އެހެން ދުވަސް ދުވަހު އެކުގައި ވާހަކަ ދައްކަމުން، ސަމާސާކުރަމުން ސްކޫލް ތެރެއަށް ވަންނަމުން ދިޔަސް މިއަދު ހިރިޔާ ސްކޫލް ދަރިވަރުންގެ އެ ހަރަކާތްތެރިކަމެއް ނެތެވެ. އުފާވެރިކަމެއް ނެތެވެ. މޫނު މަތިން ފެނުނީ މާޔޫސްކަމެވެ. ބެލެނިވެރިން ވެސް އެހެން ދުވަސް ދުވަހު ކުދިން ސްކޫލަށް ވެއްދުމަށް ފަހު، އެނބުރި ގެއަށް ދިޔަސް މިއަދު ބައެއް ބެލެނިވެރިން ތިބީ، ހުކުރުދުވަހުގެ ހިތާމަވެރި ހާދިސާއާ ގުޅިގެން، ގެއަށް ދާން ވެސް ނޭނގި ގަބުވެފަ އެވެ.
އެހެން ދުވަސްތަކެކޭ އެއްގޮތަށް މިއަދު ވެސް ހިރިޔާގެ ހަރަކާތްތައް ފެށީ އެސެމްބްލީންނެވެ. ނަމަވެސްގެ އެ އެސެމްބްލީ ތަފާތެވެ. އެހެން ދުވަސްދުވަހު ހޯލްތެރޭގައި ސްކޫލްގެ އިސް ވެރިންނާއި ޓީޗަރުން ތިއްބެވި ނަމަވެސް، އޭގެ ތެރެއަށް މިއަދު އިތުރުވެފައިވަނީ، ދިމާވެދާނެ ކޮންމެ ކަމަކަށް ތައްޔާރުވެ ތިބި މޯލްޑިވްސް ރެޑް ކްރެސެންޓްގެ ވޮލެންޓިއަރުންނާއި ހިލޭ ސާބަހަށް މަސައްކަތްކޮށް ދޭ ކައުންސެލަރުންނެވެ. ހޯލްގެ ބޭރުގައި އަވަސް ފަރުވާ ދޭނެ ސާމާނާއި ކުދިން އުފުލާނެ އަށިގަނޑުތައް ހުއްޓެވެ. މިއަދު ހިރިޔާ ސުކޫލްގައި ބޭއްވި އެސެމްބްލީ: ހިރިޔާގެ ގިނަ ކުދިންނަށް ވަރަށް ފުން ހިތާމަޔަކާއި އަސަރެއް ކުރި. -- ހަވީރު ފޮޓޯ: ނަސްރުﷲ ސޯލިހް
އެގޮތަށް ތައްޔާރުވެފައިވާކަން ރަނގަޅެވެ. އެސެމްބްލީގައި އެކި މީހުން ވާހަކަދައްކަން ފެށުމާ އެކު މުޅި ހޯލްތެރެ އިން އަޑުއިވުނީ ރުއިމާއި ގިސްލުމެވެ. ކަރުނައިން ފޯވެފައިވާ ލޯތަކެވެ. ރޯން ބޭނުން ކުދިންގެ ލޯ ސާފުކުރުމަށް އެއް ބަޔަކު ޓިޝޫ ބަހަމުން ދިޔަ އިރު، އަނެއް ބަޔަކު ގެންދިޔައީ ހިތާމައިން ފޯވެފައިވާ ތިބި ކުދިންނަށް ހިތްވަރުދެމުންނެވެ. ބައެއް ކުދިން ހޯލުން ނެރެން ވެސް ޖެހުނެވެ. ބައެއް ކުދިން އަށިގަނޑުގަ އެވެ. އެކުދިންނަށް ފަރުވާ ދިނީ އެކަމަށް ޚާއްސަ ކޮޓަރިއަށް ގެންގޮސްގެންނެވެ.
އެންމެ ހިތްދަތިކަން ގެނެސްދިނީ ޕްރިންސިޕަލް ނާޒިމްގެ ނަން، އެކި ބޭފުޅުން ވިދާޅުވާ ވަގުތުތަކުގަ އެވެ. ނާޒިމްގެ ނަމާ އެކު ގިސްލުމުގެ އަޑު ގަދަވެ އެވެ.
އެސެމްބްލީގައި އެންމެން ވެސް ވާހަކަ ދެއްކީ ގެނބުނު ހާދިސާގައި ދަރިވަރުންނާއި ބެލެނިވެރިންނަށް އަދި ޓީޗަރުންނަށް ލިބުނު ފުން ހިތާމަ އަށް ލުޔެއް ދިނުމަށެވެ. އެ ގޮތުން ހިތާމަވެރި ވަގުތުތަކުގައި އަމަލުކުރަންޖެހޭނެ ގޮތްތަކާއި ދުނިޔޭގައި ދިމާވާ ހިތާމަވެރި ކަންކަމަށް ކެތްތެރިވުމަށް ނަސޭހަތްތެރިވި އެވެ.
އެޑިއުކޭޝަން މިނިސްޓަރު ޝިފާ މުހައްމަދު ވިދާޅުވީ "އިންސާނުން ދިރިއުޅޭއިރު ހުރިހާ ވަގުތެއްގައި ހިތްހަމަޖެހޭ އުފާވެރި ކަންތައްތަކެއް ދިމައެއް ނުވާނެ،" ކަމަށެވެ. "ހިތާމަވެރިކަމެއް ދިމާވިޔަސް ދިރިއުޅުން ކުރިއަށް ގެންދާން ޖެހޭނެ" ކަމަށާއި "ހިތްވަރާއި އަޒުމާ އެކު ނުކުމެ މަސައްކަތް ކުރަން ޖެހޭނެ" ކަމަށް ވެސް އޭނާ ވިދާޅުވި އެވެ.
"މިވަގުތަކީ ހިރިޔާ ސުކޫލްގެ ހުރިހާ ދަރިވަރުން ވެސް، ބެލެނިވެރިން ވެސް ހިތްވަރުކުރާންވީ ވަގުތެއް،" ޝިފާ ވިދާޅުވި އެވެ.
އެސެމްބްލީގައި ވާހަކަ ދެއްކެވި ގައުމީ ޔުނިވާސިޓީގެ ފެކަލްޓީ އޮފް އިސްލާމިކް ސްޓަޑީޒްގެ އެކްޓިން ޑީން ޝެއިޚު އަލީ ޒާހިރު ވިދާޅުވީ ގެނބުނު ހާދިސާ އިން އެންމެނަށް ވަރަށް ފުން އަސަރެއް ކޮށްފައިވާ ކަމަށެވެ. އަދި އެ ހާދިސާގައި ނިޔާވި ޕްރިންސިޕަލާއި އެ ކުދިންނަކީ ޝަހީދުންގެ ގޮތުގައި އޭނާ ސިފަކުރެއްވި އެވެ.
"ތޯއޫން ބަލީގައި މަރުވާ މީހުންނާއި ބަނޑުގެ ބައްޔެއްގައި މަރުވާ މީހުންނާއި ޣަރަގުވެގެން މަރުވާ މީހުންނާއި އުސް ތަނަކުން ވެއްޓި މަރުވާ މީހުންނާއި ﷲގެ މަގުގައި ޖިހާދުކުރަނިކޮށް މަރުވާ މީހުންނަކީ ޝަހީދުން" ކަމަށް ރަސޫލާ ހަދީސްކުރައްވާފައިވާ ކަމަށް އޭނާ ވިދާޅުވި އެވެ. އަދި ހުކުރު ދުވަހެއްގައި މަރުވުމަކީ ވެސް ރަނގަޅު މަރެއްގެ އަލާމާތެއް ކަމަށް އޭނާ ވިދާޅުވި އެވެ.
ގެނބުނު ހާދިސާ އިން ވަރަށް ބޮޑު އިބުރަތްތަކެއް ލިބޭ ކަމަށާއި އެގޮތުން ޕްރިންސިޕަލް އަލީ ނާޒިމްގެ ހިތްވަރުން ފިލާވަޅު ލިބިގަންނަން ޖެހޭ ކަމަށް ޒާހިރު ވިދާޅުވި އެވެ.
ނާޒިމް އަވަހާރަވީ އެންމެ ފަހު ވަގުތާ ހަމައަށް ކުދިން ސަލާމަތްކުރައްވަން އުޅުމުގެ ތެރޭގައި ކަމަށާއި މިކަމުން ނާޒިމްގެ ހިތްވަރު ނަމޫނާއަކަށް ބަލަން ޖެހޭނެ ކަމަށް އޭނާ ވިދާޅުވި އެވެ. އެގޮތުން "ހުރިހާ ކުދިން ވެސް އެހެން މީހުންނަށް ޚިދުމަތް ކުރުމަށް އަޒުމް ކަނޑައަޅަން ޖެހޭ" ކަމަށް ވެސް ޒާހިރު ވިދާޅުވި އެވެ.
އޭނާ ވިދާޅުވީ ނާޒިމަކީ ރަނގަޅު ހެޔޮ ލަފާ ބޭފުޅެއް ކަމަށް އެންމެން ވެސް ބުނާ ކަމަށާއި އޭނާގެ މާތް އަޚުލާގު ހުރިހާ ދަރިވަރުން ހިފަހައްޓަން ޖެހޭނެ ކަމަށެވެ. އަދި ޕްރިންސިޕަލް ނަޒީމާއި މަރުވި ހަތަރު ކުދިންނަށް މިހާރު ކޮށްދެވެން އޮތް ކަމަކީ ހެޔޮ ދުއާ ކުރުން ކަމަށާއި ދީނީ ކަންކަމާ ގާތްވުމަކީ ނަފްސާނީ ގޮތުން ލުއި ލިބޭނެ ކަމެއް ކަމަށް ވެސް އޭނާ ވިދާޅުވި އެވެ.
މި ހާދިސާ އިން އެންމެން ވެސް ފިލާވަޅު ލިބިގަންނަން ޖެހޭ ކަމަށް މިނިސްޓަރު ޝިފާ ވިދާޅުވި އެވެ. އެގޮތުން ހުރިހާ ދަރިވަރުންނާއި ޓީޗަރުންނާއި ބެލެނިވެރިން ފަތަން ދަސްކުރުމާއި ފުރަތަމަ އެހީ ދޭނެ ގޮތްތައް ދަސްކުރުމަކީ މުހިންމު ކަމެއް ކަމަށް އޭނާ ވިދާޅުވި އެވެ.
މިއަދުގެ އެސެމްބްލީގައި، ހުރާގައި ގެނބިގެން މަރުވި ޕްރިންސިޕަލާއި ހަތަރު ކުދިންގެ ހަނދާނުގައި އެއް މިނެޓްގެ ސުކޫތެއް ގެނަ އެވެ. އަދި އެ މަރުހޫމުންނަށް ރަހްމަތް ލެއްވުން އެދި ދުއާއެއް ކުރި އެވެ.