އިނގިރޭސި ޕްރިމިއާ ލީގުގެ ޗެލްސީގެ އައު ކޯޗުގެ މަގާމަށް، ލިވަޕޫލްގެ ކުރީގެ މިޑްފީލްޑަރު ޒަބީ އަލޮންސޯ ހަތަރު އަހަރު ދުވަހުގެ އެއްބަސްވުމެއްގެ ދަށުން ހަމަޖައްސައިފިއެވެ. އުމުރުން 44 އަހަރުގެ ސްޕެއިންގެ އަލޮންސޯ ޗެލްސީގެ މަގާމާ ރަސްމީކޮށް ހަވާލުވުމަށް ހަމަޖެހިފައިވަނީ ކުރިއަށްއޮތް ޖުލައި މަހުގެ ތެރޭގައެވެ. ރެއާލް މެޑްރިޑާއެކު ހަދާފައިވާ ތިން އަހަރުގެ އެއްބަސްވުން ފެށުނުތާ އަށް މަސްވެސް ނުވަނީސް، ދެފަރާތް އެއްބަސްވެގެން މިދިޔަ ޖެނުއަރީ މަހު އޭނާ ވަނީ އެ ކްލަބުން ވަކިވެފައެވެ. މީގެކުރިން ބަޔާން ލެވަކޫސަންއަށް ތިން އަހަރު ވަންދެން އިރުޝާދުދީ، 2024 ވަނަ އަހަރު އެ ކްލަބަށް ފުރަތަމަ ފަހަރަށް ބުންޑެސްލީގާ ކާމިޔާބުކޮށްދިނުމުގެ އިތުރުން ޖަރުމަން ކަޕްވެސް އޭނާ ވަނީ ހޯދައިދީފައެވެ. އަލޮންސޯ ޗެލްސީއާ ހަވާލުވިކަން ކްލަބުން ކަށަވަރުކޮށްދިނީ، އެފްއޭ ކަޕްގެ ފައިނަލްގައި މެންޗެސްޓާ ސިޓީ އަތުން ޗެލްސީ ބަލިވިތާ އެއްދުވަސް ފަހުންނެވެ. މި ސީޒަނަކީ ތަށީގެ ގޮތުން ޗެލްސީއަށް ކާމިޔާބު ސީޒަނަކަށް ނުވިނަމަވެސް، އަލޮންސޯގެ އައުމާއެކު ކްލަބަށް އައު އުންމީދެއް ވަނީ ލިބިފައެވެ. މި ސީޒަނުގައި ޗެލްސީން ވަނީ ދެ ދާއިމީ ކޯޗުން ކަމަށްވާ އެންޒޯ މަރެސްކާ އަދި ލިއަމް ރޮސީނިއޯ ވަކިކޮށްފައެވެ. މިހާރު ވަގުތީ ކޯޗެއްގެ ގޮތުގައި ހުރި ކެލަމް މެކްފާލަން، ލީގުގައި ބާކީ އޮތް ފަހު ދެ މެޗުގައި ޓީމަށް އިރުޝާދު ދޭނެއެވެ. ޗެލްސީގެ މެނޭޖްމަންޓުން އުންމީދު ކުރަނީ އަލޮންސޯއާއެކު ކްލަބަށް ހަމަޖެހުމެއް އަންނާނެ ކަމަށެވެ. މިވަގުތު ޗެލްސީ އޮތީ ލީގު ތާވަލުގެ 9 ވަނައިގައެވެ. މަގާމާ ހަވާލުވުމަށްފަހު އަލޮންސޯ ބުނީ، ޗެލްސީއަކީ ދުނިޔޭގެ ފުޓްބޯޅައިގެ އެންމެ ބޮޑު އެއް ކްލަބް ކަމަށާއި، އެ ކްލަބުގެ މެނޭޖަރުކަމާ ހަވާލުވުމަކީ ލިބުނު ފަޚުރެއް ކަމަށެވެ. އަދި ކްލަބުގެ ވެރިންނާއި ސްޕޯޓިންގް ލީޑަރޝިޕްގެ ވިސްނުން ހުރީ އޭނާގެވެސް އުންމީދުތަކާ އެއްގޮތަށް ކަމަށާއި، އަމާޒަކީ އެންމެ މަތީ ފަންތީގައި ވާދަކޮށް ތަށިތައް ހޯދޭނެ ފަދަ ވަރުގަދަ ޓީމެއް ބިނާކުރުން ކަމަށް އޭނާ ފާހަގަކުރިއެވެ. އަލޮންސޯއަކީ ލިވަޕޫލްގައި ކާމިޔާބު ފަސް އަހަރު ހޭދަކޮށް، 2005 ވަނަ އަހަރުގެ ޗެމްޕިއަންސް ލީގު ކާމިޔާބުކުރި ކުޅުންތެރިއެކެވެ. މީގެއިތުރުން ރެއާލް ސޮސިއެޑާޑް، ރެއާލް މެޑްރިޑް އަދި ބަޔާން މިއުނިކަށް ކުޅުމުގެ އިތުރުން، ސްޕެއިން ގައުމީ ޓީމަށް 114 މެޗު ކުޅެދީ، 2010 ގެ ވޯލްޑް ކަޕާއި ދެ ފަހަރު ޔޫރޯ ކާމިޔާބުކޮށްފައިވާ ތަޖުރިބާކާރު ކުޅުންތެރިއެކެވެ. މިހާރު ލީގުގެ ނުވަވަނައިގައި އޮތް ޗެލްސީއަށް އަންނަ ސީޒަނުގެ ޔޫރަޕްގެ މުބާރާތަކުން ޖާގަ ހޯދުމަށްވެސް ބޮޑެތި ހުރަސްތަކެއް އެބަހުއްޓެވެ.