އަމިއްލައަށް ދުއްވާ ކާރު އުފެއްދުމަށް އެޕަލް ކުންފުނިން ކުރިއަށްގެންދިޔަ މަޝްރޫއު ހުއްޓާލިތާ ދެ އަހަރަށްވުރެ ގިނަ ދުވަސް ފަހުން، އެ ކާރުތައް ޓެސްޓުކުރުމަށް އެމެރިކާގެ އެރިޒޯނާގައި ބޭނުންކުރި 5،500 އޭކަރުގެ ބޮޑު ބިން ވޭމޯ ކުންފުންޏަށް ވިއްކާލައިފިއެވެ. މި ވިޔަފާރީގެ މުއާމަލާތް ނިންމާލާފައި ވަނީ 220 މިލިއަން އެމެރިކާ ޑޮލަރަށެވެ. މިއީ އެޕަލްއިން ގާތްގަނޑަކަށް 10 އަހަރު ދުވަސްވަންދެން ކުރިއަށްގެންގޮސް ނާކާމިޔާބުވި މި މަޝްރޫއަށް ހޭދަކުރި 10 ބިލިއަން ޑޮލަރުގެ ތެރެއިން ކުޑަ މިންވަރެއް އަނބުރާ ހޯދުމަށް ކުރި ކަމެކެވެ. ފާއިތުވި ޖޫން މަހުގެ 5 ވަނަ ދުވަހު ރަސްމީކޮށް ރަޖިސްޓްރީ ކުރެވުނު ލިޔެކިޔުންތަކުން އެނގޭ ގޮތުގައި، އެރިޒޯނާގެ ވިޓްމަންގައި ހުންނަ މި ބޮޑު ބިން ގަނެފައިވަނީ ގޫގުލްގެ މައި ކުންފުނި އަލްފަބެޓްގެ ދަށުން ހިންގާ ވޭމޯ ކުންފުނިންނެވެ. މި ބިމަކީ އެޕަލްއާ ގުޅުންހުރި ޝެލް ކުންފުންޏެއް ކަމަށްވާ "ރޫޓް 14 އިންވެސްޓްމަންޓް ޕާޓްނާސް" އިން 2021 ވަނަ އަހަރު 125 މިލިއަން ޑޮލަރަށް ގަތް ބިމެކެވެ. އެހެންކަމުން މި ސަރަހައްދު ވިއްކާލުމުން އެޕަލްއަށް ވަނީ ފަސް އަހަރު ތެރޭގައި 95 މިލިއަން ޑޮލަރުގެ ފައިދާއެއް ލިބިފައެވެ. އެއްޕަލްގެ ބިން މަތިން ފެންނަގޮތުގެ ވިއު އެއް --- ވޭމޯ ކުންފުނިން ހާމަކުރި ގޮތުގައި މި އާ ސަރަހައްދު ބޭނުންކުރާނީ އެ ކުންފުނީގެ އަމިއްލައަށް ދުއްވާ ވެހިކަލްތައް އެކިކަހަލަ ދަތި ހާލަތްތަކުގައި ދުއްވޭތޯ ބެލުމަށާއި، ޑްރައިވަރަކާ ނުލައި ދުއްވާ ޓެސްޓުތައް ކުރުމަށެވެ. މިހާރުވެސް ކެލިފޯނިއާ އަދި އޮހައިއޯގައި ވޭމޯގެ ޓެސްޓުކުރާ މަރުކަޒުތައް ހުރި ނަމަވެސް، އެރިޒޯނާގެ މި ބޮޑު ބިމުގެ ސަބަބުން އެ ކުންފުނީގެ "އަމިއްލައަށް ދުއްވާ" ކާރުތަކުގެ ފްލީޓް އިތުރަށް ތަރައްގީކުރުމަށް ބޮޑު ފުރުސަތެއް ލިބިގެންދާނެއެވެ. މި ބޮޑު ބިމަކީ މީގެކުރިން ކްރައިސްލާ ކުންފުނިން ވެސް ވެހިކަލްތައް ޓެސްޓުކުރަން ބޭނުންކުރި ތަނެކެވެ. މި ސަރަހައްދުގައި ކާރުތައް ޓެސްޓުކުރުމަށް ޚާއްސަ ހައިވޭއަކާއި، ސިޓީއެއްގެ ބޭރުމަތި ސިފަވާގޮތަށް ހަދާފައިވާ 115 އޭކަރުގެ މަގުތަކުގެ އިތުރުން، ހަތަރު މޭލުގެ ބޮޑު އޯވަލް ޓްރެކެއް ހިމެނެއެވެ. ބިމުގެ ބޮޑުމިނުގެ ސަބަބުން ކުންފުނިތަކަށް އާންމުންގެ ލޮލުގައި އަޅައިނުގަނެ، ސިއްރުވެރިކަމާއެކު އާ އީޖާދުތައް ޓެސްޓުކުރުމުގެ ފުރުސަތު ފަހިވެގެންދެއެވެ. އެޕަލް ކުންފުނިން 2024 ވަނަ އަހަރުގެ ސެޕްޓެމްބަރު މަހު މަގުމަތީގައި އަމިއްލައަށް ދުއްވާ ކާރު ޓެސްޓުކުރުމުގެ ހުއްދަ ބާތިލްކުރުމަށްފަހު، މި ސަރަހައްދު ދެން ބޭނުންކުރުމުގެ އެއްވެސް ބޭނުމެއް އޮތްކަމަކަށް ނުދެކެއެވެ. ނަމަވެސް، މި މަޝްރޫއަށް ކުރި 10 ބިލިއަން ޑޮލަރުގެ ހޭދައަކީ މުޅިން ބޭކާރު އެއްޗެއް ނޫން ކަމަށް މާހިރުން ދެކެއެވެ. އެ މަޝްރޫއިން ލިބުނު ކޮމްޕިއުޓާ ވިޜަން އަދި އާޓިފިޝަލް އިންޓެލިޖެންސްގެ ކުރިއެރުންތައް މިހާރު އެޕަލް އިންޓެލިޖެންސް އަދި އެޕަލްގެ ރޮބޮޓިކްސް މަސައްކަތްތަކުގައި ބޭނުންކުރަމުންދާ ކަމަށް ބެލެވެއެވެ.