ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގެ މި އަހަރުގެ މުބާރާތް، ހިއުންޑާއި ގޯލްޑަން ފުޓްސަލް ޗެލެންޖު 2026 ގެ ގަދަ 16 ބުރުން ބ. އޭދަފުށިން ޖާގައެއް ޔަގީންކޮށްފި އެވެ.
މި ފަހަރުގެ ގޯލްޑަން ފުޓްސަލް ޗެލެންޖު ފަށަަން ކުޅުނު ޗެރިޓީ ޝީލްޑް މެޗުން ވެސް މޮޅުވި، އޭދަފުށިން ގަދަ 16 ޔަގީންކުރީ ފުރަތަމަ ކުޅުނު ދެ މެޗުން ވެސް މޮޅުވެގެންނެވެ. އެ ގޮތުން، ފުރަތަމަ މެޗުގައި ކ. މާފުށި އަތުން މޮޅުވިއިރު، ރޭ ކުރެންދޫ އަތުން ވެސް މޮޅުވީ 1-0 އިންނެވެ.
އޭދަފުށްޓަށް ރޭގެ މެޗުގައި ލިބުނު ޕެނަލްޓީއަކުން ލަނޑު ޖަހައިދިނީ، އަލީ ނަސީމް (ދިއްލި) އެވެ. ގައުމީ ފުޓްސަލް ޓީމާ އެކު ސާފް ފުޓްސަލް ޗެމްޕިއަންޝިޕް ކާމިޔާބުކޮށްފައި އައިސް ޓީމާ ގުޅުނު، އިޝާން އިބްރާހިމް (ސައްޓު) އަށް ކުރި ފައުލަކަށް ވީޑިއޯ ސަޕޯޓް އިން ބަލާފައި ދިން ޕެނަލްޓީ ދިއްލި ވަނީ ކާމިޔާބުކޮށްފަ އެވެ.
ޒޯން ތިނެއްގެ ފައިނަލުން އޭދަފުށިން ޖާގަ ހޯދިއިރު، މި ޒޯނުގައި ރޭ މާފުށީ އަތުން، ކ. އަތޮޅުގެ ޗެމްޕިއަން، ގާފަރު 3-0 އިން މޮޅުވެ، އަމިއްލަ ބާރު ދެމެހެއްޓި އެވެ. އެ ގޮތުން، ޝަނާން ރަޝާދުގެ ދެ ގޯލާއި އަޒްޔާން އިބްރާހިމްގެ ގޯލުން ގާފަރު މޮޅުވެ، ދެ މެޗުން ހަތަރު ޕޮއިންޓް ހޯދިއިރު، ފަހު މެޗުގައި ކުޅޭނީ އޭދަފުށްޓާ އެވެ. އެ މެޗުން ބަލިނުވެ ފަރުޖައްސާލައިގެން ވެސް ގާފަރަށް ގަދަ 16 ޔަގީންކުރެވޭނެ އެވެ.
ރޭ ޒޯން ހައެއްގައި ތ. ތިމަރަފުށިން ވަނީ އެ އަތޮޅު ކިނބިދޫގެ 3-0 އިން ބަލިކޮށްފަ އެވެ. އަދި އެ ޒޯނުގެ އަނެއް މެޗުން އިސްދޫ ވަނީ 2-1 އިން ގަން އަތުން މޮޅުވެފަ އެވެ. މި ގްރޫޕްގައި ތިމަރަފުށްޓާއި އިސްދޫ އަށް ހަތަރު ޕޮއިންޓް ލިބިފައިވާއިރު، ކިނބިދޫ އާއި ގަމުގެ އޮތީ އެއް ޕޮއިންޓެވެ. މި ގްރޫޕްގެ ހަތަރު ޓީމަށް ވެސް ގަދަ 16 ގެ ފުރުސަތު އެބައޮތެވެ. ފަހު މެޗުތަކުގައި، އިސްދޫން ކުޅޭނީ ތިމަރަފުއްޓާ އެވެ. އެ މެޗު އެއްވަރުވެއްޖެނަމަ، އެ ދެ ޓީމު ޒޯން ފައިނަލަށް ދާނެ އެވެ.
ގަމުން ރޭގެ މެޗަށް ގައުމީ ފުޓްސަލް ޓީމުގެ އަބްދުﷲ ޖުނައިދު (ޖޭއްނެ) އާއި ހުސައިން ޝަރީފް (އޮންލީ) ހިމަނައިގެން ނުުކުތް ނަމަވެސް އިސްދޫން އަލީ ހުމޭޒުގެ ލަނޑުން ލީޑުނެގި އެވެ. އަހުމަދު ހަލީމް (އައްމަޑޭ) ގަމަށް އެއްވަރުކޮށްދިންތާ އިރުކޮޅެއްގެ ތެރޭގައި، އަހުމަދު އަފްސަމް ވަނީ އިސްދޫ މޮޅުކޮށްދިން ލަނޑު ޖަހައިފަ އެވެ. ތިމަރަފުށިން ރޭގެ މެޗު ކާމިޔާބުކުރީ، އިސްމާއިލް މުނީޒް، އަބްދުﷲ ޒިޔާން އަދި ކިނބިދޫގެ އިބްރާހިމް އިމްރާހު (އިންމެ) އަތުން ބައިކޮޅަށް ވަން ގޯލުންނެވެ.
ރޭ ކުޅުނު ޒޯން، 8، މާލޭ ޒޯންގެ މެޗުތަކަށް ބަަލާއިރު، ފުރަތަމަ މެޗުތަކުން ބަލިވި، މާފަންނާއި އެންމެ ފަހުގެ ޗެމްޕިއަން، ވިލިމާލޭން ވަނީ ފުރަތަމަ މޮޅު ހޯދައި ޒޯން ފޯރިގަދަ ކޮށްލައިފަ އެވެ. ވިލިމާލޭން ވަނީ 2-0 އިން ހުޅުމާލެ ބަލިކޮށްފަ އެވެ. އަދި، މާފަންނުން މައްޗަންގޯޅި އަތުން މޮޅުވީ 3-1 އިންނެވެ.
ގައުމީ ފުޓްސަލް ޓީމުގެ އަލީ ޝިޔާހް (ޝިޔާ)ގެ ކެޕްޓަން ކަމުގައި ކުޅުނު ވިލިމާލޭން މެޗުން މޮޅުވީ ކޮންމެ ހާފެއްގައި ލަނޑެއް ޖަހައިގެންނެވެ. އެ ގޮތުން، ވިލިމާލޭގެ ފުރަތަމަ ލަނޑު، އަހުމަދު ބައްސާމް މުހައްމަދު ނައީމް (ބައްކު) ޖެހިއިރު، ދެ ވަނަ ހާފުގައި އެ ޓީމަށް ތިން ޕޮއިންޓް ޔަގީންކޮށްދިން ލަނޑު ޖެހީ އިސްމާއީލް ވަޖީހު (ވައްޖެ) އެވެ.
ގައުމީ ފުޓްސަލް ޓީމުގެ ހުސައިން ސުހައިލް (ސޮކޭ)ގެ ލަނޑާ އެކު މާފަންނުން ރޭގެ މެޗުން މޮޅުވިއިރު، އެ ޓީމުގެ އަނެއް ދެ ލަނޑު ޖެހީ މުހައްމަދު ޔަފާއު (ޔާ) އަދި، މައްޗަންގޯޅީގެ ލަނޑު ޖެހީ، އަހުމަދު ހުސައިންް އެވެ.
ރޭ، ދެން ކުޅުނީ ޒޯން ފަހެއްގެ މެޗެކެވެ. ތިން އަތޮޅުގެ ޗެމްޕިއަނުން ވާދަކުރާ މި ޒޯނުގައި، މ. އަތޮޅު ޗެމްޕިއަން، ދިއްގަރު އަތުން ދ. އަތޮޅުގެ ގަދަބާރު، ކުޑަހުވަދޫ މޮޅުވީ 4-2 އިންނެެވެ. ފުރަތަމަ މިނިޓްގައި އިސްމާއިލް ޒަޔާން ވަނީ ދިއްގަރަށް ލީޑުނަގައިދީފަ އެވެ. މުހައްމަދު އަރީޝްގެ ގޯލުން ކުޑަހުވަދޫން އެއްވަރުކޮށް، ހާރޫން އިބްރާހިމް (ހާންޑޯ)ގެ ގޯލުން ލީޑުނެގިއިރު، ސުލަަައިމާން އިސްމާއިލްގެ ގޯލުން ދިއްގަރުން އެއްވަރުކޮށްފައިވަނިކޮށް، ކުޑަހުވަދޫ މޮޅުވީ، ޝައުކަތު އަމީން އާއި ޖުމައިމް ޖަމީލްގެ ލަނޑުތަކުންނެވެ.
ގޯލްޑަން ފުޓްސަލް ޗެލެންޖުގައި މިއަދާއި މިރޭ ކުޅޭ މެޗުތައް
16:00: ޒޯން 1: ހދ. ނޮޅިވަރަންފަރު - ހދ. ނައިވާދޫ
16:00 ޒޯން 1: ހއ. ކެލާ - ހއ. މާރަންދޫ
17:00:4 ޒޯން 4: އއ. މަތިވެރި - އދ. އޮމަދޫ
17:00 ޒޯން 4: އދ. މަހިބަދޫ - ވ. ކެޔޮދޫ
20:00 ޒޯން 2: ނ. މާޅެންދޫ - ށ. ފޯކައިދޫ
20:00 ޒޯން 2: ރ. ދުވާފަރު - ށ. ކަނޑިތީމު
22:00 ޒޯން 7: ގދ. ވާދޫ - ޏ. ދަޑިމަގު
22:00 ޒޯން 7: ގދ. ކަނޑުހުޅުދޫ - ސ. ހިތަދޫ
23:00 ޒޯން 7: ސ. މަރަދޫ - ގދ. ހޯޑެއްދޫ