ޔޭޔޭ އައިޑިއާސް ކަޕްގެ ފައިނަލުގައި އެސްޓީއޯ އާއި ކްލަބު އިމިގްރޭޝަން ބައްދަލުކުރާ މެޗު މާދަމާ ހަވީރު ކުޅޭނެ އެވެ. ކުޅިވަރު އެކުވެނި ވެލިދަނޑުގައި އެސްޓީއޯ އާއި އިމިގްރޭޝަންގެ ކުރިމަތިލުން ފެށުމަށް ހަމަޖެހިފައިވަނީ މާދަމާ ހަވީރު 4:00ގައެވެ. އައިޑިއާސް ކަޕްގެ ފައިނަލުގައި އެސްޓީއޯ އާއި އިމިގްރޭޝަން ބައްދަލުކުރާ މެޗު ބަލައިލުމަށްޓަކައި ވީހާވެސް ގިނަ ސަޕޯޓަރުން ކުޅިވަރު އެކުވެނި ވެލިދަނޑަށް މާދަމާ ހަވީރު ހާޒިރުވުމަށް އެ މުބާރާތް އިންތިޒާމުކުރާ ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އެދެއެވެ. މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ. މިދިޔަ މަހުގެ 20 އިން ފެށިގެން މާދަމާގެ ނިޔަލަށް ކުރިއަށްދާ އައިޑިއާސް ކަޕް ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.