ރާއްޖޭގެ ފަތުރުވެރިކަން އިޝްތިހާރު ކުރުމަށް އިނގިރޭސިވިލާތުގެ ލިވަޕޫލް ފުޓްބޯޅަ ކްލަބާ އެކު ވެފައިވާ އެއްބަސްވުމުގެ ދަށުން ރަސްމީކޮށް ކެމްޕޭނު ލޯންޗުކޮށް، އެ ކްލަބުގެ އެންފީލްޑް ސްޓޭޑިއަމްގައި ރާއްޖެ އިޝްތިހާރު ކުރަން މިއަދު ފަށައިފި އެވެ.
ވީ ކިހިނެއް؟ - ރާއްޖޭގެ ޓޫރިޒަމް ބްރޭންޑް، ވިޒިޓް މޯލްޑިވްސް އަކީ އެ ކްލަބުގެ ރަސްމީ ޓޫރިޒަމް މަންޒިލްގެ ގޮތުގައި ހަމަޖައްސައި އެކަން އިއުލާނު ކުރީ މިދިޔަ މަހުގެ 13 ވަނަ ދުވަހު އެވެ.
ތަފްސީލް - މި ކެމްޕޭނު މިރޭ ރަސްމީކޮށް ލޯންޗުކޮށްފައިވަނީ ލިވަޕޫލް އާއި އެވަޓަން ބައްދަލުކުރާ މެޗާ ދިމާކޮށެވެ. މިރޭގެ މެޗުގައި ސްޓޭޑިއަމްގެ ލެޑް ބޯޑުތަކުގައި ރާއްޖޭގެ ޓޫރިޒަމް ބްރޭންޑު އިޝްތިހާރު ކޮށްފައިވެ އެވެ.
މި ކެމްޕޭނު ރަސްމީކޮށް ލޯންޗުކުރުމަށް ރައީސް މުހައްމަދު މުއިއްޒުގެ އިތުރުން ރާއްޖޭގެ ޓޫރިޒަމް މިނިސްޓަރު ތޯރިގު އިބްރާހިމް އާއި ސްޕޯޓްސް މިނިސްޓަރު އަބްދުﷲ ރާފިއު އާއި އެމްއެމްޕީއާރުސީގެ މެނޭޖިން ޑިރެކްޓަރު އިބްރާހިމް ޝިއުރީ ވެސް ވަނީ ލިވަޕޫލަށް ވަޑައިގެންފަ އެވެ.
ލިވަޕޫލްއާ އެކު ވެފައިވާ އެއްބަސްވުމުގެ މުއްދަތަކީ 3 އަހަރެވެ.
ކެމްޕޭނު ލޯންޗުކުރުމާ އެކު:
ލިވަޕޫލްގެ އެންފީލްޑް ސްޓޭޑިއަމްގައި ކުޅޭ މެޗުތަކުގައި ލެޑް ބޯޑުތަކުން ރާއްޖޭގެ މަންޒަރުތައް ދައްކާލާނެ
މި ކެމްޕޭނުގެ މީޑިއާ ވެލިއު 17 މިލިއަން ޑޮލަރަށް ވުރެ މަތިވާނެ
އެމްއެމްޕީއާރުސީން މިހާރު ވަނީ ލިވަޕޫލްގައި އައުޓްޑޯ ކެމްޕޭނެއް ވެސް ފަށާފައި؛ 3 މަހުގެ މި ކެމްޕޭނުގެ ދަށުން 100އަށް ވުރެ ޓެކްސީގައި ރާއްޖޭގެ އިޝްތިހާރު ހަރުކޮށް، ލަންޑަނުގެ ބަސްތަކުގައި ރާއްޖޭގެ އިޝްތިހާރުތައް ހަރުކޮށްފައިވޭ
ލިވަޕޫލްގެ ސަޕޯޓަރުން ދުނިޔޭގެ އެކި ކަންކޮޅުތަކުގައި ތިބި އިރު އެމްއެމްޕީއާރުސީން ބުނީ މި ކެމްޕޭނާ އެކު ފަތުރުވެރިކަމުގެ އާމްދަނީގެ ގޮތުގައި އިތުރު 100 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭނެ އެވެ. އަދި ކެމްޕޭނުގެ ސަބަބުން ލައްކައަކަށް ވުރެ ގިނަ ފަތުރުވެރިން ރާއްޖެ ޒިޔާރަތް ކުރާނެ ކަމަށް ވެސް ވަނީ ލަފާކޮށްފަ އެވެ.
މި ކެމްޕޭނުގެ ދަށުން:
އެންފީލްޑް ސްޓޭޑިއަމްގައި ވިޒިޓް މޯލްޑިވްސްގެ ބްރޭންޑް ފެންނަން ހުންނާނެ
އެ ކްލަބުގެ ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ބްރޭންޑިން ޖަހައި ލިވަޕޫލްގެ ރަސްމީ ޕަބްލިކޭޝަންތަކުގައި ރާއްޖެ ޕްރޮމޯޓު ކުރާނެ
އެ ކްލަބާ ގުޅިގެން ޔޫރަޕުގެ މުހިއްމު މާކެޓުތަކުގެ ފަތުރުވެރިންނަށް އަމާޒުކޮށް ރާއްޖެ އިޝްތިހާރު ކުރާނެ
ލިވަޕޫލްގެ ސަޕޯޓަރުންގެ އަދަދަށް ބަލާއިރު އޭގެ ތެރެއިން %2 މީހުން ރާއްޖެ ޒިޔާރަތް ކުރި ނަމަވެސް މި ކެމްޕޭނުގެ ޓާގެޓު ހާސިލްވާނެ ކަމަށް އެމްއެމްޕީއާރުސީން މީގެ ކުރިން ބުނެފައިވެ އެވެ.
މި ކެމްޕޭނުގެ ދަށުން ލިވަޕޫލްގެ ފޭނުންގެ މެދުގައި ހޮވާލެވޭ ފަރާތަކަށް ރާއްޖޭގައި ފަސް ރޭ ޗުއްޓީ ހޭދަކުރުމުގެ ފުރުސަތު ދޭ ހާއްސަ ލަކީޑްރޯއެއް މިި މަހުގެ ނިޔަލަށް ކުރިއަށް ގެންދަން ވެސް ވަނީ ނިންމައިފަ އެވެ.