އެތައް ބިލިއަން ޑޮލަރެއްގެ 1މެލޭޝިއާ ޑިވެލޮޕްމަންޓް ބަރުހާދު (1އެމްޑީބީ) ކުންފުނީގެ ހިޔާނާތާ ގުޅުންހުރި އިތުރު ކުރެހުންތައް ހޯދާނެ ކަމަށް މެލޭޝިޔާގެ އެންޓި-ކޮރަޕްޝަން ކޮމިޝަނުން (އެމްއޭސީސީ)ން އިއްޔެ ބުނެފި އެވެ.
އެ ތަނުން މިހެން ބުނެފައިވަނީ އެ ހިޔާނާތުގެ ފައިސާއިން ގަނެފައިވާ ހަތަރު ކުރެހުމެއް އަނބުރާ ހޯދުމަށް ފަހު، އެ ކޮމިޝަނުގެ މައި އިދާރާގައި އެ ތަކެތި ދައްކާލުމަށް މިއަދު ބޭއްވި ރަސްމިއްޔާތެއްގަ އެވެ.
އެ ކޮމިޝަނުން ބުނި ގޮތުގައި، މިދިޔަ މަހު ހޯދި މި ކުރެހުންތަކުގެ ތެރޭގައި 1961 ވަނަ އަހަރުގެ ޕަބްލޯ ޕިކާސޯގެ ކުރެހުމެއް ވެސް ހިމެނެ އެވެ. މިއީ 2009 އާއި 2014އާ ދެމެދު މެލޭޝިޔާގެ ދައުލަތުގެ ފަންޑުން ގައިރު ގާނޫނީ ގޮތެއްގައި ބޭރުކޮށްފައިވާ 4.5 ބިލިއަން ޑޮލަރަށް ވުރެ ގިނަ ފައިސާގެ ތެރެއިން ހޯދިފައިވާ މުދަލެވެ.
އެމްއޭސީސީގެ ވެރިޔާ އާޒަމް ބާކީ ވިދާޅުވި ގޮތުގައި، މި ކުރެހުންތަކަކީ ހަމައެކަނި މާލީ ގޮތުން އަގުބޮޑު އެއްޗެއް ނޫނެވެ. އޭގެ ބަދަލުގައި މިއީ އެ ގައުމުގައި ހިނގި އެންމެ ބޮޑު ކޮރަޕްޝަންގެ ޖަރީމާ ރަމްޒުކޮށްދޭ ތާރީހީ ނިޝާންތަކެކެވެ.
ގާތްގަނޑަކަށް 198,000 ޑޮލަރުގެ އަގުހުރި މި ކުރެހުންތަކުގެ ތެރޭގައި ޖޯން މިރޯ، މައުރިސް އުޓްރިލޯ އަދި ބަލްތަސް ފަދަ މަޝްހޫރު ފަންނާނުންގެ މަސައްކަތްތައް ހިމެނެ އެވެ.
ކަމާބެހޭ އޮފިޝަލުން ވިދާޅުވާ ގޮތުގައި، މި ކުރެހުންތައް ނީލަން ކިޔުމުގެ ކުރިން މެލޭޝިއާގެ ނޭޝަނަލް އާޓް ގެލެރީގައި ދައްކާލުމަށް ވަނީ ރޭވިފަ އެވެ. ނަމަވެސް މިކަން ކުރެވޭނީ އެ ގައުމުގެ ފިނޭންސް މިނިސްޓްރީގެ ހުއްދަ ލިބިގެންނެވެ.
އާޒަމް ވިދާޅުވީ، މި ހިޔާނާތާ ގުޅުންހުރި 12 ކުރެހުމެއް މިހާތަނަށް ދެނެގަނެވިފައިވާ ކަމަށާއި، އޭގެ ތެރެއިން 8 ކުރެހުމެއް އަދިވެސް ނުފެންނަ ކަމަށެވެ. 1އެމްޑީބީ މައްސަލައިގައި ގެއްލުނު މުދަލުގެ ގާތްގަނޑަކަށް %75 ނުވަތަ 31.3 ބިލިއަން ރިންގިޓް (7.9 ބިލިއަން ޑޮލަރު) މިހާތަނަށް މެލޭޝިޔާ އަށް އަނބުރާ ހޯދިފައިވާ ކަމަށްވެސް އޭނާ ވިދާޅުވިއެވެ.