ރާއްޖޭގައި ބޭނުންކުރާ ހަކަތައިގެ 33 އިންސައްތަ އިޢާދަކުރަނިވި ހަކަތައަށް ބަދަލު ކުރުމަށް މި ސަރުކާރުން ހިފާފައިވާ އަމާޒަށް ވާސިލުވުމަށް 450 މެގަވޮޓްގެ އިޢާދަކުރަނިވި ހަކަތަ ބޭނުންވާކަމަށް އެންވައިރަންމެންޓް މިނިސްޓަރު ޠާރިޤު އިބްރާހީމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައީސް ޑރ.މުހައްމަދު މުއިއްޒު މާޅޮސްމަޑުލު އުތުރުބުރީގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެއަތޮޅު އުނގޫފާރުގައި، ދައުލަތުގެ މީޑިއާ ޕީއެސްއެމް ނިއުސްއާ ދެއްކެވި ވާހަކަފުޅެއްގައެވެ.
އިޢާދަކުރަނިވި ހަކަތައަށް ބަދަލުވުމަށް ސަރުކާރުން ކުރައްވަމުން ގެންދަވާ މަސައްކަތަށް އަލިއަޅުވާލައްވައި މިނިސްޓަރ ޠާރިގް ވިދާޅުވީ، ރ.އަތޮޅަށް އެކަނި ބެލިނަމަވެސް، އެ އަތޮޅުގެ ތިން ރަށެއް ފިޔަވާ އެހެން ހުރިހާ ރަށެއްގައި އިޢާދަކުރަނިވި ހަކަތައިގެ މަޝްރޫޢުތައް ކުރިއަށްދާ ކަމަށެވެ.
އަދި އެއަތޮޅު ވާދޫގެ ކަރަންޓު އެއްކޮށް އިޢާދަކުރަނިވި ހަކަަތައަށް ބަދަލުކުރުމުގެ މަސައްކަތް ފަށާފައިވާކަމަށް ވެސް މިނިސްޓަރު ވިދާޅުވިއެވެ.
މީގެއިތުރުން 2028 ވަނަ އަހަރު ނޮވެމްބަރަށް ހަކަތައިގެ ދާއިރާއިން ހާސިލްކުރަން ބޭނުންވާ އެއަމާޒާ އެއްގޮތަށް ކަންކަން ކުރުމަށް ސަރުކާރުން މިހާތަނާށް ހެދި ދިރާސާތަކުން ޖުމްލަ 450 މެގަވޮޓް ޤާއިމްކުރަން ޖެހޭކަމަށާއި މިއަމާޒު ހާސިލްކުރުމަށް ކެނޑިނޭޅި މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ.
"މުޅިއެކު މިހާރު ހިސާބުތައް ދައްކާގޮތުން 450 މެގަވޯޓު ބޭނުންވޭ 33 އިންސައްތައަށް ދާކަމަށްވާނަމަ. އަޅުގަނޑުމެންނަށް އިރާދަކުރެވިއްޔާ އަދި ކުރިއަށް މިއޮތް އަހަރުތަކުގެ ތެރޭގައި އިޢާދަކުރަނިވި ހަކަތަ ބޭނުންކުރުމުގެ މަސައްކަތްތަކާއިގެން ކުރިއަށްދެވޭނެ." އޭނާ ވިދާޅުވިއެވެ.