ފަލަސްޠީނުގެ ހައްޤުގައި ޙަމާސް ޖަމާއަތުން، 7އޮކްޓޯބަރު 2023 ގައި ދިން ޙަމަލާގައި އިސްރާއީލްގެ ސަރަޙައްދުތަކަށް ވަދެގަނެވުނީ ސަލާމަތީ ބާރުތަކުގެ އިހުމާލުން ކަމަށް ޤަބޫލުކޮށް، އެކަމަކު ޒިންމާ ނަގައި، އަންނަ މާޗް މަހުގެ 6ވަނަ ދުވަހު އިސްތިޢުފާ ދޭން، ޔަހޫދީ އިސްތިޢުމާރީ ފައުޖު ވެރިޔާ ނިންމައިފިއެވެ.
ހަރޒީ ހައިލަވީ ބުނީ، ޙަމާސްއިން ދިން ޙަމަލާ ހިނގި ގޮތުގެ ތަހުގީގުތައް ނިމުމުން، މުސްތަޤުބަލުގައި މިފަދަ ޙަމަލާތަކަށް ޔަހޫދީ އިސްތިޢުމާރީ ފައުޖުގެ ތައްޔާރީ ޙާލަތު އިތުރަށް ވަރުގަދަ ކުރުމަށްފަހު، އިސްތިޢުފާ ދޭނެ ކަމަށެވެ.
"އޮކްޓޯބަރު ހަތް ވަނަ ދުވަހުގެ ހެނދުނު އަހަރެންގެ ކޮމާންޑުގެ ދަށުން އައިޑީއެފްއިން އިސްރާއީލުގެ ރައްޔިތުން ހިމާޔަތް ކުރުމުގެ މިޝަންގައި ނާކާމިޔާބުވި،" ޑިފެންސް މިނިސްޓަރު އިސްރާއީލް ކަޓްޒްއަށް ފޮނުވި އިސްތިޢުފާ ސިޓީގައި ދެއްވި ސިޓީގައި ހައިލަވީ ލިޔެފައިވެއެވެ.
އޭނާގެ އިތުރުން، ޔަހޫދީ ދައުލަތުގެ ކަނޑު އަދި ވައިގެ ސިފައިންގެ ވެރިން ވެސް ކުރިއަށް ދުވަސްތަކުގައި އިސްތިޢުފާ ދޭނެކަމުގެ އަޑުތައް ދަނީ އިވެމުންނެވެ.
ކަޓްސްގެ އިތުރުން ޔަހޫދީ ދައުލަތުގެ ވެރިޔާ ބެންޖަމިން ނަތަންޔާހޫ ވެސް ވަނީ ހައިލަވީގެ އިސްތިޢުފާ ޤަބޫލުކޮށްފައެވެ.
ޙަމާސް ޖަމާޢަތާ ދެކޮޅަށް ކުރި ހަނގުރާމައިގައި، ހައިލަވީގެ ބެލުމުގެ ދަށުން އިސްތިޢުމާރީ ފައުޖު މާ ނެގިމަޑުވިކަމުގެ ތުހުމަތުތައް ނަތަންޔާހޫގެ ސަރުކާރުގެ ތެރެއިން އޭނާއަށް އަމާޒުކުރިއެވެ.
ގާތްގަނޑަކަށް 15 މަސް ދުވަހުގެ ހަނގުރާމައަށްފަހު، ޣައްޒާގެ ޙަމަލާތައް ހުއްޓައިލުމުގެ އެއްބަސްވުމަށް މިހާރު ވަނީ ޢަމަލުކުރަން ފަށައިފައެވެ.
އެ އެއްބަސްވުމުގެ ފުރަތަމަ ފިޔަވަހީގެ ދަށުން އަސީރުންނާއި ޤައިދީން މިނިވަންކުރަން ވަނީ ފަށައިފައެވެ.
ޙަމާސް ޖަމާޢަތް ނައްތާލުމުގެ ނަމުގައި، ފަލަސްޠީނުގެ ނަސްލު ނައްތައިލުމަށް ޔަހޫދީ ފައުޖުން ހިންގި ޖަރީމާތަކުގައި، މުޅި ޣައްޒާ ސުންނާފަތިކޮށް، ބައިލައްކައެއްހާ ފަލަސްޠީނުގެ މައުސޫމް ރައްޔިތުން ވަނީ ޝަހީދުކޮށްލައިފައެވެ.