މައިންފަދަ ރަނގަޅު މައިދައިތައިންވެސް މަދެއް ނޫނެވެ. ހަމައެގޮތަށް ނުބައި ދޮންމަންމައަކަށްވުރެ ނުލަފާ މައިދައިތައިންވެސް ތިބެއެވެ. އެފަދަ މައިދައިތައިންގެ ސަބަބުން ދަރިންގެ ދިރިއުޅުން ޚަރާބުވެ ޢުމުރަށް ހިތާމަކުރަން ޖެހިފައިވެސް އެބަހުއްޓެވެ.  
ނުބައި މައިދައިތައިންގެ މައްސަލަތަކާއި ގުޅިގެން ކިޔުންތެރިން ސުވާލުކުރައްވަމުން ގެންދަވާތީ ހޭލުންތެރިކަން އިތުރުކުރުކުރުމުގެ ގޮތުން މިގެނެސްދެނީ ސުވާލަކާއި ޖަވާބެކެވެ. ވިސްނާލައި ނުލަފާކަން ދެއްކުން ހުއްޓާލައި ޢަމަލުތައް އިޞްލާޙްކުރަން މަސައްކަތްކުރާށެވެ!  
ސުވާލު: ދިމާވާ ކުދިކުދި ކަންތައްތައް ބޮޑުކޮށްގެން މައިދައިތަ ގޮސް އޭނާގެ ފިރިހެން ދަރިފުޅު ގާތުގައި ރޮއެ ބޮޑާހާކާ މި ގޮތަށް ކަންތައް ކުރުމުގެ ސަބަބުން ފިރިހެން ކުއްޖާ އޭނާގެ އަނބިމީހާ ދެކެ ރުޅިއަންނަނީ. ދެން އަބަދު އެ ގޮތަށްވާތީ އަންހެން ކުއްޖާ ބޭނުމެއް ނުވޭ ފިރިމީހާގެ މަންމަ ކައިރީގައި އުޅޭކަށް. އެ ކަމާ ދެމަފިރިން އަބަދުހެން ދެބަސްވާން ޖެހެނީ. މަންމަ ބޮޑާހާކާ އަންހެން ކުއްޖާ ކުށްވެރިވާ ގޮތަށް އޭނާގެ ފިރިހެން ދަރި ކައިރީގައި ވާހަކަދައްކާ ރޮއެހަދާތީ.. މި ގޮތަށް މި ކަން ވާތާ ކިތަންމެ ދުވަހެއް. މިކަހަލަ ހާލަތެއްގައި އަނބިމީހާ ކިހިނެއްތޯ ކަންތައް ކުރާނީ. އަބަދު މައިދައިތަގެ ކަންތަކާ ފިރިމީހާ އަނބިމީހާ ދެކެ ރުޅިއަންނާތީ ފިރިމީހާ ދެކެ ފޫހިވޭ. ދެން ކިހިނެއްތޯ ހަދާނީ؟ 
ޖަވާބު: މައިދައިތައަށް ހެޔޮ ވިސްނުން ދެއްވުން އެދި ދުޢާކުރާށެވެ. އަދި ވީވަރަކުން މައިދައިތައަށް ހެޔޮކޮށް ކަންތައް ކޮށްދޭށެވެ. ހެޔޮކޮށް ކަންތައް ކޮށްދެމުންދާ އިރުގައި ވެސް މައިދައިތަ އެ ގޮތަށް ކަންކުރާނަމަ، އެ ކަމުން ތިބާއަށް ލިބޭނެ ގެއްލުމެއް ނެތެވެ. އޭގެ ބަދަލުގައި ﷲ ގެ ޙަޟްރަތުގައި ތިބާގެ ދަރަޖަ ދާނީ އުފުލެމުންނެވެ. މައިދައިތަގެ ހެޔޮ ކަންތައް ތިބާއަށް ބަދަލުވަމުން ދާނެއެވެ. އަދި ހެޔޮ ކަންތައް ހުސްވެއްޖެ ނަމަ، ތިބާގެ ފާފަތައް މައިދައިތައަށް އުފުލަން ޖެހޭނެއެވެ. ފިރިމީހާއަށް ހެޔޮ ވިސްނުން ދެއްވުން އެދި ދުޢާކުރާށެވެ.  
1- ﷲ ގެ ޙަޟްރަތުގައި ތިބާގެ ދަރަޖަ އުފުލުން
2- މައިދައިތަގެ ހެޔޮ ކަންތައް ތިބާއަށް ބަދަލުވަމުން ދާނެ
3- އަދި މައިދައިތަގެ ހެޔޮ ކަންތައް ހުސްވެއްޖެ ނަމަ، ތިބާގެ ފާފަތައް މައިދައިތައަށް އުފުލަން ޖެހޭނެ
 
- ޖަވާބުދެއްވީ: ޑރ. މުޙައްމަދު އިޔާޟް ޢަބްދުއްލަޠީފް