ބިދޭސީ މުވައްޒަފުން މަސައްކަތްތަކަށް ސައިޓު ރަޖިސްޓްރީ ކުރުމަށް ހުށަހަޅާ ވޯކް ސައިޓު ޑިކްލަރޭޝަން ފޯމު ހުށަހެޅުމަށް ދިން މުއްދަތު ހޯމް މިނިސްޓްރީން މިއަދު އިތުރުކޮށްދީފިއެވެ. މިދިޔަ މަހު 31ގައި ވަނީ، ބިދޭސީންނަށް ދާއިމީ ކޯޓާ ދޭ އުސޫލަށް ބަދަލު ގެނެސްފައެވެ. އެ އުސޫލުގެ ދަށުން، އޭރު ވޯކް ސައިޓު ޑިކްލަރޭޝަން ފޯމު ހުށަހަޅަން ހުށަހަޅަން ފުރުސަތު ދިނީ، މި މަހު 31ގެ ކުރިންނެވެ. އެ މުއްދަތުގެ ކުރިން، ފޯމު ހުށަނާޅާ ފަރާތްތަކުގެ ސައިޓުތައް ސަސްޕެންޑު ކުރާނެ ކަމަށް އޭރު މިނިސްޓްރީން ވަނީ ބުނެފައެވެ. ބިދޭސީ މަސައްކަތްތެރިއަކު ސައިޓެއްގައި މަސައްކަތް ކުރަނީ --- ސަން ފޮޓޯ/ ފަޔާޒު މޫސާ އޭގެފަހުން، މިއަދު އެ މިނިސްޓްރީން ނެރުނު ބަޔާނެއްގައި ވަނީ، ކޯޓާ ދޫކުރާ މަސައްކަތްތަކަށް ސައިޓު ރަޖިސްޓްރީ ކުރުމަށް ހުށަހަޅަން ޖެހޭ ލިޔުންތަކާއި ނޯޓަރައިޒް ކޮށްފައިވާ ވޯކް ސައިޓު ޑިކްލަރޭޝަން ފޯމާއި އިޤްރާރު ހުށަހެޅުމަށް ދީފައިވާ މުއްދަތު އިތުރުކޮށްދިނުމަށް ވަޒީފާ ދޭ ގިނަ ފަރާތްތަކުން އެދެމުން އަންނަ ކަމަށެވެ. އެހެންވެ، އެ ލިޔުންތައް ހޯދުމަށް ހުށަހަޅަން ޖެހޭ މުއްދަތު އަަންނަ ޖޫން މަހު އެކަކަށް އިތުރުކޮށްދީފައިވާ ކަމަށް ހޯމް މިނިސްޓްރީން ވަނީ ބުނެފައެވެ. https://sun.mv/216112 އެ މުއްދަތުގެ ކުރިން، "ވޯކް ސައިޓް ޑިކްލަރޭޝަން ފޯމާއި އިޤްރާރާއި ރަޖިސްޓަރީކޮށްފައިވާ ސައިޓުގެ "ޑޮކިއުމަންޓް އަޕްޑޭޓް ރިކުއެސްޓް" ނުވަތަ "ސައިޓް ޕަރމިޓް އަޕްޑޭޓް" މެދުވެރިކޮށް ހުށަހެޅުމަށް އެ މިނިސްޓްރީން ވަނީ އިލްތިމާސްކޮށްފައެވެ. ރާއްޖޭގައި މަސައްކަތް ކުރާ ބިދޭސީން ގަވާއިދަށް ފެއްތުމަށްޓަކައި ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އަދި ގަވާއިދާ ހިލާފަށް މަސައްކަތް ކުރާ ބިދޭސީންނާ މެދު ފިޔަވަޅު އެޅުމަށް ވެސް ގިނަ މަސައްކަތްތަކެއް އަންނަނީ ކުރަމުންނެވެ.