ނިމުނު ރައީސް އިބްރާހިމް މުހައްމަދު ސޯލިހު ސަރުކާރުގެ ފަސް އަހަރުތެރޭ ހއ. ހޯރަފުށި ދާއިރާއަކީ ބޮޑެތި ތަރައްގީގެ ޕްރޮޖެކްޓުތައް ހިންގާފައިވާ ދާއިރާއެކެވެ. އެގޮތުން ވައިގެ މަގުން ހޯރަފުށި ވެރިރަށާއި ގުޅުވާލި ހޯރަފުށީ އެއާޕޯޓް ޕްރޮޖެކްޓް ފާހަގަކޮށްލެވެ އެވެ. އަދި ހޯރަފުށީ މަގުތައް ޒަމާނީ ފެންވަރަށް ތަރައްގީކުރަން ފެށުނެވެ. ހޯރަފުށީ ހޮސްޕިޓަލްގެ މަސައްކަތް ބަޔަކާއި ހަވާލުކޮށް އަމަލީ މަސައްކަތް ފެށި އެވެ. ރަށުގައި އެޅި އެއާޕޯޓާއެކު ދާއިރާގެ އަދި މުޅި އުތުރުގެ އެތައް ބައެއްގެ ޖީބަށް ބުރަވެފައިއޮތް ތަކުލީފަށް ނިމުމެއް ގެނުވި އެވެ. ބިއްލޫރި ފުޅީގައި ފެން ބަންދުކުރާ "ބޮޓްލިން ޕްލާންޓު ފެކްޓްރީއެއް" ހަދަން މުޅިން އާ އިމާރާތެއް އިމާރާތްކޮށް އެތަނަށް ބޭނުންވާ ސާމާނު ހޯދައިދީ ފެނަކަ އަށް އެމަސައްކަތް އަމަލީ ގޮތުން ހިންގަން ހަވާލުކުރި އެވެ. ކުޑަކުދިންގެ އަދުލުގެ ގާނޫނުގެ ދަށުން ކުށުގެ ވެއްޓަށް ހުށަހެޅޭ ކުޑަކުދިން އަނބުރާ މުޖުތަމައަށް ނެރުމުގެ ކުރިން ފަރުވާ ދިނުމަށް ބޭތިއްބުމަށް ޖުވެނައިލް ޖަސްޓިސް ޔުނިޓް، ހާފްވޭ ހައުސް އެއް މުޅިން އަލަށް އިމާރާތްކޮށް ނިންމާ ދެއްކި އެވެ. މިފަދަ ކިތަންމެ ތަރައްގީގެ މަޝްރޫއުތަކެކެވެ. ހަމަ އެގޮތުން އެ ދާއިރާގައި ހިމެނޭ ތިން ރަށް ކަމަށްވާ އުލިގަމާއި ހޯރަފުއްޓާ ތުރާކުނުގައި ބާވެ ބޭނުންނުކުރެވޭ ފެންވަރުގެ އެތައް އިމާރާތެއް އާ ކުރުމުގެ މަސައްކަތާއި، ކުޅިވަރުކުޅެވޭނެ ތަންތަނާއި އައުޓް ޑޯ ޖިމްތައް ވަނީ ގާއިމުކޮށްފަ އެވެ. ތަރައްގީގެ މަޝްރޫއުތައް ހޯރަފުށި ދާއިރާގައި ހިންގާލެއް ގިނަވެ އެއިރު ރައްޔިތުން މަޖިލީހުގެ ބައެއް އެހެން ދާއިރާތަކުގެ މެންބަރުވެސް އެ ވާހަކަ ތަޅުމުގައި ދެއްކެވި އެވެ.ނިމުނު އެމްޑީޕީގެ ސަރުކާރުގެ މެންބަރު ގޮތުގައި ހޯރަފުށި ދާއިރާ ތަމްސީލުކުރައްވަމުން ގެންދެވި އަހުމަދު ސަލީމް ވަނީ ނަވާރަ ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި މެންބަރުންނަށް ވާހަކަ ދެއްކެވުމަށް ދިން ފަހު ފުރުސަތުގައި އޭނާ ކުރެއްވި މަސައްކަތްތަކާ ގުޅޭގޮތުން ވާހަކަދައްކަވާފަ އެވެ.ސަލީމް ވިދާޅުވީ މެންބަރެއްގެ މައްޗަށް ކުރަން ލާޒިމުވާ ހުރިހާކަމެއް ވެސް ކުރީ ކުރެވުނު އެންމެ ފުރިހަމަކޮށް، ތެދުވެރިކަމާއި އިހުލާސްތެރިކަމާއެކު ކަމަށެވެ."ހަމަ ޔަގީނުން ވެސް ހާޒިރީއަށް ފަރުވާބަހައްޓަން އަޅުގަނޑު މަސައްކަތްކުރިން. ޔަގީނުން ވެސް ފަސް އަހަރު ތެރޭގައި އަމިއްލަ ކަމަކަށް އަޅުގަނޑު ޗުއްޓީއެއް ނުނަގަން. މަޖިލީހުގަ ނެތް ނަމަ އަޅުގަނޑު ހުންނާނީ ދާއިރާގެ މަސައްކަތުގެ ތެރޭގަ. ފަސް އަހަރު ތެރޭގަ ރައްޔިތުންނާ ގުޅޭ މަސައްކަތްތައް ކުރުމަށް 46 ފަހަރު އަޅުގަނޑު ދާއިރާއަށް ޒިޔާރާތްކުރިން،" ސަލީމް ވިދާޅުވި އެވެ.ފާއިތުވި ސަރުކާރުތަކުން ހޯރަފުށީގެ ތަރައްގީއަށް ގިނަ މަޝްރޫއުތަކެއް ކުރިއަށް ގެންދިޔަ ނަމަވެސް ރައީސް މުއިއްޒުގެ ސަރުކާރާއިއެކު ހޯރަފުށީ ދާއިރާގެ ތަރައްގީގެ ދުވެލި މަޑުވެއްޖެ ކަމުގެ އަޑު ވަނީ ގަދަވެފަ އެވެ.އެގޮތުން ހޯރަފުށީގެ އުމްރާނީ ތަރައްގީ މަޑުޖެހިއްޖެ ކަމަށް ބުނެ މިފަހުން ހޯރަފުށީ ކައުންސިލަރުން ވެސް ވަނީ ކަންބޮޑުވުން ފާޅުކޮށްފަ އެވެ. އެންމެފަހުން ރައީސް ޑރ. މުހައްމަދު މުއިއްޒު ހއ. އަތޮޅަށް ކުރެއްވި ދަތުރުގައި އެ އަތޮޅުގެ ބައެއް ރަށްތަކަށް އުފާވެރިކަމާއި އުންމީދު އާވެގެން ދިޔަ ނަމަވެސް ހޯރަފުށީގެ ރައްޔިތުންނަށް ލިބިގެން ދިޔައީ މާޔޫސްކަން ކަމަށް އެ ރަށުގެ ކައުންސިލުން ވެސް ވަނީ ބުނެފަ އެވެ. އެގޮތުން އިދިކޮޅު އެމްޑީޕީގެ ފުލް މެޖޯރިޓީ އޮތް ހޯރަފުށީ ކައުންސިލުން ނެރުނު ބަޔާނެއްގައި ވަނީ އެރަށުގެ ރައްޔިތުން އެންމެ އެދޭ ހިދުމަތްތަކާއި، އެންމެ ބޭނުންވާ ކަންކަން ފެށިގެން ދާނެކަމުގެ އުންމީދުގައި ތިބި ނަމަވެސް ރައީސް އެރަށް ވަޑައިގެން ދެއްކެވި ވާހަކައިގައި އެކަންކަން ފުރިހަމަ ގޮތެއްގައި ފާހަގަ ކުރައްވާފައި ނުވުމުން، ތަރައްގީގެ ރޭހުގައި ހއ. އަތޮޅުގެ ވާދަވެރި ރަށްތަކަށް އުފާވެރިކަމާއި އުންމީދު އާވެގެން ދިޔަ ނަމަވެސް ހޯރަފުށީގެ ރައްޔިތުންނަށް ލިބިގެން ދިޔައީ މާޔޫސް ކަމެއް ކަމެވެ.  ހޯރަފުށީގައި މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދެވަނަ ފިޔަވަހީގެ އަމަލީ މަސައްކަތް ފެށިފައިވީ ނަމަވެސް އެ މަސައްކަތައް ބޭނުންވާ ވަރަށް މުވައްޒަފުން ނެތުމުން އެ މަސައްކަތް ވެސް ދަނީ "ފިނިހަކަ ސްޕީޓް" އެވެ. އަދި ކުރީ ސަރުކާރުން ހޯރަފުށީގައި ގާއިމްކޮށްފައިވާ ޖުވެނައިލް ޖަސްޓިސް ޔުނިޓް، ހާފްވޭ ހައުސް ރަސްމީކޮށް މިފަހުން ހުޅުވި ނަމަވެސް އެތަނަށް ބޭނުންވާ މުއައްޒަފުން ނެގުން ވެސް އޮތީ "ވާނުވާ" އެވެ. އަދި މީގެ އިތުރުން މި ސަރުކާރުން ވެރިކަމާއި ހަވާލުވެ ފެނަކައިން ގިނަ އަދަދެއްގެ މުވައްޒަފުން ވަޒީފާއިން ވަކިކުރުމުގެ ސަބަބުން ގިނަ ބައެއްގެ ވަޒީފާ ވެސް ވަނީ ގެއްލިފަ އެވެ. މީގެ އިތުރުން ހޯރަފުށީ ދާއިރާ އިން ގިނަ ވަޒީފާ ތަކެއް އުފެދިގެންދާނެ ކުރީ ސަރުކާރުން ފެށި ހޮސްޕިޓަލްގެ މަސައްކަތް ނިންމާ މި ދައުރުގައި ވެސް ހުޅުވި ހިދުމަތް ދެވޭވަރުވުން އެއީ "ވުމަށް ވުރެއް ނުވުން" ގާތް ކަމެކެވެ. ސަބަބަކީ ހޮސްޕިޓަލްގެ މަސައްކަތް ވެސް"ފިނިހަކަ ސްޕީޓް" އަށްވުރެ ވެސް ދަށު ގައި ހުރުމެވެ. މީގެ އިތުރުން ހއ.ހޯރަފުށީ ފަޅު ހިއްކައިގެން ތެޔޮ ޓާމިނަލަކާއި ކޮންޓެއިނަރ ޓާމިނަލްގެ އިތުރުން ފްރީ ޒޯނު ތަރައްގީކުރުމުގެ މަޝްރޫއުގެ މަސައްކަތް ވެސް ވަނީ ނޭގުމެއްގައި އެވެ.މިފަހުން މި ސަރުކާރުން ރާއްޖޭގެ އެންމެ އުތުރުން، އިހަވަންދިއްޕޮޅުގައި ބަންކަރިންގެ ހިދުމަތް, ރަސްމީކޮށް ފެށި ނަމަވެސް އެކަމުން ދާއިރާގައި ވަޒީފާ އެއް ނުއުފެދުމުން އަދި ބަންކަރިންގެ މަސައްކަތް ހުއްޓިފައި އޮތުމުން އެކަމުގެ ކަން ބޮޑުވުން ގިނަ ބަޔަކު އަންނަނީ ކުރަމުން ނެވެ. އެގޮތުން ބައެއް މީޑިއާ ރިޕޯޓްތައް ބުނާ ގޮތުން "ބަންކަރިން ހިދުމަތުން ހޯރަފުއްޓަށް މިވަގުތައް ލިބުނު ވަޒީފާގެ އަދަދަކީ ސުމެއް..!" އެވެ. މީގެ އިތުރުން އާންމުކޮށް ބޭރުގެ ޔޮޓްތައް ބަނދަރުކުރާ ހއ. އުލިގަމުގައި ތަރައްގީކުރަން ހަމަޖެހިފައިވާ ޔޮޓް މެރީނާގެ މަސައްކަތް ވެސް އޮތީ ހުއްޓިފަ އެވެ. ތުރާކުނުން މި ސަރުކާރުން ފެށި އާ މަސްރޫއެއް ފެންނަން ނެތްއިރު ކުރީ ސަރުކާރުން ފެށި މަސައްކަތް ވެސް ދަނީ ލަސްލަހުން ލޯކަލް ކައުންސިލް އިންތިހާބުގެ ކެމްޕެއިންއާއި ދިމާލަށެވެ.އިތުރަށް ކިޔާލަން: އުލިގަމު ޔޮޓު މެރީނާ ފަށަން މި ސަރުކާރުން ކިޔާތާ އަހަރެއް، އަދި ހިލަމެއް ނެތް!މި ސަރުކާރަށް 19 މަސްވެ ފަސް އަހަރުގެ ދައުރު ނިމެން ދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ވައުދު ވުމަކީ ސަމާސާއަކަށް މި ސަރުކާރުގެ ބައެއް ވެރިން މިއަދު ހަދައިފި އެވެ. އަދި އިންތިހާބުވި މީހުން ގޮނޑިތަކުގައި ހަމަޖެހިލުމަށްފަހު ވައުދު ލިސްޓް ނަނގާލީ ޑަސްބިނަށެވެ. އަދި ބައެއް ވައުދަކީ މީހަކު ބުނެގެން މީހަކަށް ވީ ވައުދުކަމަށް ބުނެ ވެސް އެކަމުން އަންނަނީ ބޯދަމައިގަންނަމުން ނެވެ. އަދި ވައުދު ފުއްދަން ޖެހޭނީ އިންތިހާބުވި މީހާ ކަމަށް ބުނެ ސަރުކާރުގެ ވެރިން މިއަދު ރައްޔިތުންނަށް ފިއްލަވާއިފި އެވެ. ކައުންސިލް އިންތިހާބަށް އަލުން ނުފެންނާނެ ވާހަކައެއް ނޫނެވެ.ތެދެކެވެ، ހޯރަފުށި ދާއިރާގެ ތަރައްގީގެ ދުވެލި މަޑުވެއްޖެ ކަމުގެ އަޑު ގަދަވެއްޖެ އެވެ. މިއީ ސަރުކާރުގެ ސިޔާސީ ވަޒީފާއެއްގައި ހުރި "މަދު މީހަކު" ފިޔަވާ މުޅި ދާއިރާގެ ރައްޔިތުންގެ ދުލުން މިހާރު އިވޭ އަޑެވެ. ލިބޭ ޗުއްޓީއެއްގައި ވެސް ދާއިރާ އަށް އައުން މަދު މީހަކަށް ފަހަރުގައި ރައްޔިތުންގެ މި މި އަޑު ނުއިވި ދާނެ އެވެ.