ޔޫއެފާ ޗެމްޕިއަންސް ލީގުގައި ރޭ ބެޔާ ލެވަކޫސަން އާއި ދެކޮޅަށް އެތްލެޓިކޯ މެޑްރިޑް ކުޅުނު މެޗުގެ 65 މިނިޓް ދިހަ ކުޅުންތެރިންނާއެކު ކުޅެ 2-1 ގެ ނަތީޖާއަކުން އެތްލެޓިކޯ މެޑްރިޑް މޮޅުވެ ތާވަލުގެ ތިންވަނަ މަގާމް ހޯދައިފި އެވެ.
މި މެޗުން އެތްލެޓިކޯ މެޑްރިޑް މޮޅުވުމާއެކު އެ ޓީމަށް ވަނީ ޗެމްޕިއަންސް ލީގުގެ ފުރަތަމަ ބުރުގައި ކުޅުނު 7 މެޗުން ލިބިފައިވާ 15 ޕޮއިންޓާއެކު ތާވަލުގެ ތިންވަނަ މަގާމް ލިބިފަ އެވެ. ލެވަކޫސަން އަށް 7 މެޗުން ލިބިފައިވާ 14 ޕޮއިންޓާއެކު ތާވަލުގެ ހަވަނަ ލިބިފައިވާއިރު ދެ ޓީމުވެސް ވަނީ މުބާރާތުގެ ދެވަނަ ބުރަށް ކޮލިފައިވެފަ އެވެ.
މެޑްރިޑްގެ ރިޔާދު އެއަރ މެޓްރޮޕޮލިޓަން ސްޓޭޑިއަމްގައި ފަސްދޮޅަސް ހަ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު ފަށައިގެން 25 ވަނަ މިނިޓުގައި އެތްލެޓިކޯ މެޑްރިޑްގެ ޕަބްލޯ ބެރިއޮސް ކުރި ފައުލަކާއި ގުޅިގެން ރެފްރީ ވަނީ އޭނާއަށް ރަތް ކާޑު ދައްކާ ދަނޑުން ފޮނުވާލާފަ އެވެ.
އެއް ކުޅުންތެރިއަކު މަދުކޮށް އެތްލެޓިކޯ މެޑްރިޑް އިން ކުޅެމުންދިޔައިރު އޭގެ ފައިދާ ނަގާ މެޗުގެ ފުރަތަމަ ހާފުގެ އިތުރު ވަގުތުގައި ބެޔާ ލެވަކޫސަން ގެ ޕިއެރޯ ހިންކެޕީ ވަނީ ލަނޑެއް ޖަހާ ލެވަކޫސަން އަށް ލީޑު ނަގައިދީފަ އެވެ.
ނަމަވެސް ޑިއެގޯ ސިމިއޯނީގެ އިރުޝާދުގެ ދަށުން ކުޅެމުންދިޔަ އެތްލެޓިކޯ މެޑްރިޑް އިން ވަނީ މެޗުގެ ދެވަނަ ހާފުގެ ކުޅުން ފެށުނުތާ ހަތްވަނަ މިނިޓުގައި ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ޖޫލިއަން އަލްވަރޭޒް އެވެ.
މި މެޗުގެ 76 ވަނަ މިނިޓުގައި ރެފްރީ ވަނީ ލެވަކޫސަން އަށް ލަނޑު ޖަހައިދިން ހިންކެޕީ އަށް ދެވަނަ ރީނދޫ ކާޑަކާއިއެކު ރަތް ކާޑެއް ދައްކާ ދަނޑުން ފޮނުވާލާފަ އެވެ. އެހެންކަމުން މެޗުގެ ބާކީ ބައި ދެ ޓީމުންވެސް ކުޅެފައިވަނީ 10 ކުޅުންތެރިންނާއެކުގަ އެވެ.
އަދި މެޗުގެ ފަހު މިނިޓުގައި އަލްވަރޭޒް ވަނީ އިތުރު ލަނޑެއް ކާމިޔާބުކޮށް މި މެޗުން އެތްލެޓިކޯ އަށް ތިން ޕޮއިންޓް ކަށަވަރުކޮށްދީފަ އެވެ.