އެކުވެރި އަރަބި އިމާރާތްތަކުގެ އަޖްމަންގެ ގެއެއްގައި ކަރަންޓު ދޮރެއް ލެއްޕެމުން ދިޔަ ވަގުތު އެ ދިރު ދޭތެރޭގައި 4 އަހަރުގެ ކުއްޖަކު ފިތިގެން މަރުވެއްޖެ އެވެ.
މިދިޔަ އަންގާރަ ދުވަހު ހިނގި މި ހާދިސާގައި، އެ ކުއްޖާގެ ބޮލުގެ ނާށިގަނޑު ވަނީ ފިތުމުގެ ސަބަބުން ފަޅައިގެން ގޮސްފަ އެވެ.
މި ދޮރަކީ، ސެންސަރުތަކެއް އެކުލެވިގެންވާ އޮޓޮމެޓިކް ދޮރެކެވެ. ނަމަވެސް، 4 އަހަރުގެ ކުއްޖާ ކުޑަ ވުމުގެ ސަބަބުން ސެންސަރުތަކަށް އެ ކުއްޖާ ޑިޓެކްޓް ކުރެވިފައި ނުވަނީ އެވެ.
މަރުވި ކުއްޖާގެ މަންމަ ބުނީ، އޭނާގެއިން ބޭރަށް ނިކުންނަން އައި ވަގުތު އޭނާގެ ތުއްތު ދަރިފުޅު އޭނާ ފަހަތުން އައި ކަން އެނގިފައި ނުވާ ކަމަށެވެ.
"އަހަރެން އެންމެ ފަހުން ގެއިން ނިކުންނަން ދިޔައީ. އެކަމަކު އަހަރެންނަކަށް ނޭނގުން ދަރިފުޅު ފަހަތުން އައި ކަމެއް. ދެން ދޮރަށް އޭނަ އައިކަން ޑިޓެކްޓް ނުކުރެވިގެން ލެއްޕުނީ." ކުއްޖާގެ މަންމަ ބުންޏެވެ.
މަންޒަރު ދުށް އަވަށްޓެރިއެއް ބުނީ، އެކުއްޖާގެ މަންމަ ދިޔަ މަންޒަރާއި، ކުއްޖާ ދޮރު ދޭތެރޭގައި ފިތިގެން ތާށިވި މަންޒަރު ފެނުނު ކަމަށާއި، ވަގުތުން ކުއްޖާގެ ސަލާމަތަށް ދޮރު ކައިރިއަށް ގޮސް ބެލި އިރުވެސް އެކުއްޖާ ވަނީ މަރުވެފައި ކަމަށެވެ.
މި މައްސަލައާ ގުޅިގެން، އަޖްމަންގެ ފުލުހުން ބުނީ، ޓެކްނޮލޮޖީގެ ގޮތުން ކުރިއަރާފައިވާ ދުވަސްވަރެއްގައި އުޅުނު ކަމުގައި ވިޔަސް ރައްކާތެރިކަމަށް ބަލަންޖެހޭނެ ކަމަށާއި، އަދި ވަކިން ޚާއްސަކޮށް ކުޑަކުދިންނަށް ރައްކާތެރިވާން ޖެހޭނެ ކަމަށެވެ.