އަޅުގަނޑުމެންގެ ގޭގައި ހުންނަނީ އެންމެ ޓީވީއެކެވެ. ގޭގައި އުޅެނީ ވިސްނުން ތަފާތު ބައެކެވެ. އެއްބައަކު ބަލަން ބޭނުންވަނީ މުސްލިމުން ބެލުން ހުއްދަ، އަދި ބެލުމުން ތިމާގެ ދީންވެރިކަމަށް ފައިދާކުރާނެ ޗެނެލްތަކެވެ. އަނެއް ބައަކު ބަލަންބޭނުންވަނީ ރޮކް މިޔުޒިކާއި ލަވައާއި ނެށުންތައް ދައްކާ ޗެނެލްތަކެވެ. އެހެންވެ އަބަދުވެސް އޮންނަނީ ރިމޯޓަށް ބާރުބޮޑުވެފައެވެ.  
މީޙާލަތުގަ ޙައްލަކީ ކޮބައިތޯ؟  
ކިޔުންތެރިޔާގެ ސުވާލުގެ ޖަވާބަކަށް ތިރީގައިވާ ލިޔުންކޮޅު ވިދާޅުވެލައްވާށެވެ! ތިއަބާވަތުގެ ކޮންމެ ކަމަކަށްވެސް ޙަޤީޤީ ޙައްލެއް ލިބެން އޮތީ އިސްލާމް ދީނަށް ތަބަޢަވެގެންކަން އެނގިލައްވާނެއެވެ. އިން ޝާ ﷲ 
"ހުރިހާ ކަމެއްގެ ވެސް ޙައްލު އޮތީ އިސްލާމް ދީނަށް ތަބަޢަވެގެންނެވެ! އިސްލާމީ އުޞޫލުތަކަށް ޢަމަލުކޮށްގެންނެވެ! އެގޮތް ދޫކޮށްލައި ތިމާމެންނަށް ފެންނަ އަމިއްލަ ގޮތްތަކެއް ހަދައިގެން ދުވަހަކުވެސް ކާމިޔާބެއް ނުވާނެއެވެ!  
ރުހޭ ބައަކު ރުހި، ރުޅި އަންނަ ބައަކު ރުޅި އައިނަމަވެސް ޙަޤީޤަތަކީ މިއީއެވެ. 
ގެއަށް ގެނައި 2 މެޓައެވެ. އެއް މެޓާ އޮތީ ކަރުދާހުގައި ރަނގަޅަށް ބަންދުކޮށްފައެވެ. އަނެއް މެޓާއޮތީ ކަރުދާހުން ނަގައި އެއްވެސް ކަރުދާހެއް ނެތިއެވެ. އަވަހަށް ހިނިއަރާނީ ކޮން މެޓައަކަށް ހެއްޔެވެ؟"
- ޑރ. މުޙައްމަދު އިޔާޟް ޢަބްދުއްލަޠީފް  
ކަރުދާސް ނެތް މެޓައަށް އަވަހަށް ހިނިއަރާނެކަމުގެ މިސާލު ޑރ. އިޔާޟް ގެންނަވާފައި އެވަނީ ކިޔުންތެރިޔާ ފާހަގަކުރައްވާފައިވާ ދެވަނަ ފިކުރުގެ މީހުން ބަލަން ބޭނުންވާ ޗެނެލްތައް ބެލުމުން ފަސޭހައިން ޢަޤީދާ ބަލިކަށިވެ އީމާންކަން ކުޑަވެ ޝައިޠޯނާގެ ކޮޅަށް ލެނބެވުން ފަސޭހަވެގެންދާނެކަން ފާހަގަކުރެއްވުމަށާއި،   
އަދި އަންހެނުން އެކަނބަލުންގެ އަޢުރަ ނިވާކުރަންޖެހޭ ވަރަށް ނިވާ ނުކުރާނަމަ ގޯނާތައް ފަސޭހައިން އަމާޒުވަމުންދާނެކަމާއި އެފަދަ ކަންކަން ބެލުމުން ފާޙިޝް ޢަމަލުތައް ކުރަން ބޭނުންވެވޭނެކަން ފާހަގަކުރެއްވުމަށް ކަމަށްވެސް ބެލެވެއެވެ. މިކަންކަން މުސްލިމް ނޫން ޤައުމުތަކުގައިވެސް މިހާރު ޤަބޫލުކުރެއެވެ. ނިވާކަން ކުޑަ ހެދުންލައިގެން ޢާންމުތަންތަނުގައި އުޅުން އަންނަނީ މަދުކުރަމުންނެވެ. ބަރަހަނާ ބެލުމަށް އަންނަނީ ތަރްޙީބް ކުޑަވަމުންނެވެ. ހަމަ ލޮލުން ބެލިނަމަވެސް ޓީވީއަކުން ބެލިނަމަވެސް ފޯނަކުން ބެލިނަމަވެސް ހިތަށް އަސަރުކުރާނެއެވެ.
އެއްވެސް ޝައްކެއްނެތެވެ.  ހަކުރު އެއްޗެއްގައި މަތިނުޖަހާނަމަ ފަސޭހައިން ހިނިއަރާނެއެވެ. މަތި ނުޖަހާ ބަހައްޓާފައި ހުއްޓާ ހިނި އެރުމުން ޝަކުވާކުރުމުގެ ބަދަލުގައި މަތިޖަހައި ރައްކާކުރުމުގެ މުހިންމުކަން އެންމެންނަށްވެސް އެނގޭނެއެވެ. ނަމަވެސް ޝައިޠޯނާގެ ފަޅިއަށް ޖެހެވުމުން ޢަމަލުނުކުރެވެނީއެވެ.