން، ސަލާމަތީ ޒޯނެއްގައި އިޒްރޭލު ސިފައިންނަށް ތިބުމުގެ ހުއްދަ ލިބެ އެވެ.
އިޒްރޭލުގެ ޑިފެންސް މިނިސްޓަރު އިސްރާއީލް ކާޓްޒް މި އެއްބަސްވުމަށް މަރުހަބާ ވިދާޅުވަމުން ވިދާޅުވީ، މީގެ ސަބަބުން ސަލާމަތީ ޒޯނުގެ ކޮންޓްރޯލް ދަމަހައްޓަން އިޒްރޭލަށް ފުރުސަތު ލިބޭނެ ކަމަށެވެ. އަދި ބޮޑުވަޒީރު ބެންޖަމިން ނަތަންޔާހޫ ވަނީ ފަހުން ލުބުނާނުގެ އަސްކަރިއްޔާއާ ހަވާލުކުރަން ހަމަޖެހިފައިވާ ދެ ޕައިލެޓް ޒޯނެއްގެ ޗާޓުތައް ދައްކާލާފަ އެވެ.
މި އެއްބަސްވުމާ ދެކޮޅު ހެދީ ހަމައެކަނި ހިޒްބުއްލޯއަކުން ނޫނެވެ. ގާނޫނު ހަދާ މަޖިލީހުގެ ރައީސް ނަބީހް ބެރީ އިސްކޮށް ހުންނަވާ އަމަލް މޫވްމަންޓުން ވެސް ވަނީ މިއީ ހަމަހަމަކަން ނެތް އަދި އިޒްރޭލަށް ފައިދާވާ ގޮތަށް އޮތް އެއްބަސްވުމެއް ކަމަށް ބުނެފަ އެވެ.
މި އެއްބަސްވުމަށް ފަހު ވެސް ހަމަލާތައް ކުރިއަށްދިޔަ އެވެ. ލުބުނާނުގެ ދައުލަތުގެ ނިއުސް އެޖެންސީން ރިޕޯޓްކުރި ގޮތުގައި، އިއްޔެ އިޒްރޭލުގެ ޑްރޯނަކުން ވަނީ ދެކުނުގެ ރަށެއް ކަމަށްވާ ނަބަތިއްޔާ އަލް-ފައުގާއަށް ހަމަލާއެއް ދީފަ އެވެ. އިޒްރޭލުގެ އަސްކަރިއްޔާއިން މި ހަމަލާ ކަށަވަރުކޮށްދެމުން ބުނީ، އެއީ އެ ގައުމުގެ ސިފައިންނަށް ނުރައްކަލެއް ކުރިމަތިކުރުވި މީހަކަށް އަމާޒުކޮށް ދިން ހަމަލާއެއް ކަމަށެވެ.
ގާސިމް ވަކާލާތު ކުރެއްވި ގޮތުގައި، ކުރިން އެމެރިކާއާއި އީރާނާ ދެމެދު ވެވުނު އެމްއޯޔޫއަކީ ލުބުނާނުގެ ބިމުގެ މިނިވަންކަން ކަށަވަރުކޮށްދޭ އެއްޗެކެވެ. އެހެންކަމުން، ވޮޝިންޓަންގައި ސޮއިކުރި އާ އެއްބަސްވުމުގެ ބަދަލުގައި، މި ކުރިމަތިލުންތައް ނިންމުމުގެ އަސާސަކަށް ބަލަންޖެހޭނީ އެ އެމްއޯޔޫ ކަމަށް އޭނާ ވިދާޅުވި އެވެ.