އިންޑިއާގެ މުމްބާއީގެ ޓްރެފިކްގައި ފަސް ގަޑިއިރު ތާށިވެ، މަގުމަތީގައި ހޭދަކުރި ވަގުތުތަކަކީ ބިރުވެރި ތަޖުރިބާއެއްގެ ގޮތުގައި ބަތަލާ ސޮނާލީ ކުލްކަރްނީ ސިފަކޮށްފިއެވެ. ބޮލީވުޑްގެ މަޝްހޫރު އެކްޓްރެސް ސޮނާލީ ކުލްކަރްނީ، މުމްބާއީގެ ކާރޫބާރޫ ބޮޑު ޓްރެފިކްގެ ތެރޭގައި ތާށިވެ ކުރަންޖެހުނު ހިތްދަތި ތަޖުރިބާ ސޯޝަލް މީޑިއާގައި ހިއްސާކުރަމުން ބުނީ، މުމްބާއީގެ އިންފްރާސްޓްރަކްޗާ ހުރި ގޮތާމެދު ކަންބޮޑުވާ ކަމަށެވެ. އިންސްޓަގްރާމް މެދުވެރިކޮށް ސޮނާލީ ހާމަކުރި ގޮތުގައި، އޭނާ މުމްބާއީން ޕޫނޭއަށް ދަތުރު ކުރަނިކޮށް، މަންޚުރުދު ބްރިޖް މަތީގައި އެތައް ގަޑިއިރެއް ވަންދެން ތާށިވިއެވެ. މި ޖޭމްގެ ސަބަބުން އޭނާގެ އިތުރުން އެތައް ބަޔަކު މަގުމަތީގައި ބަންދުވެ، ހާލަތު ރަނގަޅުވާނެ އިރެއް ނޭނގި ބޮޑު ތަކުލީފެއް އުފުލަން ޖެހުނެވެ. އޭނާ އާންމުކުރި ވީޑިއޯއެއްގައި ބުނެފައިވަނީ، އެކަމާ ގުޅިގެން މުމްބާއީގެ ޓްރެފިކް ކޮންޓްރޯލް ޓީމަށް ގުޅުމުން، ކެތްތެރިވުމަށް އެދިފައިވާ ކަމަށާއި، ނަމަވެސް މި ޖޭމް ހައްލުވާނީ ކޮން އިރަކު ކަމެއް އެ ފަރާތްތަކަށް ވެސް ކަށަވަރުކޮށް ނުދެވުނު ކަމަށެވެ. ބަތަލާ ސޮނާލީ ކުލްކަރުނީ ފިލްމީ ތަރި ކާޖޮލްއާ އެކު--ފޮޓޯ/ބޮލީވުޑްހަންގާމާ ގިނަ ވަގުތުތަކެއް ވަންދެން އެއް ތަނެއްގައި ހުއްޓިފައި ތިބެން ޖެހުމުގެ ސަބަބުން ކުރިމަތިވި ބިރުވެރިކަމާއި އުނދަގޫތައް ހާމަކުރަމުން ސޮނާލީ ބުނީ، އެންމެން ތިބީ ވަރަށް ބަނޑުހައިވެފައި ކަމަށެވެ. އަދި މިއަށްވުރެ މާ ނުރައްކާތެރި ހާލަތްތައް މީހުން ތަހައްމަލު ކުރާނެކަން އެނގޭ ކަމަށާއި، ނަމަވެސް އެއް ތަނެއްގައި ފަސް ގަޑިއިރު ހޭދަކުރަން ޖެހުމަކީ ވަރަށް ބިރުވެރި އިހުސާސެއް ކުރެވުނު ކަމެއް ކަމަށް ބަތަލާ ވަނީ ބުނެފައެވެ. ސޮނާލީ މީސްމީޑިއާގައި ހިއްސާކުރި މި ޕޯސްޓަށް ގިނަ ބައެއްގެ ސަމާލުކަން ލިބި މިކަމާ ގުޅޭގޮތުން ޚިޔާލުފާޅުކުރި މީހުންގެ ތެރޭގައި ފިލްމް ޕްރޮޑިއުސަރު އަދިތްޔަ ކްރިޕަލާނީ ހިމެނެއެވެ. ސޮނާލީގެ ވާހަކަތަކަށް ތާއީދު ކުރަމުން އަދިތްޔަ ބުނެފައި ވަނީ، މިއީ ހަމަ މި ސިޓީގެ ހަގީގީ ހާލަތް ކަމަށާއި، އުމްރާނީ ތަރައްގީގެ ބޮޑެތި މައްސަލަތަކެއް ރައްޔިތުން ތަހައްމަލު ކުރަމުންދާ ކަމަށެވެ. މުމްބާއީއަކީ ޒަމާނުއްސުރެ ޓްރެފިކް ތޮއްޖެހުމުގެ ބޮޑު މައްސަލައަކާ ކުރިމަތިލަމުންދާ ސިޓީއެކެވެ. އަދި މި ހާދިސާއިން ދަތުރު ފަތުރުކުރާ މީހުންނަށް ކޮންމެ ދުވަހަކު ކުރިމަތިވާ ގޮންޖެހުންތައް އަނެއްކާވެސް މިވަނީ ހާމަވެފައެވެ. އިންޑިއާގެ އެންމެ ބާރުބޮޑު އެއް ސިޓީގައި ޓްރެފިކް މެނޭޖްކުރުމާއި އުމްރާނީ ރޭވުންތެރިކަން ހަރުދަނާކުރުމުގެ މުހިންމުކަމާ ބެހޭގޮތުން، ސޮނާލީ ކުލްކަރުނީ ކުރި މި ތަޖުރިބާއާ އެކު މި ބަހުސްތައް އަލުން ވަނީ ފެންމަތިވެފައެވެ.