ސަރުކާރުން މީޑިއާތައް ކޮންޓްރޯލް ކުރުމަށް އުފެއްދި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނައިބު ރައީސްއަކަށް ކުރީގެ ނޫސްވެރިޔާ އަދި މި ގާނޫނުގެ ދަށުން އުވާލި ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރުކަން ކުރެއްވި ޒަމްއަތު ވަހީދު މިއަދު އިންތިހާބުކޮށްފި އެވެ.
ވީ ކިހިނެއް؟ - ކޮމިޝަންގެ ގާނޫނު ބުނާ ގޮތުން ކޮމިޝަންގެ ރައީސް ކަނޑައަޅަނީ މަޖިލީހުންނެވެ. އަދި ނައިބު ރައީސް ކަނޑައަޅަނީ ކޮމިޝަންގެ މެންބަރުންގެ ތެރެއިން އެކަމަށް ވާދަކޮށް، މެންބަރުންގެ މެދުގައި ނެގޭ ވޯޓަކުންނެވެ. މިއަދު ބޭއްވި ބައްދަލުވުމުގައި އެ ވޯޓު ވަނީ ނަގާފަ އެވެ.
ތަފްސީލު - ކޮމިޝަންގެ މިއަދުގެ ބައްދަލުވުމުގައި ޒަމްއަތު ނައިބު ރައީސްއަކަށް އިންތިހާބު ކުރިކަން އެ ކޮމިޝަންގެ ރައީސް މުހައްމަދު ފަރުސަތު 'ދައުރު'އަށް ކަށަވަރުކޮށްދެއްވި އެވެ.
ނައިބު ރައިސް ކަމަށް ޒަމްއަތު އިންތިހާބުވެވަޑައިގެންނެވީ، އުވާލި މީޑީއާ ކައުންސިލްގެ ރައީސް ހުސައިން ސަފީގްއާ ވާދަކުރައްވައިގެންނެވެ. އެގޮތުން:
ޒަމްއަތުއަށް ލިބިވަޑައިގެންނެވީ ހަތަރު ވޯޓު
ސަގީފްއަށް ލިބިވަޑައިގެންނެވީ ތިން ވޯޓު
ކުރިން ވީޓީވީގައި މަސައްކަތް ކުރެއްވި ޒަމްއަތު، ކޮމިޝަންގެ މެންބަރަކަށް ހޮވިވަޑައިގެންނެވީ މަޖިލީހުން ކަނޑައަޅާ ތިން މެންބަރުންގެ މަގާމުގެ ތެރެއިންނެވެ.
ސަގީފް ކޮމިޝަންގެ މެންބަރުކަމަށް ވަޑައިގެންނެވީ މީޑިއާތައް ތަމްސީލު ކުރާ ހަތަރު މެންބަރުންގެ މަގާމުގެ ތެރެއިން އެވެ. ސަގީފްއާ އެކު އެ ހަތަރު މަގާމަށް އެ ބޭފުޅުން ހޮވިވަޑައިގަތީ އިންތިހާބަކާ ނުލަ އެވެ.