މިދިޔަ ޑިސެންބަރު މަހު ވެސް ހުއްޓުމެއް ނެތި އަސާސީ ތަކެތީގެ އަގުތައް ބޮޑުވެފައިވާ ކަމަށާއި އެންމެ ބޮޑަށް ބޮޑުވީ ކާނާގެ އަގު ކަމަށް ނެޝަނަލް ސްޓެޓިސްޓިކްސް ބިއުރޯގެ ތަފާސްހިސާބުތަކުން ދައްކައިފިއެވެ. އެ އިދާރާއިން އިއްޔެ ވަނީ މިދިޔަ މަހު އަސާސީ ތަކެތީގެ އަގުތަކަށް އައި ބަދަލުތަކުގެ ހިސާބު އާންމުކޮށްފައެވެ. ސްޓެޓިސްޓިކްސް ބިރުއޯގެ ހިސާބުތަކުން އެނގޭ ގޮތުގައި މިދިޔަ މަހު އަސާސީ ބާވަތްތަކުގެ އަގުތައް ވަނީ އަހަރުން އަހަރަށް ބަލާއިރު 2.95 ނުވަތަ ތިން އިންސައްތަ އުފުލިފައެވެ. އެއީ، ނިސްބަތުން ބޮޑު އަދަދެކެވެ. އަދި، މަހުން މަހަށް ބަލާއިރު ވެސް މިދިޔަ މަހު ވަނީ އޭގެ ކުރީ މަހާ ބަލާއިރު އަސާސީ ތަކެތީގެ އަގުތައް 1.16 އިންސައްތަ އުފުލިފައެވެ. އެންމެ ބޮޑަށް މިދިޔަ މަހު އަގުބޮޑުވީ ކާނާގެ ބާވަތްތަކެވެ. އެ ގޮތުން، މަހުން މަހަށް ބަލާއިރު މިދިޔަ މަހު ވަނީ ކާނާގެ އަގު 1.57 އިންސައްތަ އުފުލިފައެވެ. އެއީ، އަހަރުން އަހަރަށް ބަލާއިރު 3.25 އިންސައްތައިގެ އިތުރުވުމެކެވެ. https://x.com/ysha_is/status/2015815414060888379 ދެވަނައަށް އެންމެ އަގުބޮޑުވީ ބުއިންތަކުގެއެވެ. އެ ތަކެތީގެ އަގުތައް މަހުން މަހަށް ބަލާއިރު، މިދިޔަ މަހު ވަނީ 0.18 އިންސައްތަ އަގު ބޮޑުވެފައެވެ. އަދި، އަހަރުން އަހަރަށް ބަލާއިރު އެ ބާވަތްތަކުގެ އަގުތައް ވެސް ވަނީ 2.87 ނުވަތަ ތިން އިންސައްތަ އުފުލިފައެވެ. ރީތިވާ ސާމާނު ނުވަތަ ޕާސަނަލް ކެއާގެ ބާވަތްތަކުގެ އަގު މަހުން މަހަށް ބަލާއިރު، މިދިޔަ މަހު ވަނީ 0.23 އިންސައްތަ ދަށްވެފައެވެ. އެކަމަކު، އެ ބާވަތްތައް ވެސް އަހަރުން އަހަރަށް ބަލާއިރު މިދިޔަ މަހު ހުރީ 3.50 އިންސައްތައަށް އުފުލިފައެވެ. އެހެންވެ، އެ ތަކެތީގެ އަގުތައް ވެސް ހެވެއް ނޫނެވެ. އަހަރުން އަހަރަށް ބަލާއިރު ވެސް އަގު ހެޔޮވީ އެންމެ ބާވަތެކެވެ. އެއީ ގޭހުގެ ބާވައްތަކެވެ. އެ ގޮތުން، އެ ފަދަ ތަކެތީގެ އަގުތައް މިދިޔަ މަހު ވަނީ މަހުން މަހަށް ބަލާއިރު 0.10 އިންސައްތަ ދަށްވެފައެވެ. އަދި، އަހަރުން އަހަރަށް ބަލާއިރު ވެސް އެ ބާވަތްތަކުގެ އަގުތައް ވަނީ 1.69 އިންސައްތަ ދަށްވެފައެވެ. ދަރަނީގެ މައްސަލަ ބޮޑުވެ، ބޭރު ފައިސާ ތާށިވެ، ރާއްޖޭގައި ތަކެތީގެ އަގުތައް އަންނަނީ އުފުލެމުންނެވެ. https://sun.mv/216323 ޑޮލަރު ލިބުން ދަތިވެ، ކަޅު ބާޒާރުގައި މިހާރު ޑޮލަރެއްގެ އަގު ހުރީ 20 ރުފިޔާއިން މަތީގައެވެ. އެއީ، މިހާތަނަށް ދުވަހަކު ވެސް ބޮޑުނުވާ މިންވަރެކެވެ. އެ ވަރުގައި ޑޮލަރެއްގެ އަގު ހިފެހެއްޓިފައި ހުންނަތާ ވެސް އެތައް ދުވަހެއް ވެއްޖެއެވެ. މުދާ އެތެރެކުރާ މީހުންނާއި ވިޔަފާރިތަކުން ވެސް އެ އަގުގައި ކަޅު ބާޒާރުން ޑޮލަރު ގަންނަން ޖެހުމަކީ ވެސް ތަކެތީގެ އަގު ބޮޑުވާން ދިމާވާ ސަބަބެއް ކަމަށް ބައެއް އިގުތިސާދީ ބޭފުޅުން ގަބޫލުކުރައްވައެވެ. އެކަމަކު، އިކޮނަމިކް މިނިސްޓަރު މުހައްމަދު ސައީދު ވަނީ ތަކެތީގެ އަގު ބޮޑުވަނީ މިދިޔަ ސަރުކާރުގައި ފައިސާ ޗާޕުކުރުމުން ކަމަށް ތަކުރާރުކޮށް ވިދާޅުވެފައެވެ. ތަކެތީގެ އަގު ބޮޑުވާތީ ސަރުކާރުން މި ފަހުން ވަނީ އެސްޓީއޯ މެދުވެރިކޮށް އަސާސީ 23 ބާވަތެއް އެތެރެކުރަން ވެސް ނިންމާފައެވެ. މިދިޔަ އަހަރުގެ އޮކްޓޫބަރު 15 ގައި އެ ކުންފުނިން ވަނީ އެ ބާވަތްތަކުގެ ފުރަތަމަ ޝިޕްމަންޓް ގެނެސް، ބާޒާރަށް ނެރެފައެވެ.