އޭއައި މެދުވެރިކޮށް ދިވެހި ތާރީޚާއި، ފޯކްލޯގެ ހާދިސާތައް ވީޑިއޯގެ ގޮތުގައި ތައްޔާރުކޮށް ގެނެސްދެމުން އަންނަ އަހްމަދު މުޙައްމަދު ދީދީ (އަހަންމާ)، ދޮން ހިޔަލައާއި އަލިފުޅުގެ ވާހަކަ ވެސް އޭއައި ފިލްމެއްގެ ގޮތުގައި އުފައްދައިފިއެވެ. އޭއައި މެދުވެރިކޮށް ވަރަށް ތަފުސީލުކޮށް މަންޒަރުތައް ގެނެސްދީފައިވާ ދޮންހިޔަލައާއި އަލިފުޅުގެ ވާހަކައިގައި ހިމެނޭ މުހިންމު ހާދިސާތައް ވެސް ވަނީ މި ފިލްމުގައި ކިޔައިދީފައެވެ. އެއީ، ކުރީގައި އުޅުނު ދެ ލޯބިވެރިންގެ ވާހަކައެކެވެ. ފޮތެއްގެ ސިފައިގައި އެ ވާހަކަ ނެރުއްވީ 1976 ވަނަ އަހަރު އަބްދުﷲ ޞާދިޤު (ސޯދުބެ)އެވެ. ދޮންހިޔަލައަކީ ވަރަށް ރީތި އަންހެނެކެވެ. އަލިފުޅަކީ ހިތްވަރުގަދަ މީހެކެވެ. މި ވާހަކައިގައި ދޮންހިޔަލައާއި އަލިފުޅުގެ ލޯތްބާއި، ދިމާވާ ދަތިތަކާއި އަދި މީގެ އިތުރުން ވެސް ހިތާމަވެރި ކަންތައްތައް ވެސް ހިމެނެއެވެ. މި ވާހަކަ ހިނގި މައިގަނޑު ތަންތަނާއި، އެ ދެ މީހުންގެ މެދުގައި ލޯބީގެ ގުޅުން އުފެދުނު ގޮތާއި، ފަހުން ކުރިމަތިވި ދަތިތަކާއި، އަދި އެ ވާހަކަ ނިމޭ ގޮތް ވަރަށް ފުރިހަމައަށް މި ފިލްމުގައިވަނީ އޭއައި މެދުވެރިކޮށް ގެނެސްދީފައެވެ. ގާތްގަނޑަކަށް 24 މިނެޓުގެ މި ފިލްމުގައި ވެސް ވަނީ މަންޒަރާ ގުޅޭ އަދި އެ މަންޒަރަކުން ގެނެސްދޭން ބޭނުންވާ އިހުސާސްތަކާ ގުޅޭހެން ބެކް މިއުޒިކް ވެސް ގެނެސްދީފައެވެ. އަދި, މި ހާދިސާއާ ގުޅޭ އޭއައި ލަވައެއް ވެސް މި ފިލްމުގައި ވަނީ ބޭނުންކޮށްފައެވެ. އޭއައި ބޭނުންކޮށްގެން އަހަންމާ ތައްޔާރުކުރި ދޮންހިޔަލައާއި އަލިފުޅު ވާހަކައިގެ މަންޒަރެއް -- ފޮޓޯ: ވީޑިއޯ ސްނެޕްޝޮޓް މި މަސައްކަތުގެ އިތުރަށް ވެސް އޭއައި މެދުވެރިކޮށް، މުހިންމު ބައެއް ހާދިސާތަކާއި ލަވަތައް ވެސް ދީދީ ވަނީ އުފައްދާފައެވެ. އޭގެ ތެރެއިން އެންމެ ފާހަގަކޮށްލެވެނީ އެންމެ ފަހުން އޭނާ އުފެއްދި ރެހެންދި ޚަދީޖާއާ ބެެހޭ ޑޮކިއުމަންޓްރީއެވެ. ނަވާރަސަތޭކަ އައްޑިހައިގެ ފަހުކޮޅު ޓީވީއެމްގައި މަސައްކަތްކުރި ދީދީއަކީ ފަންނީ މަސައްކަތްތަކަށް ވަރަށް މޮޅު މީހެކެވެ. އެ ގޮތުން, ޓީވީއެމްގައި މަސައްކަތް ކުރި ދުވަސްވަރު ވެސް އޭރު ލިބެން ހުރި ވަސީލަތްތަކާ އެކު އޭނާ ވަނީ އާންމުންނަށް އޭރު ހައިރާންކަން ލިބުނު މޮޅު އުފެއްދުންތައް ގެނެސްދީފައެވެ. އެގޮތުން އަހްމަދު މަސައްކަތްތައް 1980ގެ އަހަރުތަކުގެ ފަހުކޮޅާއި 1990ގެ ކުރީކޮޅުގެ ޓީވީއެމުން އުފެއްދި ގިނަ އުފެއްދުންތަކެއްގައި ގިނައެވެ. އަދި އެއަށްފަހު ނެރުނު ބޮޑެތި ފިލްމުތައް ކަމަށްވާ 'ދެރިޔާ'، 'އަމާނާތް'، ފަތިސް ހަނދުވަރު'ގައި ވެސް އޭނާގެ މަސައްކަތް ހިމެނެއެވެ.