ށ. ފުނަދޫ ދައްފަޅުގައި ޓޫރިސްޓް ހޮޓަލަކާއެކު އީކޯ ޕާކެއް ތަރައްޤީ ކުރުމަށް އެރަށު ކައުންސިލުން ނިންމައިފިއެވެ.
ފުނަދޫ ކައުންސިލުން މިހާރުވަނީ ދައްފަޅުގައި ޓޫރިސްޓް ހޮޓަލަކާއި އީކޯ ޕާކެއް ތަރައްޤީކުރުމަށް ސަރވޭއާ ޑިޒައިން ކުރާނެ ފަރާތެއް ހޯދުމަށް އިޢުލާންކޮށްފައެވެ.
ށ.ފުނަދޫގައި އޮންނަ ދައްފަޅަކީ ގުދުރަތީ ގޮތުން ވަރަށް ޚާއްޞަ މުއްސަނދިކަމެއް ލިބިފައިވާ ފަޅެކެވެ. ކޯރެއް ގޮތަށް އުފެދިފައިވާ، މި ފަޅަށް ފްލެމިންގޯ ފަދަ މޫސުމީ ދޫނިތައް ރާއްޖޭން ބޭރުން ހިޖުރަކުރެއެވެ. އަދި ހަމައެހެންމެ، މިފަޅުތެރޭގައި ބޮޑެތި ކަކުނި، މަޑް ކްރޭބް އާލާވެއެވެ. މި ފަޅުގެ ގުދުރަތީ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް އިސްކަންދީގެން މި ފަޅު ހިމެނޭ ސަރަޙައްދަކީ އީކޯ ޓޫރިޒަމް ތަރައްޤީ ކުރުމަށް އޮތް ވަރަށް ރަނގަޅު ފުރުސަތެއްގެގޮތުގައި ކައުންސިލުން ދެކެއެވެ.
މިމަޝްރޫޢުގައި ހިމެނޭ އީކޯ ޕާކުގައި ޓޫރިސްޓް ހޮޓަލެއް ތަރައްޤީ ކުރެވޭއިރު ތަފާތު މޫދު ކުޅިވަރުތައް ކުޅުމާއި، އަދި މި ތަނަށް އަންނަ ފްލެމިންގޯ ފަދަ ދޫނިތައް ބަލާނެ ޕްލެޓްފޯމަކާއި ބޮޑެތި ކަކުނިތައް (މަޑް ކްރޭބް)އާލާ ކުރާނެ މަރުކަޒުތަކާއި ފްލޯޓިން ރެސްޓޯރެންޓެއް ވެސް ހިމެނޭނެއެވެ.
ކައުންސިލުގެ އުއްމީދަކީ މިތަނަށް އަންނަ މީހުންނަށް ރޭގަނޑުގެ ހިތްގައިމު މަންޒަރު ބަލާލެވޭނެ ތަނަކަށް ވެގެންދިޔުމެވެ.
މިމަޝްރޫޢު މިގޮތަށް ފަރުމާ ކުރުމުގެ އެންމެ މުހިންމު ބޭނުމަކީ އިޤްތިޞާދީ ނަފާ ހޯދުމުގައި ގުދުރަތީ މުއްސަނދިކަން ރައްކާތެރި ކުރެވި، ހިމާޔަތްކުރެވި ދެމެހެއްޓެނިވި ގޮތުގައި މި ސަރަޙައްދު ބޭނުންކުރެވޭނެ ގޮތަށް، ރަނގަޅަށް ފަރުމާ ކުރެވި، ތަރައްޤީ ކުރެވުންކަމަށް ކައުންސިލުން ބުނެއެވެ.
ފުނަދޫ ކައުންސިލުން މިހާރުވަނީ މި މަސައްކަތުގެ ސަރވޭކުރުމާއެކު ޑިޒައިން ކުރާނެ ފަރާތެއް ހޯދުމަށް އިޢުލާންކޮށްފައެވެ. މި މަސައްކަތް ކޮށްދޭން ޝައުޤުވެރިވާ ފަރާތްތަކުން 19 ނޮވެމްބަރ 2024ވާ އަންގާރަ ދުވަހުގެ 13:00 ގެ ކުރިން ކައުންސިލް އިދާރާގެ މެއިލް [email protected] މެއިލްކުރުމަށްފަހު، 24 ނޮވެމްބަރ 2024 ވާ އާދިއްތަ ދުވަހުގެ 13:00 އަށް އެއިދާރާއަށް އަގު ހުށަހެޅުމުގެ ފުރުސަތުވަނީ ހުޅުވާލާފައެވެ.
ފުނަދޫ ކައުންސިލުން ބުނީ މިމަސައްކަތް ބަޔަކާއި ހަވާލުކުރަނީ ކޮންޓްރެކްޓްގައި ސޮއިކުރާ ތާރީޚުން ފެށިގެން 6 މަސް ދުވަހުގެ ތެރޭގައި މި މަސައްކަތް ނިންމަންޖެހޭގޮތަށްކަމަށެވެ.