ރާއްޖޭގެ ފަރުތަކަށް އަރައި ބޯޓުފަހަރު ޖޫރިމަނާކުރުމުން ދައުލަތަށް ދައްކަންޖެހޭ ފައިސާ ލިބޭނެކަން ކަށަވަރުކުރުމަށް އައު ގަވާއިދެއް އެކުލަވާލުމުގެ މަސައްކަތް ކުރަމުންދާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިއަދު ހާމަކޮށްފިއެވެ.ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީއަށް މަޢުލޫމާތު ދެމުން، ދަތުރުފަތުރާ ބެހޭ ވުޒާރާގެ އިސްވެރިއެއް ވިދާޅުވީ ޖޫރިމަނާ ފައިސާ ހޯދުމަށް އެންމެ ފަހި ގޮތަކީ ރާއްޖެ އެތެރެވާ ހުރިހާ ބޯޓުފަހަރަކީ އިންޝުއަރެންސް ނަގާފައިވާ ބޯޓުތަކެއްކަން ކަށަވަރުކުރުން ކަމަށެވެ.
ރާއްޖޭގެ އެކި ސަރަހައްދުތަކުގައި މަޝްރޫޢުތައް ހިންގާއިރު، ބޭރު ޤައުމުތަކަށް ރަޖިސްޓްރީކޮށްފައިވާ ބާޖުތަކާއި ބޯޓުފަހަރު ދިވެހި ކަނޑުތަކުގައި ހަރަކާތްތެރިވެއެވެ. މިފަދަ ބޯޓުފަހަރު ފަރަށް އަރައިގެން އެ ފަރުތަކަށް ބޮޑެތި ގެއްލުން ލިބޭ ހާލަތްތަކުގައި، އެންވާރަމެންޓް ޕްރޮޓެކްޝަން އޮތޯރިޓީ (އީޕީއޭ) އިން އެ ބޯޓުފަހަރު ޖޫރިމަނާކުރެއެވެ. ނަމަވެސް ގިނަ ފަހަރަށް މި ބޯޓުތަކުން ޖޫރިމަނާ ފައިސާ ނުދައްކާކަން ފާހަގަކުރެވެއެވެ.މި މައްސަލައާ ގުޅޭގޮތުން ކޮމިޓީގައި ވާހަކަދައްކަވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނަޢީމް ވަނީ ޖޫރިމަނާ ފައިސާ ނުލިބޭތީ ކަންބޮޑުވުން ފާޅުކޮށްފައެވެ. "ޖޫރިމަނާ ފައިސާ ނުދައްކާ ބޯޓުފަހަރު ރާއްޖޭގައި އަލުން އޮޕަރޭޓުކުރުން ހުއްޓުވޭނެ ގޮތެއް މިހާރު ނެތް. މިއީ ވަރަށް ބޮޑު މައްސަލައެއް،" ނަޢީމް ވިދާޅުވިއެވެ.