ރައީސުލްޖުމްހޫރިއްޔާގެ ހާއްސަ މަންދޫބެއްގެ ގޮތުގައި ޕީޕީއެމްގެ ރައީސް މައުމޫން އަބްދުލްގައްޔޫމް އޮމާން އަށް ފުރާވަޑައިގެންފި އެވެ. ޕީޕީއެމްގެ އޮފިޝަލަކު 'ސަން' މިއަދު ވިދާޅުވީ ރައީސް މައުމޫން އޮމާނަށް ކުރައްވާ މި ދަތުރުފުޅަކީ މިސަރުކާރުން އަރަބި އިސްލާމީ ގައުމުތަކާ ގުޅުން ބަދަހި ކުރުމަށް ކުރަމުން ގެންދާ މަސައްކަތުގެ ތެރެއިން އޮމާންއަށް ކުރައްވާ ދަތުރުފުޅެއް ކަމަށެވެ. "ރަޢީސް މައުމޫންގެ މިދަތުރު ފުޅުގައި އޮމާންގެ ރަސްގެފާނާ ބައްދަލުކުރައްވާނެ،" އޮފިޝަލް ވިދާޅުވި އެވެ. ރައީސް މައުމޫންގެ މި ދަތުރުފުޅުގައި އޮމާން އާއި ރާއްޖެއާ ދެމެދު އޮތް ގުޅުން އިތުރަށް ބަދަހި ކުރުމަށާއި ރާއްޖެ އަށް އެކި އެކި ދާއިރާތަކުން އެހީ ހޯދުމާ ބެހޭ ގޮތުން އޮމާންގެ އެކިއެކި ވުޒާރާތަކާ މަޝްވަރާކުރެއްވުމަށް ވަނީ ހަމަޖެހިފައި ކަމަށް ޕީޕީއެމް އިން ބުންޏެވެ.