އެމްޑަބްލިޔުއެސްސީގެ ފެން ޕްލާންޓްތައް ހިންގަން ބޭނުންވާ މިންވަރަށް ކަރަންޓް ދީފައިވާ ކަމަށް ސްޓެލްކޯއިން ބުނެފި އެވެ. މިދިޔަ ބުރާސްފަތި ދުވަހު އެމްޑަބްލިޔުއެސްސީގެ ޕެނަލް ބޯޑުގައި އަލިފާން ރޯވުމުގެ ސަބަބުން އެ ތަނުގެ ކަރަންޓް ކެނޑި ފެން އުފެއްދުން ވަނީ ހުއްޓިފަ އެވެ. އެތަނުގެ ފެން ޕްލާންޓްތަކަށް ކުރިން ބޭނުން ކުރަމުން ދިޔައީ އެމްޑަބްލިޔުއެސްސީގެ އަމިއްލަ ކަރަންޓެވެ. ސްޓެލްކޯގެ މެނޭޖިން ޑިރެކްޓަރު އަބްދުއްޝުކޫރު މިއަދު ވިދާޅުވި ގޮތުގައި އެމްޑަބްލިޔުއެސްސީގެ ޕްލާންޓްތައް ހިންގަން 2.5 މެގަވޮޓްގެ ކަރަންޓް ބޭނުން ކުރެވޭ މިންވަރަށް ކަރަންޓު ދޫކޮށްފައިވާ ކަމަށެވެ. "ހުކުރު ދުވަހުގެ މެންދުރު 2:00 ހާއިރު އެ ބޭފުޅުންނަށް ބޭނުންވާ ކަރަންޓް ދީފިން. ...ކަރަންޓް ދިނުމަށް ތިން ޓްރާންސްފޯމަރާއި ސްވިޗް ގިޔަރު ބެހެއްޓިން،" މިއަދު މެންދުރު ފަހު ސްޓެލްކޯގައި ބޭއްވި ނިއުސް ކޮންފަރެންސެއްގައި ޝުކޫރު ވިދާޅުވި އެވެ. އަލިފާނުގެ ހާދިސާ ހިނގިތާ 24 ގަޑިއިރު ވެސް ނުވަނީސް ފެން ޕްލާންޓްތަކަށް ބޭނުންވާ މިންވަރަށް ކަރަންޓް ދޫކުރެވުނީ، މާލޭގެ ކަރަންޓް ޑިސްޓްރިބިއުޝަން ރަނގަޅު ކުރުމަށް އަޅަމުންދާ އާ ކޭބަލް އެމްޑަބްލިޔުއެސްސީއާ ހަމައަށް އެޅިފައި އޮތުމުން ކަމަށް ވެސް ޝުކޫރު ވިދާޅުވި އެވެ. އޭނާ ވިދާޅުވި ގޮތުގައި މިވަގުތު އެމްޑަބްލިޔުއެސްސީއަށް ކަރަންޓް ދެނީ ކުރިމަތިވެފައިވާ ކުއްލި ހާލަތުގަ އެވެ. ދާއިމީ ގޮތެއްގައި ކަރަންޓް ދޭން އަދި އެއްބަސްވުމެއް ނެތެވެ. އެމްޑަބްލިޔުއެސްސީއަށް ކަރަންޓް ދޫކުރި ނަމަވެސް ސްޓެލްކޯގެ ހިދުމަތަށް ބުރޫ ނާރައި މުޅި މާލެއަށް ކަރަންޓް ފޯރުކޮށްދެވޭނެ ކަމަށް ވެސް ޝުކޫރު ވިދާޅުވި އެވެ. ސްޓެލްކޯއިން ކަރަންޓް ދީފައިވާއިރު، ޑިފެންސް މިނިސްޓަރު މުހައްމަދު ނާޒިމް ވިދާޅުވެފައި ވަނީ ކުރިއެކޭ އެއްގޮތަށް ފެން ދޫކުރަން ފަށަން 10 ވަރަކަށް ދުވަސް ނަގާނެ ކަމަށެވެ.