"މިރެއަކީ އިނދެ ވަރިކުރާ ރޭ" ކަމަށާއި ޑީއާރުޕީ "ވަރިކުރަން" ޖެހުމުން ވަރަށް ބޮޑަށް ހިތާމަކުރައްވާ ކަމަށް އެ ޕާޓީގެ ކުރީގެ ޑެޕިއުޓީ ލީޑަރު އުމަރު ނަސީރު ރޭ ވިދާޅުވެއްޖެ އެވެ.
ޒެޑް ފެކްޝަނުން އާޓިފިޝަލް ބީޗް ކުރިމަތީގައި ހެދި ޑީއާރުޕީގެ މައި ޖަގަހަ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނަމަށް ބަދަލުކުރުމަށް ފަހު އުމަރު ވިދާޅުވީ ޑީއާރުޕީ "ވަރި"ކުރުމަކީ ލިބިވަޑައިގަންނަވާ ވަރަށް ބޮޑު ހިތާމައެއް ކަމަށެވެ.
"އެއްގޮތަކުން މިރެއަކީ ވަރަށް ހިތާމަވެރި ރެއެކޭ. އަނެއް ގޮތަކުން ވަރަށް އުފާވެރިރެއެކޭ. މިރެއަކީ އިނދެ ވަރިކުރާ ރޭ. އަޅުގަނޑުމެން ދާދި ދެންމެ ޑީއާރުޕީ ވަރިކުރީ މި. މިހާރު އަޅުގަނޑުމެން ޕީޕީއެމްއާ އިނީ،" ޖަގަހައިގައި ހުރި ޑީއާރުޕީގެ ދިދަ އާއި ޑީއާރުޕީގެ ނަން ބޯޑު ބަދަލުކުރެއްވުމަށް ފަހު އުމަރު ވިދާޅުވި އެވެ. ޑީއާރުޕީގެ ޒެޑް ފެކްޝަނުން ހެދި ޖަގަހަ ޕީޕީއެމްގެ ޖަގަހައަކަށް ބަދަލުކުރުމުގެ ގޮތުން ރޭ ބޭއްވި ޖަލްސާ --ހަވީރު ފޮޓޯ/ނަސްރުﷲ ސާލިހު
ޑީއާރުޕީއާ ގުޅިވަޑައިގެންނެވީ އެ ޕާޓީ ދެކެ "ވަރަށް ލޯބިން" ކަމަށާއި ނަމަވެސް "ވަރިކުރަން" ޖެހުނީ "އެހެން ބަޔަކާއެކު ސިއްރު ގުޅުންތަކެއް އޮންނަ ކަން އެނގޭތީ" ކަމަށް އުމަރު ވިދާޅުވި އެވެ.
"ފަހުން އެނގުނީ ނަހަމަ ގުޅުން އެހެން މީހުންނާއެކު ހިންގާކަން. ސިއްރުން ބައްދަލުކުރަނީ އެހެން މީހުންނާ. އަޅުގަނޑުމެންނަށް އެނގޭ ކުރިން ވެސް ސިއްރުން ބައްދަލުކުރާކަން. އެ ވާހަކަ ދެއްކީމަ ގޭތެރޭ އުޅޭ މީހުން ބުނީ ތިއީ ދޮގެކޭ އެ މަންޖެ ސިއްރުން ބައްދަލެއް ނުކުރާނޭ މީހަކާ،" އުމަރު ވިދާޅުވި އެވެ.
ޑީއާރުޕީ ވަނީ ކޮރަޕްޝަނުންގެ ކަސްތޮޅު އެޅިފައި ކަމަށް ވެސް އުމަރު ވިދާޅުވި އެވެ.
ރޭގެ ރަސްމިއްޔާތުގައި ޕީއޭގެ ކުރީގެ ރައީސް އަދި ރައްޔިތުންގެ މަޖިލީހުގެ މުލަކު ދާއިރާގެ މެމްބަރު އަބްދުﷲ ޔާމީން ވިދާޅުވީ 2008 ވަނަ އަހަރު ބަދަލަކަށް ބޭނުންވި ފަދައިން މިހާރު ވެސް ބަދަލަކަށް ބޭނުންވެފައިވާ ކަމަށެވެ.
އިގުތިސާދީ އަދި އިޖުތިމާއީ ގޮތުން ބަލާއިރު ޒުވާނުންނަށް ފުރުސަތު ގެއްލެމުންދާ ކަމަށާއި ނަމަވެސް 2013 ޕީޕީއެމްގެ ވެރިކަމެއްގައި ވަޒީފާ ދިނުމުގައި މީހާގެ ކުލައަކަށް ނުބަލާނެ ކަމަށް ޔާމީން ވިދާޅުވި އެވެ.
ޕީޕީއެމްގެ ސަރުކާރެއްގައި ޑިމޮކްރަސީގެ ވާހަކަ ދައްކާފައި ސިޔާސީ މީހުން ހައްޔަރު ނުކުރާނެ ކަމަށް ޔާމިން ވިދާޅުވި އެވެ. އަދި ހިރިޔާ ސްކޫލަށް ދިމާވި ކަހަލަ ހިތާމަވެރި ހާދިސާ އަކާ ގުޅިގެން، ބޭރުގައި ހުންނެވިޔަސް ނާދެވޭ ވަރުގެ ވެރިއެއް އެ ޕާޓީގައި ނުންނާނެ ކަމަށް އެ މަނިކުފާނު ވިދާޅުވި އެވެ.
ޕީޕީއެމްގެ ޖަހަގަ ހުޅުވުމަށާއި "އަހަރެން ވެސް ޕީޕީއެމް" މި ނަމުގައި އެ ޕާޓީ އަށް މެމްބަރުން އިތުރުކުރުމަށް ހިންގާ ކެމްޕޭން ފެށުމުގެ ޖަލްސާގައި ރައްޔިތުންގެ މަޖިލީހު ބައެއް މެމްބަރުން ވެސް ބައިވެރިވެވަޑައިގެންނެވި އެވެ.