މޯލްޑިވްސް އެއާޕޯޓްސް ލިމިޓެޑް ކޮމްޕެނީ (އެމްއޭސީއެލް)އިން ތ. ވިލުފުށީ އެއާޕޯޓް އެޅުމަށް ހިއްކަން ޖެހޭ ބިމުގެ 80 ޕަސެންޓް ބިން ހިއްކައި ނިންމައިފިއެވެ. ވިލުފުށީ އެއާޕޯޓް ތަރައްގީކޮށް އޮޕަރޭޓް ކުރުމަށް ފިނޭންސް މިނިސްޓްރީއާއި އެމްއޭސީއެލްއާ ދެމެދު އެއްބަސްވުމުގައި ސޮއިކުރީ މިދިޔަ ސެޕްޓެންބަރު މަހުގެ 24ގައެވެ. އެ މަޝްރޫއުގެ އަމަލީ މަސައްކަތް އެ ދުވަހު ފެށިއެވެ. އެމްއޭސީއެލްއިން މިއަދު ބުނި ގޮތުގައި، އެ މަޝްރޫއަށް ބިން ހިއްކުމުގެ މަސައްކަތް ފެށީ ނޮވެންބަރު 14 ވަނަ ދުވަހެވެ. އެ މަޝްރޫއަށް ހިއްކަން ޖެހޭ 81 ހެކްޓަރުގެ ބިމުގެ ތެރެއިން، މިހާތަނަށް 65 ހެކްޓަރުގެ ބިން ހިއްކައިފައިވާ ކަމަށް އެ ކުންފުނިން ބުންޏެވެ. އެއީ 80 ޕަސެންޓް މަސައްކަތް ނިމުން ކަމަށް އެމްއޭސީއެލްއިން ފާހަގަކުރިއެވެ. ވިލުފުށީ އެއާޕޯޓަށް ބިން ހިއްކުން: ވިލުފުށީ އެއާޕޯޓަށް 80 ޕަސެންޓް ބިން ހިއްކައި ވަނީ ނިންމައިފައި -- ފޮޓޯ/ އެމްއޭސީއެލް އެ ކުންފުނިން ބުނި ގޮތުގައި ބިން ހިއްކުމުގެ މަސައްކަތް ކުރިއަށްގެންދަނީ އެ ކުންފުނިން ގެނެސްފައިވާ ފިލިޕޯ ބްރުނެލެޝީ ޑްރެޖަރުންނެވެ. އަދި އެ މަސައްކަތް ޝެޑިއުލްއާ އެއްގޮތަށް ކުރިއަށްދާ ކަމަށް ވެސް އެމްއޭސީއެލްއިން ފާހަގަކުރިއެވެ. އެމްއޭސީއެލްއިން ބުނި ގޮތުގައި މި މަޝްރޫއުގެ ދަށުން ވިލުފުށި އެއާޕޯޓް ތަރައްގީކުރާނީ 1,800 މީޓަރު ދިގު ރަންވޭއަކާއި ފުރިހަމަ ޓާމިނަލްއަކާއި އެއާޕޯޓަކަށް ބޭނުންވާ ހުރިހާ ވަސީލަތްތަކާ އެކުއެވެ. https://sun.mv/211748 އެ މަަސައްކަތް ފައްޓަވައިދެއްވުމަށް ވިލުފުއްޓަށް ވަޑައިގެން ރައީސް ޑރ. މުހައްމަދު މުއިއްޒު ވަނީ، ވިލިފުއްޓަށް އެ މަނިކުފާނު ވީ އެންމެ މުހިއްމު ވައުދަކީ އެއަޕޯޓްގެ މަޝްރޫއު ކަމަށް ވިދާޅުވެފައެވެ. އެ މަޝްރޫއު ގިނަވަގެން 30 މަސް ދުވަހުގެ ތެރޭގައި ނިންމަވާނެ ކަމަށް ރައީސް ވިދާޅުވިއެވެ. ތ. އަތޮޅުގައި މިހާރު ވެސް އަންނަނީ އެއާޕޯޓެއް ހިންގަމުންނެވެ. އެއީ، ކުރީގެ ރައީސް މުޙައްމަދު ނަޝީދުގެ ވެރިކަމުގައި އެ އަތޮޅު ތިމަރަފުށީގައި ހެދި އެއާޕޯޓެކެވެ. ނަމަވެސް އިގުތިސާދީ ހަރަކާތްތައް މަދުކަމާއެކު އެ އެއާޕޯޓަށް އެހާ ޑިމާންޑް ބޮޑެއް ނޫނެވެ.