ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާ މިރޭ 8:00 ގައި ދަރުބާރުގޭގައި އޮންނާނެއެވެ. މި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ޤައުމާ މުޚާޠަބު ކުރައްވައި ވާހަކަފުޅު ދައްކަވާނެއެވެ.
މި ޖަލްސާގައި މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ޚާއްސަ އިނާމު ދެއްވުމާއެކު، ދައުލަތުގެ އިނާމު ލިބިވަޑައިގަންނަވާ ބޭފުޅުންނަށް ވެސް އިނާމު ދެއްވާނެއެވެ. މި ގޮތުން، މަތީ ދަރަޖަ ހޯދާ 40 ބޭފުޅަކަށް ރައީސުލްޖުމްހޫރިއްޔާގެ ޚާއްޞަ އިނާމާއި، 53 ބޭފުޅަކަށް ދައުލަތުގެ އިނާމު އެރުވުމަށް ވަނީ ނިންމާފައެވެ.ޖަލްސާގެ އެންމެ ފާހަގަކޮށްލެވޭ އެއް ކަމަކީ ދިވެހިރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަދި ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރގެ މަގާމުގައި ހުންނެވި ޑރ. މުޙައްމަދު ޒާހިރު ޙުސައިނަށް އެރުވުމެވެ.މި ޖަލްސާއަކީ ޤައުމީ ފެންވަރުގައި ފާހަގަކުރެވޭ މުހިންމު ހަރަކާތެއް ކަމަށްވުމާއެކު، ސަރުކާރުގެ އިސް ބޭފުޅުންނާއި، އެކި ދާއިރާތަކުން ފާހަގަކޮށްލެވޭ ޝަޚްޞިއްޔަތުތައް މި ޖަލްސާގައި ބައިވެރިވެ ވަޑައިގަންނަވާނެ ކަމަށް ބެލެވެއެވެ. ޖުމްހޫރީ ދުވަހުގެ މި ރަސްމީ ޖަލްސާއަކީ ޤައުމީ އެއްބައިވަންތަކަމާއި، އެކުވެރިކަން އާލާކޮށް، ޤައުމަށް އަގުހުރި ޚިދުމަތްތަކެއް ކޮށްދެއްވާފައިވާ ފަރާތްތަކުގެ އަގު ވަޒަންކުރުމުގެ މުހިންމު ފުރުޞަތެއް ކަމުގައި ފާހަގަކުރެވެއެވެ.