އޮސްޓްރޭލިއަން އޯޕަންގެ ފިރިހެން ސިންގަލްސް އިވެންޓްގެ ސެމީ ފައިނަލް އިން މި މުބާރާތުގައި ދެވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑާ ޒުވަރޭވް އާއި ހަތްވަނައަށް ސީޑު ކުރެވިފައިވާ ސާބިއާގެ ނޯވަކް ޖޯކޮވިޗް ޖާގަ ހޯދައިފިއެވެ. މި މުބާރާތުގެ ސެމީ ފައިނަލުން ޒުވަރޭވް ޖާގަހޯދީ ކްއާޓާ ފައިނަލްގައި މި މުބާރާތުގައި 12 ވަނައަށް ސީޑު ކުރެވިފައިވާ އެމެރިކާގެ ޓޮމީ ޕޯލް އާއި ބައްދަލުކުރި މެޗު ތިން ސެޓް އެއް ސެޓުން ކާމިޔާބު ކޮށްގެންނެވެ. މި މެޗުގެ ފުރަތަމަ ދެ ސެޓު ޓައި ބްރޭކަކަށް ދިޔަ މި މެޗުގެ ފުރަތަމަ ސެޓު ޒުވަރޭވް ކާމިޔާބު ކޮށްފައިވަނީ ހަތެއް އެކަކުންނެވެ. އަދި ދެވަނަ ސެޓުގެ ޓައި ބްރޭކް ޒުވަރޭވް ކާމިޔާބު ކޮށްފައިވަނީ ހަތެއް ސުމަކުންނެވެ. ނަމަވެސް ޖެހިގެން އައި ތިންވަނަ ސެޓު ދެއެއް ހަޔަކުން ކާމިޔާބު ކޮށްފައިވަނީ ޕޯލްއެވެ. މި މެޗުގެ ހަތަރު ވަނަ ސެޓު ޒުވަރޭވް ކާމިޔާބު ކޮށްފައިވަނީ ހައެއް އެކަކުންނެވެ. މި ކާމިޔާބީއާއެކު ޒުވަރޭވް މި ވަނީ މިހާތަށް ބަލިނުވެ ހަތް މެޗު ހަމަކޮށްފައެވެ. އަދި މިއާއެކު މި ސީޒަންގައި މިހާތަނަށް އޭނާ ބަލިވެފައެއް ނުވެއެވެ. މެޗަށް ފަހު ވާހަކަ ދައްކަމުން ޒުވަރޭވް ހާމަކުރިގޮތުގައި އޭނާ ހަގީގަތުގައި އޮއްނަންވާނީ ދެ ސެޓު ފަހަތުގައި ކަމަށެވެ. މިމެޗުގެ ފުރަތަމަ ދެ ސެޓުގައި މޮޅަށް ކުޅެފައިވަނީ ޕޯލް ކަމަށްވެސް އޭނާ ހާމަކުރިއެވެ. މިފަހަރުގެ ސެމީފައިނަލް ވެގެންދާނީ ޒުވަރޭވް ވާދަކުރާ ނުވަވަނަ ގްރޭން ސްލޭމް ސެމީ ފައިނަލް އެވެ. ޒުވަރޭވް އަކީ މިހާރު ޓެނިސް ކުޅޭ ކުޅުންތެރިންގެ ތެރެއިން ގްރޭން ސްލޭމް މުބާރާތެއް ކާމިޔާބު ނުކުރެވި އެންމެ ގިނަ ސެމީ ފައިނަލްގައި ވާދަކުރާ ކުޅުންތެރިޔާއެވެ. މިމުބާރާތުގެ ސެމީ ފައިނަލްގައި ޒުވަރޭވް ބައްދަލުކުރާނީ ޖޯކޮވިޗް އާއެވެ. ޖޯކޮވިޗް ސެމީ ފައިނަލް އިން ޖާގަހޯދީ މި މުބާރާތުގައި ތިންވަނައަށް ސީޑު ކުރެވިފައިވާ ސްޕެއިންގެ ކާލޯސް އަލްކަރާޒާ ބައްދަލުކުރި މެޗު ތިން ސެޓު އެއް ސެޓުން ކާމިޔާބު ކޮށްގެންނެވެ.