ށ. ފުނަދޫގައި އަޅާ ކަނދުފަތި ސެންޓަރު މިއަހަރުގެ ތެރޭގައި ނިމޭނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ ރާއްޖޭގައި މިހާރު ބޭނުންކުރާ ކަނދުފަތީގެ ޑިޒައިނަށް ބަދަލު ގެނައުމަށް ބޭއްވި މަޝްވަރާ ބައްދަލުވުމުގައި ވާހަކަފުޅުދައްކަވަމުންނެވެ.
ރާއްޖޭގައި 2 ބާވަތެއްގެ ކަނދުފަތި ވަނީ އަޅާފައެވެ. އެއީ ކަޅުބިލަމަހުގެ މަސްވެރިކަމަށް ޚާއްސަކޮށް އަޅާފައިވާ ދޮށީ ކަނދުފައްޗާއި، ސްޕޯޓްސް ފިޝިންއަށް އަޅާފައިވާ ވަދު ކަނދުފައްޗެވެ.
ރާއްޖޭގައި މިވަގުތު ހުރީ ކަނދުފަތި ޤާއިމްކުރާ އެންމެ ސެންޓަރެކެވެ. މިއީ ކަނދުފަތިތައް ޤާއިމްކުރުމަށް އެވުޒާރާއަށް ދިމާވާ އެންމެ ބޮޑު އެއް ގޮންޖެހުމެވެ. މިކަމަށް ހައްލު ގެނައުމުގެ ގޮތުން ރާއްޖޭގެ އުތުރާއި ދެކުނުގައި ކަނދުފަތި އެޅުމަށް 2 ސެންޓަރު ޤާއިމްކުރައްވާނެކަން ސަރުކާރުން ވަނީ އިއުލާންކުރައްވާފައެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މިއަހަރު ތެރޭގައި ފުނަދޫގައި ގާއިމްކުރާ ކަނދުފަތި ސެންޓަރު ނިމޭނެކަމަށެވެ. މިއާއެކު ކަނދުފަތީގެ ވިއުގަ ފުޅާކުރުމަށް އެވުޒާރާއަށް ފަސޭހަވެގެންދާނެކަން ވަޒީރު ފާހަގަކުރެއްވިއެވެ.
"މިކަންތައް ރަނގަޅުކުރުމަށް ސަރުކާރުން މިވަނީ މަސައްކަތް ފަށާފައި. އެގޮތުން ކަނދުފަތި ތައްޔާރުކުރުމުގެ ކެޕޭސިޓީ އިތުރުކުރުމަށް ކަނދުފަތި ޤާއިމްކުރުމަށް ޚާއްސަ އިތުރު 2 ސެންޓަރު ރާއްޖޭގެ އުތުރާއި ދެކުނުގައި ޤާއިމްކުރުމަށް ވަނީ ނިންމާފައި. މިގޮތުން ޤާއިމްކުރާ ފުރަތަމަ ސެންޓަރު ށ ފުނަދޫގައި މިއަހަރު ޤާއިމްކުރެވިގެންދާނެ". ޝިޔާމް ވިދާޅުވިއެވެ.
ރާއްޖޭގައި މިވަގުތު އަޅާފައިވަނީ ދޮށީގެ މަސްވެރިކަމަށް އަޅާފައިވާ 65 ކަނދުފައްޗާއި ސްޕޯޓްސް ފިޝިންއަށް އަޅާފައިވާ 26 ކަނދުފައްޗެވެ.