އަލްޖީރިޔާގެ ކެޕްޓަން ރިޔާދު މާރޭޒް 60 ވަނަ މިނިޓްގައި ލަނޑު ޖަހައި، އޮސްޓްރިއާއާ 2-2އިން އެއްވަރުކުރުމާ އެކު މެޗު ނިމެން ދިޔައީ އެ ނަތީޖާގަ އެވެ. އޭގެ މާނައަކީ ތިންވަނަ ޓީމުތަކުގެ ގަދަ އަށެއްގައި ހިމެނި ގަދަ 32އަށް އަލްޖީރިޔާ ދިއުމެވެ. އޭރުން އީރާން ކެޓީ އެވެ.
އޮސްޓްރިޔާއަށް ގްރޫޕް ޖޭގެ ދެވަނަ އެވެ. އެހެންކަމުން އިތުރު ވަގުތަށް ދެއްކި ހަތަރު މިނިޓްގައި އަލްޖީރިޔާ ބޯޅަ ގެންގުޅުނީ، ސެންޓަ ސާކަލް ކައިރިން ކުރިއަށް ނުގޮސް ޕާސްކޮށްލައިގެންނެވެ. އޮސްޓްރިޔާ ކުޅުންތެރިން އެ ބޯޅަ ހޯދާކަށް ނޫޅެ އެވެ. އެ ނަތީޖާއިން ލިބޭނެ ގެއްލުމެއް ނެތީ އެވެ.
ނަމަވެސް އަލްޖީރިޔާއިން ކުއްލިއަކަށް ދެ ބޯޅައެއް ކުރިއަށް ކުޅެލި އެވެ. އޭގެ ތެރެއިން އެއް ބޯޅަ ހުސްކޮށްލާފައި އޭރިޔާ ތެރެއިން ދިނީ މާރޭޒްއަށެވެ. އޭނާ ރީއްޗަށް ގޯލަށް ވައްދާލައި، 3-2އަށް ނަތީޖާ ބަދަލުކޮށްލި އެވެ. އަލްޖީރިޔާ ގްރޫޕްގެ ދެވަނައަށް، އޮސްޓްރިޔާ ތިންވަނައަށް ވެއްޓުނީ އެވެ.
އެއަށް ވުރެ ބޮޑަށް ދެން ނުކުންނަން އޮތް ނަތީޖާއަކީ ގްރޫޕްތަކުގެ ތިންވަނައިގެ ގަދަ އަށަކަށް އީރާން އެރުމެވެ. ތިން ޕޮއިންޓާ އެކު އީރާނަށް ފައިދާއަށް ވެސް އަދި ގެއްލުން ވެސް ގޯލެއް ނެތެވެ.
އެކަމަކު އޮސްޓްރިއާއަށް އެއް ގޯލުގެ ގެއްލުމެކެވެ. 
ނަމަވެސް އެހެންނެއް ނުވި އެވެ. ފަހު ސިކުންތުކޮޅުގައި އޮސްޓްރިއާއިން ކުރިއަށް ޖެހިލައި، ނޭވާހޮޅިއަށް އެޅިފައި އޮތް އުއްމީދު ސަލާމަތްކުރެވޭތޯ މަސައްކަތް ކުރި އެވެ. ނަތީޖާއަކީ ގޯލުގެ ކުރިމަތިން ލިބުނު ބޯޅަ ބޮލުން ޖަހައި ވައްދާލައި 3-3އަށް ބަދަލުކޮށްލުމެވެ. މި އާދަޔާ ހިލާފު ޑްރާމާގެ ނިމުން ގެނެސްދިނީ 90 ވަނަ މިނިޓްގައި ކުޅެން އެރުވި ސާސާ ކަލަޒިޗް އެވެ.
މިއީ މި ވޯލްޑް ކަޕްގައި މިހާތަނަށް ފެނުނު އެންމެ ހައިރާންކުރުވަނިވި މެޗެވެ. 
ޓީވީން މެޗު ބަލަން ތިބި އީރާނަށް ފަހު ސިކުންތުކޮޅުގައި ލިބުނު ބޮޑު އުފާވެރިކަން، ހަމަ އެ ވަގުތު ނެތި ދިޔައީ އެވެ.
ޑީއާރު ކޮންގޯ، ކުޅެން ޖެހޭނީ އިންގްލެންޑްއާ، 1 ޖުލައި
ސްވިޑްން، ކުޅެން ޖެހޭނީ ފްރާންސްއާ، 30 ޖޫން
ގާނާ، ކުޅެން ޖެހެނީ ކޮލަމްބިއާއާ، 4 ޖުލައި
އިކުއެޑޯ، ކުޅެން ޖެހޭނީ މެކްސިކޯއާ، 1 ޖުލައި
ބޮސްނިއާ، ކުޅެން ޖެހޭނީ އެމެރިކާއާ، 2 ޖުލައި
އަލްޖީރިޔާ، ކުޅެން ޖެހޭނީ ސްވިޓްޒަލެންޑްއާ، 3 ޖުލައި
ޕެރެގުއޭ، ކުޅެން ޖެހޭނީ ޖަރުމަނާ، 29 ޖޫން
ސެނެގޯލް، ކުޅެން ޖެހޭނީ ބެލްޖިއަމްއާ، 1 ޖުލައި
މި އަށް ޓީމުގެ ތެރެއިން ތިން ޕޮއިންޓް ލިބިގެން ޖާގަ ހޯދީ ހަމައެކަނި ސެނެގޯލްއިންނެވެ. އަނެއް ހަތް ޓީމަށް ހަތަރު ޕޮއިންޓް ލިބުނެވެ.
އީރާނުގެ އިތުރުން ތިން ޕޮއިންޓް ލިބި ތިން ވަނައިގެ ގަދަ އަށް ޓީމަށް ވާދަކުރި އަނެއް ގައުމުތަކަކީ ސައުތު ކޮރެޔާ އާއި ސްކޮޑްލެންޑެވެ.