ބައެއް މީހުން ވިސްނައިގެން ތިބެނީ ކައިވެނިކުރެވުމުން ޢަމަލުތައް އިޞްލާޙްކުރުމަށެވެ. އެއިގެ ކުރިން ހިތް އެދޭހައި ގޮތަކަށް ކަންކަން ކުރުމަށެވެ. ނަމަވެސް އެއީ ވަރަށް ނުބައި ވިސްނުމެކެވެ. އެފަދަ ގޮތްގޮތަށް ވިސްނާ ގިނަ މީހުންނަށް އޮންނާނީ ކައިވެނީގެ ފަހުން ޢަމަލުތައް އިޞްލާޙްނުކުރެވިފައެވެ. އަދި ހެޔޮލަފާ ބައިވެރިއަކު ލިބުމަށްވެސް ހުރަސްތައް އެޅެމުން ދާނެއެވެ.  
މީހަކު ދެކެ ލޯބިވެ ކައިވެނިކުރަން ނިންމައި ކައިވެނީގެ ކަންކަން ކުރިއަށް ގެންދަމުންވެސް އެހެން މީހުންނަށް ޝައުޤުވެރިވެ ބީހިލަން ބޭނުންވާ މީހުން ގިނަކަމުން އަންނަކަން ފާހަގަކުރެވެއެވެ. މިފަދަ މީހުން ވެސް އެމީހުންގެ ލޯބިވެރިޔާ އެހެން މީހަކަށް ޝައުޤުވެރިވެއްޖެނަމަ ރުޅި އައުދެއެވެ. ނަފްރަތުވެސް ކުރެއެވެ. ބައެއްފަހަރު ލޯބިވެރިޔާއާއި ވަކިވެސްވެއެވެ. ނަމަވެސް އެފަދަ ކަންކަން ކުރަން އޭނާ ޖެހިލުމެއް ނުވެއެވެ.  
ލޯބިވެގެން އުޅުނަސް، ކައިވެނިކޮށްގެން އުޅުނަސް އެކަކު ތެދުވެރިވެގެން އުފާވެރިކަމެއް ނުލިބޭނެއެވެ. ދިރިއުޅުން ކާމިޔާބެއް ނުކުރެވޭނެއެވެ. ކާމިޔާބުކުރެވޭނީ ދެމީހުންވެސް ތެދުވެރިވެގެންނެވެ. ސިއްރުކުރަން އުޅުނަސް އަބަދަކު ސިއްރެއްވެސް ނުވާނެއެވެ. ވަޤުތު ޖެހުމުން ފަޅާއަރާނެއެވެ. ފަޅާއެރުމުން ޢުމުރަށް ހިތާމަކުރަންޖެހޭފަހަރުވެސް މަދެއްނޫނެވެ.  
ތިރީގައި އެވަނީ މިބަޔާންކުރި ކަންކަމަށް ޙެކި ލިބިގެންދާ ޢިބްރަތްތެރި ވާހަކައެވެ. ކުރެވެމުން އައި ކުށަށް އިޢްތިރާފްވެ ކިޔުންތެރިއަކު އަމިއްލައަށް ޙިއްޞާކޮށްފައިވާ ވާހަކައެކެވެ. މިވާހަކަ މިގެނެސްދެނީ އަމިއްލަ ކުށަށް އިޢްތިރާފްވަނީ މަދު މީހަކު ކަމަށްވެފައި މިއީ ކުށް ޤަބޫލުކުރި ޒުވާނެއްގެ ވާހަކަކަމަށްވުމުން ވަރަށް ޚާއްޞަ ވާހަކައަކަށްވާތީއެވެ.  
އަހަރެންގެ ލޯބިވެރިއަކު ހުރެއެވެ. ދިއައީ ކައިވެނިކުރަން މަޝްވަރާވެސް ކުރަމުންނެވެ. އެހެންކަމާއިއެކުގައިވެސް އަހަރެންގެ ކިބައިގައި ވަރަށް ނުރަނގަޅު ސިފައެއް ހުރެއެވެ. މިކިޔައިދެނީ އެސިފައިގެ ސަބަބުން އަހަރެންގެ މުޅި ޙަޔާތް ބިލާހަކަށްވީގޮތެވެ.  
އެއްދުވަހެއްގެ ހަވީރު ހިނގާފައި ދަނިކޮށް މަގުމަތީގައި ހުރި ވަރަށް ރީތި އަންހެން ކުއްޖަކު ފެނުނެވެ. ކައިރިވެލާފައި ކާކުގެ އިންތިޒާރުގަތޯ؟ އެއްވެސް ކަމެއް ބޭނުންވެގެންތޯ ފަދަ ސުވާލުތައް ކުރުމުން ޖަވާބުގައި ބުނަމުން ދިއައީ ހަމަ ނޫނެކެވެ. އާދައިގެމަތިން އޭނާ ވަރަށް ރީތި ކަމަށާއި ރާނީއެއްހައި ރީތިކަމަށްވެސް ބުނީމެވެ.  
އެވަރަކުންވެސް ހިތްހަމައެއް ނުޖެހުނެވެ. އޭނާގެ ނަން އެހުމަށްފަހު އޭނާ ގާތު އަހަރެންގެ ފޯނުގައި އޭނާގެ ފޯނުނަމްބަރު ޖަހައިދިނުމަށް އެދުނީމެވެ. އެކަން އޭނާކޮށްދިނުމުން އޭނާގެ ކުރިމަތީގައި ހުރެ ސޭވްކޮށްލީމެވެ. އޭނާގެ އެދުމަށް ސޭވްކުރީ ރާނީގެ ނަމުގައެވެ.  
އެއިގެ ދުވަސްކޮޅެއްފަހުން ލޯބިވެރިޔާ އާއިއެކު އަތިރިމަތީގައި އިންދާ އޭނާ އަންނަތަން ފެނުނެވެ. ނުފެންނަކަމަށް ހަދައިގެން އިންދާ އައިސް ފުރަތަމަވެސް ފެށީ އަހަރެންގެ ލޯބިވެރިޔާއަށް އެއްޗެތިގޮވާށެވެ. އެކަންކުރަން ފެށުމުން އޭނާއަކީ އެންމެ ދުވަހަކު ފެނުނު އަންހެނެއް ކަމަށާއި ދެމެދުގައި އެއްވެސް ގުޅުމެއް ނެތްކަމަށް ބުނީމެވެ.  
ނަމަވެސް އޭނާ ބުނީ އަހަރެން ހަދަނީ ދޮގުކަމަށާއި އޭނާދެކެ ވާލޯބި ބޮޑުކަމުން އަހަރެންގެ ފޯނުގައި އޭނާގެ ނަން ސޭވްކޮށްފައި އިންނާނީވެސް ރާނީގެ ނަމުން ކަމަށާއި ބޭނުން ނަމަ ޗެކް ކުރުމަށެވެ. އެހިސާބުން އަހަރެންނަށް ދިއައީ 4 އުދަރެސް ފެނުގައިޖެހިގެންނެވެ. ލޯބިވެރިޔާ ގާތު ދެއްކޭނެ އެއްވެސް އިތުރުވާހަކައެއް ނެތުމުންނެވެ.  
އަހަރެންގެ ފޯނުއަތުލައިގެން ޗެކްކުރުމަށްފަހު ލޯބިވެރިޔާ އަހަރެން ދޫކޮށްލާފައި ދާއިމަށް ވަކިވެގެންދިއައީއެވެ. އުފާވެރި ޒަވާޖީ ޙަޔާތަކަށް ކުރަމުން އައި ފޮނި އުންމީދުތައް ވަޔަށް ބުރައިގެންދިއައީއެވެ.  
ލޯބިވެރިޔާ ޖެހިގެން އައި ހަފްތާގައި އެހެން ފިރިހެނަކާއި ކައިވެނިކުރީއެވެ. އެއިގެފަހުން 3 އަހަރުވީއެވެ. އަދިވެސް އަހަހަރެން މިހުންނަނީ ކަމުގެ ޙަޤީޤަތް އެނގި ލޯބިވެރިޔާ އަހަރެންނަށް ލިބޭނެ ކަމުގެ ފޮނި އުންމީދުގައެވެ.  
ލޯބިވެރިޔާ އެގޮތަށް ކަންތައް ކުރުމުން ރާނީއަށް ވަރަށް ގުޅީމެވެ. ފޯނުވެސް ނުނެގިއެވެ. އަހަރެން ގުޅީ އަހަރެންގެ ޙަޔާތަށް ރާނީ ގެންނަން ބޭނުންވެގެނެއް ނޫނެވެ. އެވަރު ބޮޑު އަނިޔާއެއް އަހަރެންނަށް ދިން ސަބަބު އޮޅުންފިލުވާށެވެ!  
އަހަރެން ދޭން ބޭނުންވާ މެސެޖަކީ އަހަރެންނަށް މިލިބުނު ދެރަ ނުލިބޭނެގޮތަށް އުޅޭށެވެ! އަހަރެން މިކުރާ ހިތާމަ އިޙްޞާޞްކުރެވޭނީ ހަމަ މިފަދަ ޙާލެއް ޖެހުނު މީހަކަށެވެ! އަހަރެން ކުށްވެރިކުރަނީ އަހަރެންގެ އަމިއްލަ ނަފުސެވެ! އިރާދަކުރެއްވިއްޔާ މިހުރީ ލިބުނު ފިލާވަޅުން ޢބްރަތް ޙާޞިލުކޮށްގެންނެވެ.
 
- "އަޒްވާޖް"- މިއަދުނޫހުގެ ކިޔުންތެރިއެއް