އަޅުގަނޑަކީވެސް ޒުވާނަކު ދެކެ ވަރަށް ލޯބިވެގެން އުޅުނު އަންހެނަކީމެވެ. ލޯބިވެގެން އުޅުނު ނަމަވެސް އޭނާއާއިއެކު ބޭރަށް ގޮސްއުޅުން ފަދަ ކަންކަމެއް ނުކުރަމެވެ. ބޭރަށްދާނަމަ ދަނީ އިތުރުމީހަކާއިއެކުގައެވެ.  
އޭނާ އަޅުގަނޑުމެންގެ ގެއަށް އައިސް އުޅެއެވެ. އެހެން އުޅުމުގެ ތެރޭގައި ބުނެވެސް ނުލައި އެއްރޭ ގެއަށް އާދެވުނީ އަޅުގަނޑު އެކަނި ގޭގައި އުޅެނިކޮށެވެ. މިރޭ ދާށޭ ބުނަން ބޭނުންވިއެވެ. ނަމަވެސް އިތުބާރު ކުރެވޭތީ އެހެނެއް ނުބުނަމެވެ.  
ސިޓިންގރޫމްގައި ވާހަކަދައްކަން ތިބެފައި ޒުވާނާ ބުންޏެވެ. "އަހަރެމެން ދެމީހުން އެކަނި ނުވާން ވަރަށް މަސައްކަތްކުރަމެއް ނޫންހެއްޔެވެ؟ އެކަމަކު މިރޭ މިއޮތީ އެކަނިވެފައެވެ. ބިރެއް ނުގަނޭ ހެއްޔެވެ؟" ޖަވާބުގައި އަޅުގަނޑު ބުނީމެވެ. "ބިރުގަނެއެވެ. ގޭގައި އިތުރު މީހަކު ނެތުމުން ދާށޭ ބުނަން ބޭނުންވެއެވެ. ނަމަވެސް ކޮންމެވެސް ވަރަކަށް އިތުބާރުވެސް ކުރެވޭތީ ނުބުނެ މަޑުކޮށްލީއެވެ. ރަނގަޅީ ދިއުމެވެ."  
އޭނާ ސުވާލުކުރީ އޭނާ އަޅުގަނޑުގެ ގައިގައި ބީހިއްޖެނަމަ ހަދާނީ ކިހިނަކުންތޯއެވެ؟ އަޅުގަނޑު ބުނީ އެފަދަ ނިޔަތެއްގައި އަޅުގަނޑުގެ ގައިގައި ބީހިލިނަމަވެސް ދެން ދުވަހަކުވެސް ބައްދަލުނުކުރާނެ ކަމަށެވެ. އެހިސާބުން ދެމީހުންގެ ގުޅުން ނިމުނީކަމަށެވެ.  
އޭނާގެ ޖަވާބަކަށްވީ ތިއަހައި ފިނޑި އަންހެނަކާއިއެކުގައި ނުއުޅެވޭނެ ކަމަށެވެ. އެހެންބުނާއިރަށް އަވަހަށް ނުކުމެގެންދާން ބުނެފީމެވެ. އަދި އޭނާއަށް އަޑުއިވޭވަރަށް ރައްކައުތެރިކަމަށް އެދި ދުޢާކުރަން ފަށައިފީމެވެ. ނަޞީބަކުން އޭނާ ނުކުމެގެން ހިނގައްޖެއެވެ. އޭނާ ދިއުމުން އަވަހަށް ކޮޓަރިއަށް ގޮސް ޝުކުރުގެ ސަޖިދަކުރީމެވެ. އެއަށްފަހު 2 ރަކްޢަތް ނަމާދެއްވެސް ކުރީމެވެ.  
އޭނާއަކީ އަޅުގަނޑާއިއެކު ސްކޫލްގައި ކިޔެވި ކުއްޖެކެވެ. އެހެންވީމާ ބައެއް އެކުވެރިންނަކީ 2 މީހުންގެވެސް އެކުވެރިންނެވެ. ދެމީހުންގެ ގުޅުން ނިމުނުތާ ހަފްތާއެއްވެސް ނުވަނީސް އެކުގައި ކިޔަވަން އުޅުނު އަޚްލާޤް ރަނގަޅު، ތަނަވަސް ޢާއިލާއެއްގެ ކުއްޖަކު އަޅުގަނޑަށް ގުޅާފައި ބައްދަލުކޮށްލަން ބޭނުންކަމަށް ބުނީމާ ގެއަށް އަންނަން ދަޢުވަތު ދިނީމެވެ.  
ދެމީހުން ބައްދަލުވެ ދެއްކި ވާހަކައިން އެނގުނީ އަޅުގަނޑަކީ ސޮސައިޓީއަށް ނުފެތޭ ފިނޑި އަންހެނެއްގެ ގޮތުގައި ލޯބިވެރިޔާ އެކުވެރިންގެ ގާތުގައި ވާހަކަދައްކަމުން ހިނގާކަމެވެ. އަދި އޭނާ އަޅުގަނޑާއި ބައްދަލުކުރަން އައީ އެއަޑުއިވިގެން ކަމަށެވެ. އެހެންބުނުމުން އެރޭ ދެކެވުނު ވާހަކަތައް ކިޔައިދިނީމެވެ. އަދި އޭނާ އެބުނަނީ ތެދެއްކަމަށްވެސް ބުނީމެވެ.  
ބުނީމެވެ. "އޭނާއަށް އަޅުގަނޑު ފިނޑިއަކަށްވީނަމަވެސް އަޅުގަނޑު އުންމީދުކުރަނީ ﷲ ގެ ޙަޟްރަތުގަ އަޅުގަނޑަކީ ކެތްތެރި، ހިތްވަރުގަދަ އަންހެނަކަށްވާނެކަމަށް އުންމީދުކުރާކަމަށެވެ. އަޅުގަނޑުގެ ގައިގައި އެއްވެސް ބާރެއްހުއްޓައި ކައިވެނީގެ ބޭރުން އެއްވެސް ފިރިހެނަކަށް އަޅުގަނޑުގެ ހަށިގަނޑުގައި ބީހުމުގެ ފުރުޞަތެއް ނުދޭނަމެވެ. އަދި ކައިވެނިކުރުމަށްފަހު ހިލޭ ފިރިހެނަކަށްވެސް އެފުރުޞަތެއް ނުދޭނަމެވެ. އެއީ އަޅުގަނޑުގެ ފިނޑިކަމާ ކަޓްކަންކަމަށްވެގެން ކައިވެނިކުރާނެ މީހަކު ނުލިބިއްޖެ ނަމަ ހުންނާނީ ކައިވެނި ނުކޮށެވެ."  
އޭނާ އަޅުގަނޑުގެ ވާހަކައަކަށް ޖަވާބެއް ނުދެއެވެ. ސްކޫލް ދައުރުގެ މަޖާ ވާހަކަތައް ދައްކާފައި ޖޫސްބޮއިގެން ދިއައީއެވެ.  
އަނެއް ދުވަހުވެސް ގުޅާފައި ބުނީ ބައްދަލުކޮށްލަން ބޭނުންކަމަށެވެ. ގެއަށް އަންނަން ބުނުމުން އައީ 2 އެކުވެރިންނާއިވެސް އެކުގައެވެ. އެއީވެސް ހަމައެކުގައި ސްކޫލްގައި އުޅުނު 2 ކުދިންނެވެ. 4 މީހުން ވާހަކަ ދައްކަމުން ގޮސް ބުނީ އޭނާ އައިސް އިނީ އޭނާ ކައިވެނިކުރަން ބޭނުންވަނީ އަޅުގަނޑު ފަދަ ފިނޑި، ކަޓް އަންހެނަކާއިކަމަށްވެފައި ކުޑައިރުންސުރެ އެކުގައި އުޅެވުމުން މިޒާޖުވެސް އެނގޭތީ އަޅުގަނޑާއި ކައިވެނިކުރަން ބޭނުންވެގެން ކަމަށެވެ. އަދި 2 އެކުވެރިން ގެނައީ ރަންކިޔުއްވަން ކަމަށެވެ.  
އަޅުގަނޑު ދިއައީ ސިއްސައިގެންނެވެ. މަޑުކޮށްލާށޭ ބުނެފައި ގޮސް މަންމަ ގެނެސް އެވާހަކަ ބުނީމެވެ. މަންމަބުނީ ތިއަތަނުގައި ތިއަތިބީ ކުޑައިރު ހަމަ މިގޭ ކުދިން ފަދައިން މިގޭތެރޭގައި އުޅުނު ކުދިން ކަމަށާއި މަންމައަށް ގޮތް އެނގޭ ކުދިން ކަމަށެވެ. އެހެންވީމާ އަޅުގަނޑު ބޭނުން ގޮތަކަށް ކަންކަން ނިންމީމާ މައްސަލައެއް ނެތް ކަމަށެވެ. ކައިވެނިކުރާނަމަ ވަލީދޭން ބޭބެގާތުގައި ބުނާނެ ކަމަށެވެ.    
ރަންކީއެވެ. ކައިވެނިކުރެވުނީއެވެ. ކައިވެންޏަށް 23 އަހަރު ވެއްޖެއެވެ. ދަރިން ފުންޏެއް ލިބިއްޖެއެވެ. ހަމަގައިމުވެސް ދެމީހުން ދުވަހަކުވެސް އެކަކު އަނެކަކަށް ރުޅިމޫނެއް ނުދައްކަމުއެވެ. ޒުވާބެއް ނުކުރަމުއެވެ. އަޅުގަނޑުމެންގެ ގެ އެޅުމުގައިވެސް އެންމެ ބޮޑު ޒިންމާއެއް ނެގީ ފިރިމީހާއެވެ.  
މިއަދުނޫހުގެ ކިޔުންތެރިންގެ ގާތުގައި ބުނެލަން އޮތީ ފިނޑިކަމަށްވިޔަސް، ކަޓްކަމަށްވިޔަސް ތުންފުންސަކަށް ނުވީމާ ކުރާ ފައިދާ މާބޮޑުކަން އަޅުގަނޑަށް މިވަނީ ތަޖުރިބާ ކުރެވިފައެވެ. އިތުރަށް އެއްޗެއް ބުނާކަށް ނެތީމެވެ.  
- ނާޝިދާ / މިއަދުނޫހުގެ ކިޔުންތެރިއެއް